WALEWI 27
27
Mawawaso kya wuleki ko Mndumii-Ruwa
1Mndumii-Ruwa nalewia Mose; 2“Wia Waisraeli kudi; Mndu kawika kiteṟio keinenga Mndumii-Ruwa mndu o wandu, mnducho neidima iawutsia kiteṟiokyo kyake kui itaa kiheo kya pesa chandu kikiteṟie: 3Mndumsoṟo o maka makumi hawi tane makumi haṟandaṟu nechitalao na pesa shekeli makumi hatanu tsihianyi na kiheo kya handu haele. 4Kokoya nyi mndumka, nechitalao na pesa shekeli makumi haṟaṟu. 5Ko koya mnducho nyi o maka wokia maka itanu tane makumi hawi nechitalao na pesa shekeli makumi hawi ko manake, na shekeli ikumi ko mana o waka. 6Kokoya nyi mana o kisoṟo o meri fumu tane maka itanu nechitalao na shekeli tsitanu, na mana o kika nyi shekeli tsiṟaṟu. 7Kokoya mnducho nyi msoṟo o ngoseṟa ya maka makumi haṟandaṟu wuhuru woke wochiwa shekeli ikumi na tsitanu; na kokoya nyi mndumka nyi shekeli ikumi. 8Kokoya mnducho mowika kyasakyo nyi mkiwa aleidima itaa wuhuruwo, kyasiang'u mndu nechidao ko mkohanyi. Mkohanyi nechimnenga wuhuru woke wuhianyi na wuidimi wo icho mowika kiteṟio.
9“Kokoya kiteṟiokyo nyi kya shuma sa wandu wekewutia Mndumii-Ruwa mwano, kyasia kiumakyo kechiwa kindo kiele. 10Kuwode momu foilacha kiumakyo na kingi kyosepfo, mcha ko mbicho ang'u mbicho ko mchapfo. Kokoya ailacho kiumakyo; shose shishiwi shechiwa shiele.
11“Kokoya kiteṟiokyo nyi kiuma kiteṟefukie; kii nyi mbaṟi ilawaṟi iendie Mndumii-Ruwa; mnducho alewika kiteṟio, nechiendie mkohanyi, 12na mkohanyi nahambe wuhuru woke wuhianyi na wucha ang'u wuwicho woke. Chandu mkohanyi echidumbuo nyi wudo kechiwa. 13Kyaindi kokoya nyio amonyi akundi imtalaa, kyasia nechilekia wuhuruwo na kienga kya makumi hawi ngoseṟa.
14“Mndu kashimbuo mba yake iwe njiele ko Mndumii-Ruwa, mkohanyi nechiteṟia wuhuru woyo wuhianyi na wucha ang'u wuwicho woyo. Chandu echiteṟia, nyi wudo kechiwa. 15Kokoya mnducho alekunda ishimbuo kakunda iitalaa mbayo; kyasia nechiengeṟa kienga kya makumi hawi kya wuhuru wo mbayo; nayo yechiwa nyi masaa hake.
16“Mndu kawika teri yake, ii nyi kyoṟa kyake kaishimbuo ko Mndumii-Ruwa, kyasia wuhuru woyo wochiteṟio wuhianyi na shilimu sho shekedemo o demenyi; orio shilo makumi hawi sha Ngano wuhuru woke nyi shekeli makumi hatanu sha pesa. 17Ko koya ashimbuo dema lyake kiidi kya maka fo ngumbuo ya maka makumi hatanu, wuhuru wolyo kiwaṟi wuhiane na shiheo shanu. 18Kyaindi kalishimbuo makafo fomeida; mkohanyi nechidumbuo wuhuru wolyo wuhianyi na maka itsuhee kushike maka fo ngumbuo ya aka makumi hatanu na wuhuru wolyo wunyiiṟo. 19Na Kokoya menyi akunda ilitalaa, nkiwaṟi naengeṟe kienga kya makumi hawi kya wuhuru wo demalyo, na numa lyiwe masaa hake. 20Kyaindi kokoya alakundi ilitalaa ang'u kakumbia mndu ungi, kyasia, demalyo lyilatalaose manta. 21Kiidi kya maka fo ngumbuo maka makumi hatanu, demalyo lyechideo lyiwe liele lya Mndumii-Ruwa mlungana. Lyechiwa lya Mkohanyi. 22Kokoya mndu ashimbuo dema alyihuṟie, lilai lyake lya kioṟa, 23mkohanyi nechiteṟia wuhuru wo demalyo wuhianyi na maka itsuhee kushike maka fo ngumbuo ya maka makumi hatanu, na mnducho kiwaṟi natae wuhuru wolyo cha nyi kindo kiele ko Mndumii-Ruwa. 24Kyaindi kiidi kya maka fo ngumbuo ya maka makumi hatanu, demalyo nkiwaṟi liwihiṟio mndu alelikumba. 25Orio wuhuru wochihesho kui kiheo kya wulemeri wo shekeli wuhianyi na kiheo kya handu haele: Wulemeri wo gera makumi hawi wuhianyi na wulemeri wo shekeli imu.
26“Kuwode momu foshimbuo mshao ya kuwoka ya shumapfo; kui kido nyi ha Mndumii-Ruwa kiwe nyi mmbe angu nyi machondi. 27Kokoya nyi kiuma kiteṟefukie; menyi okyo nechikihuṟa ko kiheo kihianyi na chandu mochimhesha, nao nechiengeṟa kienga kya makumi hawi kya wuhuru wo kiumakyo. Kokoya alatalao, kyasia nechikumbo wuhuru chandu shiheo shanu shii.
28 “Kyaindi kindokyo kyose kikishumbuo ko Mndumii-Ruwa, kokoya nyi mndu, ang'u shuma, ang'u kindo kiwukanyi na kyoṟa shechikumbo manya italaopfo. Ikyo kyose kikishimbuo ko Mndumii-Ruwa nkikiele nakamu. 29Mndu oose aimshimbuo ko Mndumii-Ruwa kundu narumatso, nalatalao; kiwaṟi nawoho.
30 “Shiano sha shilimu kokoya nyi mbaṟi ya mso, ang'u ndunda tsa mashidinyi shose nyi masaa ha Mndumii-Ruwa; nyi shishiele ko Mndumii-Ruwa. 31Kokoya mndu akunda italaa mwano foke, nechitaa wuhuru woke naengeṟe kienga kya makumi hawi kya wuhuru wo mwanofo. 32Kya shuma, shikameitalo, orio kya ikumi kii kiele ko Mndumii-Ruwa. 33Mndu oose awode momu fowesa kokoya kiumakyo kikicha ang'u kikiwichopfo; kiumakyo kilailacho na kingi manyale. Kokoya kyailacho na kingi, shose shishiwi shechiwa shiele; shechitalaopfo.”
34Iho nyiho mawawaso sa Mndumii-Ruwa aleitika Mose kundu nawie Waisraeli, kulya fumvuhu lya Sinai.
Currently Selected:
WALEWI 27: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.