MAITALA 2
2
Iachikio lya shishari
1Mndumii-Ruwa kainengia Mose na Aroni mawawasoha: 2“Waisraeli wechiwika makambi hawo, orio umu nakae handu hawode bendeṟa yake, hawode kichano kya kishari kyake. Wechiwika mahema hawo waṟingichie ihema lyekusanzia.
3“Walya wechiwika mahema ora lo ngamenyi woambuya macheyonyi ha mnengeṟi wechiwa wandu wai shi ya bendeṟa ya Yuda na msongoru owo nechiwa nyi Nashoni mana o Aminadabu, 4Wechiwa wasoṟo shiku makumi mfungade na mahana haṟandaṟu (7,600), wahianyi na iitala lilya lya Yuda. 5Iwo wechiituma wandu wa Yuda iwika mahema hawo wechiwa nyi kishari kya Isakari, msongoru owo nyi Nethaneli mana o Suari. 6Wechiwa wasoṟo shiku makumi hatanu na shiina na mahana haana (54,400). 7Numa nyi kishari kya Zebloni, msongoru owo nyi Eliabu mana o Helon, 8wechiwa wasoṟo shiku makumi hatanu na mfungade na mahana haana (57,400). 9Iitala lyawo wose wechikaa makambinyi ha Yuda nyi wandu shiku ihana limu na makumi nyanya na waṟandaṟu na mahana haana (186,400). Iwo nyiwo wechisonguo iira kyaṟo.
10“Kya ora lo nuka, nyi walya wai shi ya bendera ya Rubeni chandu iitala lyawo lii, msongoru owo nyi Elisuri mana o Shedeuri, 11wechiwa wandu shiku makumi haana na waṟandaṟu na mahana hatanu (46,500). 12Numa walya wechiwika makambi hawo mbai ya wandu wa Reuben wechiwa wa kishari kya Simeon msongoru owo nechiwa nyi Shelumieli mana o Suri-Shadai, 13iitala lyawo wechiwa wandu shiku makumi hatanu na kenda na mahana haṟaṟu (59,300). 14Lyefurumia kishari kya Gadi, msongoru owo nechiwa nyi Eliasafu mana o Reueli, 15iitala lyawo wechiwa wandu shiku makumi haana na watanu mahana haṟandaṟu na makumi hatanu (45,650). 16Iitala lya wasoṟo wechikaa kambinyi lya Reubeni nyi wandu shiku ihana kimu na maku hatanu na umu mahana haana na makumi hatanu (151,450). Iwa nyiwo wechiituma iira kyaṟo.
17“Na numa, kambi ya kishari kya Walewi wechikaa makidi hawi ha makambiho hose; wechikure wakudikie ihemalyo lyesanzia, Orio kamba lyechichumia chando waleinengo maanya na bendeṟa
18“Kya ora lo kyukanyi, walya waisongoyo nyi bendeṟa ya kamba lya Efraimu, wechiwika kambi lyawo chando kamba lyawo lii, msongoru owo nyi Elishama mana o Amihudi, 19iitala lyawo lyechiwa wandu shiku makumi haana na mahana hatanu (40,500). 20Wa kamba lya Efraimu wakameida wechiituma wa kishari kya Manase: msongoru owo nechiwa Gamalieli mana o Peda-suri, 21iitala lyawo chandu lii nyi wandu shiku makumi haṟaṟu na shiwi na mahana hawi (32,200). 22Numa nyi kishari kya Benyamini: msongoru owo nyi Abidani mana o Gidion, 23iitala lyawo chandu lyii wechiwa wandu shiku makumi haṟaṟu na shitanu na mahana haana (35,400). 24Iitala lya wandu wechikaa kambinyi lya Efraimu chandu lyii nyi wandu shiku ihana kimu na nyanya na ihana kimu (108,100). Iitalalyi lya Efraimu lyechiwa lya kaṟaṟu ipfo kyaṟonyi.
25“Kya ora lo mtsudu, walya waisongoyo nyi bendeṟa ya Dani wechiwika kambi lyawo kiidi kya iitala lyawo, msongoru owo nechiwa nyi Ahiezeri maana o Amishadai, 26kamba lyake lihianyi na iitala lyechiwada wandu shiku makumi haṟandaṟu na shiwi na mahana mfungade (62,700). 27Numa iwo wechiwaituma iwika kambi lyawo nyi wandu wa kishari kya Aseri, msongoru owo ai nyi Pagieli mana o Okrani, 28kamba lyake chandu iitala lyawo lyi lyechiwada wandu shiku makumi haana na kimu na mahana hatanu (41,500).
29“Numa nyi kishari kya Naftali, msongoru owo nyi Ahira mana o Enani. 30Kamba lyake chandu iitala lyawo lii, lyechiwada wandu shiku makumi hatanu na shiṟaṟu na mahana haana (53,400). 31Iitala lya wandu wechikaa kambinyi lya Dani lyihianyi na wanduwo nyi shiku ihana kimu na makumi hatanu na mfungade na mahana haṟandaṟu (157,600). Kamba lya Dani lyechiwa lyifurumi bendeṟa kui bendera.”
32Iwo nyiwo Waisraeli waleitalo lihianyi na mba tsawo, makambinyi hawo, na iitala lyawo wose nyi shiku mahana haṟandaṟu na shiraṟu, mahana hatanu na makumi hatanu (603,550).
33Kyaindi Walewi waleitalio kiidi kya wandu wa Waisraelipfo, chandu Ruwa Mwitoṟi alewawasa Mose.
34Nyi wudo, Waisraeli walewuta orio kindo Mndumii-Ruwa alewawasa Mose. Wakawika makambi hawo, chandu bendeṟa tsawo tsii na iira kyaṟo orio umu kaitumana na kishari kyake na wa mba yake.
Currently Selected:
MAITALA 2: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
