MAITALA 1
1
Itala lya kuwoka lya Waisraeli
1 Mkonu fo kuwoka fo meri fo kawi, maka fo kawi fo wana wa Waisraeli wamewuka kulya Misri, Mndumii-Ruwa nalededa na Mose kiidi kya ihema lyesanzia kulya nuka ya msanga ya Sinai kambia adi, 2“Iyo na Aroni italenyi mamwingi fose fo Waisraeli, mba imu imu chandu shishari shawo shii; na itala lya marina hawo orio mndu-msoṟo umu umu; 3iwo wose kiidi kya Israeli sa weidima ihenda shidenyi; wawode maka wokia maka makumi hawi na ngoseṟa; mochiwaachikia kui shidembo shidembo. 4Kingise mndu-msoṟo umu o orio kishari nechikaa hamu nanyo, orio umu ai msongoru ipfo mmbenyi ya kishari kyake.” 5Iha nyiho marina ha wandu wechikutarama:
Kishari kya Rubeni: Elisuri mana o Shedeuri;
6Kishari kya Simeoni: Shelumieli mana o Surishadai;
7Kishari kya Yuda: Nashoni mana o Aminadabu;
8Kishari kya Isakari: Nathanael mana o Suari;
9Kishari kya Zebloni: Eliabu mana o Heloni;
10Kishari kya Efraimu: Elishama mana o Amihudi;
Kishari kya Manase: Gamalieli mana o Pedasuri;
11Kishari kya Benyamenyi: Abidan mana o Gidioni;
12Kishari kya Dani: Ahiezeri mana o Amishadai;
13Kishari kya Aseri: Pagieli mana o Okrani;
14Kishari kya Gadi: Eliasafu mana o Deueli;
15Kishari kya Naftali: Ahira mana o Enani.
16Iwa nyiwo wasongoru walesambuṟo kiidi, kya mamwingi fose fo Waisraeli, cha wasongoru wanene wa shisharinyi shawo.
17Kyasia Mose na Aroni wakaduo wanduwo walesendo, 18na mkonu fo kuwoka fo meri fo kawi, wakasanza mamwingi fose fo wandu wawei waitale orio umu na wa kanyi koke na kishari kyake. Umu umu kui chandu marina ha wandu wawewode maka makumi hawi na ngoseṟa; 19Chandu Mndumii-Ruwa alewawasia Mose. Mose kaitala wanduwa kulya nuka ya msanga ya Sinai.
20Wandu walewuka kisharinyi kya Rubeni, ai mana mmbe o Israeli, kui iosha ufee wowo, kihiani na mba tsawo na mbaṟi yawo, kui iitala lya marina hawo umu umu, orio mndu msoṟo awewode maka makumi hawi na ngoseṟa, aleidima ihenda shidenyi, 21wawei wandu shiku makumi hana na shiṟandaṟu na mahana hatanu (46,500).
22Kuwuka kisharinyi kya Simeoni kui iosha ufee wowo kihianyi mba tsawo na mbaṟi yawo, kui iitala lya marina hawo umu umu, wawode maka wokia makumi hawi na ngoseṟa, sa waleidima ihenda shidenyi, 23wawei wandu shiku makumi hatanu na kenda na mahana haṟaṟu (59,300).
24Kuwuka kisharinyi kya Gadi kui iosha ufee wowo kihianyi na mba tsawo na mbaṟi yawo, kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi, 25wawei wandu shiku makumi haana na shitanu mahana haṟandaṟu na makumi hatanu (45,650).
26Kuwuka kisharinyi kya Yuda kui ufee wowo kihianyi na mba tsawo, na mbaṟi tsawo, kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi, 27wawei wandu shiku makumi mfungade na shiina na mahana haṟandaṟu (74,600).
28Kuwuka kisharinyi kya Isakari kui iosha ufee wowo kihianyi na mba tsawo na mbaṟi tsawo na kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi, 29wawei wandu shiku makumi hatanu na shiina na mahana haana (54,400).
30Kuwuka kisharinyi kya Zeblon kui iosha ufee wowo kihianyi na mba tsawo na mbaṟi tsawo kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi, 31wawei wandu shiku makumi hatanu na mfungade na mahana haana (57,400).
32Kuwuka kisharinyi kya Efraimu, mana o Yosefu, kui iosha ufee wowo kihianyi na mba tsawo na mbaṟi yawo kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi 33wawei wandu shiku makumi haana na mahana hatanu (40,500).
34Kuwuka kisharinyi kya Manase, mana o Yosefu kui ufee wowo kihianyi na mba tsawo na mbaṟi tsawo kui iitala lya marina hawo umu umu, sa wawode maka makumi hawi a ngoseṟa, sa waleidima ihenda shidenyi, 35wawei wandu shiku makumi haṟaṟu a shiwi na mahana hawi (32,200).
36Kuwuka kisharinyi kya Benyameni, kui iosha ufee wowo kihianyi na mba tsawo na mbaṟi tsawo kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi, 37wawei wandu shiku makumi haṟaṟu na shitanu na mahana haana (35,400).
38Kuwuka kisharinyi kya Dani kui iosha ufee wowo kihianyi na mba tsawo na mbaṟi tsawo kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi, 39wawei shiku makumi haṟandaṟu na shiwi na mahana mfungade (62,700).
40Kuwuka kisharinyi kya Aseri, kui iosha ufee wowo kihianyi na mba tsawo na mbaṟi tsawo, kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi, 41wawei wandu shiku makumi haana na kimu na mahana hatanu (41,500).
42Kuwuka kisharinyi kya Naftali, kui iosha ufee wowo kihianyi na mba tsawo na mbaṟi tsawo; kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi, 43wawei wandu shiku makumi hatanu na shiṟaṟu na mahana haana (53,400).
44Iwa nyiwo wandu wawei waitale sa Mose na Aroni walewaitala wechitaramo nyi wasongoru walya ikumi na wawi wa Waisraeli, orio msongoru kaende kishari kyake. 45Ko ikyo iitala lya wasoṟo wa Waisraeli wawewode maka makumi hawi na ngoseṟa waleidima ihenda shidenyi orukenyi lo Waisraeli. 46Wawei wandu shiku mahana haṟandaṟu na shiṟaṟu mahana hatanu na makumi hatanu (603,550).
47Kyaindi Walewi waleitalo handu hamu na shishari shilya shingipfo, 48cha kipfa Mndumii-Ruwa nalewia Mose, 49“Kulaitale kishari kya Lewi manya kulawawikie kiṟehionyi kiidi kya wandu wa Waisraeli; 50indi nochiwasahuo wawe weambuya ihema lya lyekoyanyia, shihia shalyo shose na orio kindo kiipfo kyose; wechiwamolikudika handu hamu na shihia shalyo shose. Wechiṟundia ipfo mba nawo wawike mahema hawo walitengetie. 51Na kingise kiheri kekuṟuo ihema Walewi nyiwo wechilikuṟuo na kiheri keilika ihema na Walewi nyiwo wechilihoṟotsa. 52Waisraeli wengi wose wechiwika mahema hawo kui matorito, orio mndu kiidi kya itorito lyake na bendeṟa yake. 53Kyaindi Walewi wechiwika makambi hawo itengetia ihema lya mdumbuye, wechiliringa kundu mndu oose nalache na afui ilisembelia natewe nyashi yako iakie mamwingifu fo Waisraeli; kyasiang'u Walewi wechiringa ihema lya mdumbuye.” 54Ko ikyo Waisraeli wakatana chandu Mndumii-Ruwa alewawasia Mose.
Currently Selected:
MAITALA 1: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.