WALEWI 3
3
Shidaso sha ofoṟo
1Na shiinengo shake kokoya nyi mwano fo ofoṟo kokoya naiinenga kui mmbe, pung'a ang'u taho nechilekia iyo njiheṟemtsu ilawode tewe oshangunyi lo Mndumii-Ruwa. 2Nao nechihekia owoko loke o mdohu fo mmbe yo aiilekia, na imshinjia o mongo fo ihema lyesanzia; na wana wa Aroni, Wakohanyi wo, wechiolia samu yakyo alya rasionyi njora tsose. 3Nao nechisembeṟa kidasokyo kya ofoṟo, odambiko lo Mndumii lochiwuto kui njia ya modo, onga lushikie ndeu na mafuda hose hai ndewunyi, 4na shiho tsake tsiwi na mafuda hawodanyi natso, hai kufui na kitsi, na onga lo kii dimenyi, handu hamu na shihotso; isho shose nechishiwutapfo. 5Na wana wa Aroni wechishirumatsia modonyi huya rasio na modo, huye ya kidaso kemaya modonyi, kii huya ngu tsii modonyi; nyi odambiko losembeṟia kui njia ya modo opfaamo luchihiṟie Mndumii-Ruwa.
6Na shindo shake shelekia mwano fo ofoṟo nechishinjia Mndumii, kokoya nyi sha mfiṟihenyi fo machondi; masuwa ang'u nyi ha kika, nechilekia ikyo kii kiheṟemtsu. 7Kalekia ihuṟuwi lyiwe kiano kyake, nlyondi echiinenga Mndumii-Ruwa; 8nao nechihekia owoko loke huya mdo folyo ilyo lyaendo, na ilishinjia oo mongo fo ihema lesanzia. Na wana wa Aroni wechiolia samu yalyo alya rasionyi njora tsose. 9Nao nechisembeṟa kidaso kyo kya ofoṟo rasionyi lya Mndumii-Ruwa, kechiwiko kui njia ya modo; mafuda halyo, na mhasi folyo fui mafuda fose, nechifuwutaho kui ifudumbuoho oo kufui na fuo lya mhongo; na onga lo na mafuda ha ndewunyi, 10na shiho tsalyo tsiwi, na mafuda hawodanyi natso, hai kufui na kitsi kyalyo, na kiwelewele kii dimenyi, handu hamu na shihotso; isho shose nechishiwutapfo. 11Nao mkohanyi nechishirumatsa na modo huya rasio; nyi kelio kya odambiko lotikiria Mndumii-Ruwa, kui njia ya modo.
12Na wuleki woke, kokoya nyi mburu, nlyondi echiiende oshangunyi lo Mndumii; 13Nao nechihekia owoko loke mdohu foyo, na imshinjia oo osehu lo ihema lyesanzia; na wana wa Aroni wechiolya samu yayo rasionyi njora tsose. 14Nao nechisembeṟia kiidi kya kidasokyo wuleki woke, odambiko ko Mndumii kui njia ya modo; ke onga lushikie mawula, na mafuda hose ha ndewunyi, 15na shiho tsayo tsiwi na kiwelewele kii dimenyi handu hamu na shihotso tsiwi; isho shose nechiwutaho. 16Nao mkohanyi nechishirumatsa modonyi huya rasio; nyi kelya kya odambiko losembeṟia kui njia ya modo, luwe opfaamo luchihiṟie; mafuda hose nyi ha Mndumii. 17Idedolyi lechiwa iwawaso lya mlungana, ipfo shisharinyi shanu shose, kiidi kya mba tsanu tsose, ke mochilya mafuda manya samu manyalepfo.
Currently Selected:
WALEWI 3: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.