WALEWI 4
4
Mwano fo wunyamaṟi ulakusirie
1Mndumii kadeda na Mose, kambia, 2“Dedang'u na wana wa Waisraeli, nowawie, kokoya mndu awuta wunyamaṟi alakusirie, kiidi kya idedo lyo lyose Mndumii aliikimbie lyilawuto, na iwuta idedo lyo lyose lya madedoho; 3kokoya mkohanyi mshimbuo kawuta wunyamaṟi kaendie wandu mti; nalekie kipfa kya wunyamaṟi woke alewuuta pung'a ntutu njiamtsu nasembeṟie Mndumii iwe mwano fo wunyamaṟi. 4Nao nechiende pung'a yo naiwike alya mongo fo ihema lesanzia oshangunyi lo Mndumii; nao nechehekia owoko loke huya mdo fo pung'a yo, na iishinjia oshangunyi lo Mndumii. 5Numa mkohanyi cho amshimbuo nechiduo samu njiangu ya mmbe yo, naende na ipfo mba ya ihemalyo lyekusanzia. 6Mkohanyi nawike kimnyo kyake ipfo samunyi naolye samuyo ka mfungade oshangunyi lo Mndumii-Ruwa. 7Numa mkohanyi nawike samu njiangu huya ndumba tsa rasio ledutsia uvumba wucha oshangunyi lo Mndumii, likeri ihemenyi lyekusanzia; numa samu yo ingi yose ya ipung'alyo nechiipusuya wanda o shi ya rasio ya kidaso kemaya modonyi, likeri mongonyi fo ihema lekusanzia. 8Na mafuda hose ha ipung'alyo lya kidaso kya wunyamaṟi nechihawutapfo; mafuda hose ha onga, na mafuda hose ha ndewunyi, 9na shiho tsayo tsiwi, na mafuda hawodanyi natso, hai kufui na kitsi kyayo; na kiwelewele kii dimenyi, handu hamu na shihotso, isho shose nechishiwutapfo, 10na chandu shilewewuto kiidi kya mmbe tsileshinjo tsa shidaso sha ofoṟo; numa mkuhanyicho naharumatsie huya rasio lya kidaso kemaya modonyi. 11Numa njonyi ya ipung'alyo, na nyama tsalyo tsose, handu hamu na mdo folyo, na masasio hayo, na ndewu yayo, na mṟa foyo, 12kyamba, pung'ayo yose nechiiduo nja ya mṟi tane handu hecha, oo handu wekepusuya mafu, nao nechiikoṟa modonyi huya ngu; yechikoṟo na modo oo handu wekepusuya mafu.
13“Na kokoya mamiingi fose fo Waisraeli fowuta wunyamaṟi, na kindo kyo kilamanyike mesonyi ha kisanziokyo, nawo walewuta kindo kimuho kya shilya Mndumii aikimbie shilawuto, nawo wamekuwonyia mti; 14ili wunyamaṟi wo wochimanyika ke womewuto, nlyondi mamiingifo wechilekia pung'a njikoho iwe kidaso kya wunyamaṟi waiende sumhana na ihema lesanzia. 15Numa wameku wa mamiingifo wahekie mawoko hawo mdohu fo pung'ayo oshangunyi lo Mndumii, 16numa pung'a ishinjo oshangunyi lo Mndumii. Nahong'u mkohanyi amshimbuo nechiira samu njiangu ya pung'a yo naiitse na ihemenyi lesanzia; 17numa mkohanyi nakape kimnyo kyake ipfo samunyi, naolie oshangunyi lo Mndumii, sumhana na isulialyo ka mfungade. 18Numa samu ingi naiwike ndumbenyi tsa rasio lii oshangunyi lo Mndumii liliwike ipfo ihemenyi lesanzia, numa samuyo yose naipusuye wanda shia rasio lya kidaso kemaya modonyi, lii o mongo fo ihema lyesanzia. 19Numa naire mafuda hayo hose naharumatsie oo rasionyi. 20Nyi wudo echiwutia ipungali chandu alewutia pung'a ya kidaso kya wunyamaṟi na wudo echiwutia ipung'ali, nao mkohanyi nechiwawikia kisanza, nawo wechihoorio. 21Numa naduo ipungalyo nja ya mfiṟiha, naikoṟe na modo daa chandu alekoṟa iya ya kuwoka; nyi kidaso kya wunyamaṟi kipfa kya mamiingi.
22“Ilyi mchili echiwuta wunyamaṟi, kawuta alakusirie idedolyo lyose kiidi kya iho Mndumii-Ruwa oke, aikimbie halawuto, na nawonyio mti; 23kamanyishio wunyamaṟi wo woke alewuuta, nechiende kioṟo kiheṟemtu kiwe mwano foke, 24numa nahekie owoko loke mdohu fo kioṟokyo, na ikishinjia alya handu wekeshinjia kidaso kemaya modonyi oshangunyi lo Mndumii; nyi kidaso kya wunyamaṟi. 25Numa mkohanyi nechiira samuyo ya kidaso kya wunayamaṟi na kimnyo kyake naiwike ndumbenyi tsa rasio lya kidaso kemaya modonyi; na samuyo yakyo naipusuye oo shia rasio lya kidaso kemaya modonyi. 26Na mafuda hakyo hose naharumatsie oo rasionyi, chandu alerumatsa mafuda ha shidasosho sha ofoṟo; nao mkohanyi nechimbikia kisanza kipfa kya wunyamaṟi woke; nao nechihoṟio.
27 “Na mndu oose kiidi kya wandu wa orukenyi kawuta wunyamari alakusirie; kawuta idedolyo lyose kiidi kya isho Mndumii aimie shilawuto, nao nakuwonyia mti; 28nao kamanyisho wunyamaṟi wo woke alewuta nlyondo echiende mburu suwana njiheṟemtsu iwe mwano foke kipfa kya wunyamari woke alewuta. 29Nao nahekie owoko loke mdohu fo mwanofo fo wunyamaṟi na ishinja kidasokyo kya wunyamaṟi oo handu ha kidaso kemaya modonyi. 30Naho mkohanyi naire samuyo yakyo na kimnyo kyake, naiwike ndumbenyi tsa rasio lya kidaso kemaya modonyi, na samu yakyo yose naipusye shia rasio. 31Numa naire mafuda hakyo hose, chandu mafuda halya halewuto kiidi kya shidaso shilya sha ofoṟo; numa mkohanyi naharumatsie alya rasionyi, kiwe opfamo luchihiṟie Mndumii; na mkohanyi nawike kisanza kipfa kyake nao nechihooṟio.
32“Nao kaende ichondi litutu lya kidaso kya wunayamaṟi, nechiende huṟuwi liheṟemtsu. 33Nao nahekie owoko loke mdohu fo kidasokyo kya wunyamaṟi, numa namshinje nawe kidaso kya wunyamaṟi, oo handu wekeshinjia kidaso kemaya modonyi. 34Numa mkohanyi naire samu ya kidasokyo kya wunayamaṟi kemaya modonyi na kimnyo kyake nawike ndumbenyi tsa rasio lya kidaso kemaya modonyi, numa napusuye wanda samu yatsuhaa yose shia rasio. 35Numa naire mafuda halyo hose, chandu mafuda ha ihuṟuwi hekewuto kiidi kya kidaso kya ofoṟo; naho mkohanyi naharumatsie rasionyi huya kidaso kekoṟa, kui chandu kiwari shidaso sha Mndumii shileseheṟio modonyi, na mkohanyi nechiwika kisanza kipfa kya wunyamaṟi woke alewuuta, nao nechihoṟio.”
Currently Selected:
WALEWI 4: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.