Seemthawhnak 24
24
Isaak leh Rebekah Nupa cannak
1Abraham cu a hraam, a kum a upa ngai vel; Bawipa ni izongza ah a thluasuah. 2Abraham ni a tungsau, a innsang ih upatleng, a ngeihmi zate zokhentu cu, “Na kut ka phei tangah sia hnik la, 3van leh vulei ih Pathian Bawipa min saalin, ka tiapa ih nupi dingah an lakih ka omnak Kanaan mipawl ih tianule sungin i lo’n, 4ka ram leh ka hrihrai hemah tat hratin, ka tiapa Isaak ca’h nupi pi dingah thu ka tan khaamsak thok,” tiah a ti. 5A hemom ni, “Numinu ni hi ram laah ma zulh daw lo pang sela teh; na tiapa cu na suahnak ram ah maw ka kirpi ṭhan lei?” tiah a ti. 6Abraham ni, “Ka tiapa cu acuna’h kirpi hrimhrim hlah law. 7Bawipa, vancung Pathian, ka pa ih inn leh ka suahnak ram in a ma pita tu, cun ka hemah ang in, ‘Na ciitlang hemah hi ram hi ka tan ṭhen hngai thok,’ tiah thu a ma khaam tu, ni na hmalaah a vanmi thlah lei khawh, acunang cun ka tiapa ca’h nupi na la thok. 8Numinu ni tan zulh a dawt lo zong a’cun, hi ka thukhaam hin na luat thok; ka tiapa hi acuna’h na kirpi ṭhan thok lo ceu hi a ii,” tiah a ti. 9Curuangah a tungsau pa ni a kut cu Abraham ih phei tangah a sia ih ahi thuhla ah a hemah siat a sir.
10Cuhnukah a tungsau ni a bawipa ih kalauk pahra lain a pok, a bawipa ih laksawngpawl a phun zate kimin a kengta hngai; cun Aram-naharaim ram, Nahor ih khua ah a tat. 11Khuapi pawnla ih tikhur hrialah a kalaukpawl a bawhsak hngai; acui caan cu siimlari, numile tikhaai ih an phat khuk a ii. 12Culeh, “Maw Bawipa, ka bawipa Abraham ih Pathian, nihinni a’hin hluhsuahnak ma pia hram la ka bawipa Abraham hemah a hmunmi dawtnak lansak hram. 13Hinang cirhti hrama’hin ka diingkau ih khua sungin lengtiale tikhaai dingah an pha thok. 14A hemah, ‘Na ti uum cu ka din dingah ma pia hnik,’ ka tiih, ‘Ding kau, cun na kalaukle ti ka tul hngai thok’ a ti tu ding cu—na tungsau Isaak ca-ih na rilciami nu i hram seh. Ahi thawnghin ka bawipa hemah a hmunmi dawtnak na lansak ti ka tiah thok,” tiah a ti.
15A aan uh hlanah, Abraham ih naupa Nahor caah a nupi Milkah ni a hrinmi tiapa Bethuel ih hrinmi tianu Rebekah cu, a liang parah a ti uum puttia in a pha. 16Lengtianu cu zoh mawi ngaimi, lenghriim, ahuhman ih metpi rih lo mi a ii. A zong ṭum ih, a ti uum khat in ti a than hnukah a hang suak. 17Cutikah tungsau pa cu zuangin, ‘Na ti uum in ti tlawmte ma dinsak hram tu hmen’ tiah a ti. 18“Ding kau ka bawipa,’ tiah a ti uum cu a kut ah zon ṭhum in ti cu a tul. 19Ti a tulh uh hnukah, “Na kalaukle khaw ti an din uh hlansung ti ka khaai piak hngai thok,” tiah a ti. 20Curuangah a ti uum ih ti cu sumhnam tidinnak kuang ahcun a bung ih ti than dingah tikhur ah a zuang sei, cun a kalauk zate caah ti a khaai piak. 21Mipa ni a khualtlon Bawipa ih a hluhsuahsak leh sak lo tiah dingah daitein a zoh ciahco.
22Kalaukle tidin an uh tikah, mipa ni shekel hrek tlai hnaarthen leh a baan caah shekel pahnih tlai sui nguun a la, 23culeh, “Ahu ih tianu na ik ma sim hnik. Zan caam nakding na pa ih inn ah khaan om tur im?” tiah a ti. 24Lengtianu ni, “Nahor ca’h Milkah ni a hrinmi Bethuel ih tianu ka ii,” tiah a ti. 25“Tiangcangzi leh ta raw tampi, cun zan caam nakding hmun khaw kan ngei,” tiah a beeng. 26Mipa cu a lu kuum in Bawipa a bia ih, 27“Ka bawipa Abraham ih Pathian, ka bawipa parah a hmunmi dawtnak leh zumtlaknak a palhtia lo tu Bawipa cu thangṭhat i kau seh. Kei ngai hi maw Bawipa ni ka bawipa ih sungkhat inn laah ka lam thlur a ma hruai,” tiah a ti.
28Cutikah lengtianu cu zuangin ahi thilpawl ih thuhla cu a nu ih innsang a sim hngai. 29-30Rebekah ni a min ah Laban a imi ṭapa a ngei; culeh Laban ni hnaarthen leh a tarnu kut parih nguun a hmuh hnuk, cun a tarnu Rebekah ni, “Acuticun mipa ni a ma ti,” tiah a aanmi a zak hnuk caang mipa hem, tikhur ahcun a zuang; mipa cu acunang, tikhur ih a kalaukle hrialahcun a diingkau. 31Laban ni, “Maw, Bawipai’ thluasuah mipa, lut law. Ituruangah innkhaan leh kalaukle ca-ih hmun ka rem lioah pawnla ah cu na diingkau?” tiah a ti. 32Curuangah mipa cu inn sungah a lut; culeh Laban ni kalaukle cu an thil a ṭhum piak hngai, tiancangzi leh tarawpawl, amah rum a tat tu mile ih ke ṭawl nakding ti, tipawl a pia hngai. 33Cuhnukah a awk dingin caw khaw zalh piak in a hmakaah a hlun; ihmansela ani ni, “Ka phat hnawhsanmi ka simngah hlansung cu ka aw thok lo,” tiah a ti. Laban ni, “Ang kau tu,” tiah a ti.
34Curuangah, “Kei cu Abraham ih tungsau ka ii. 35Bawipa ni ka bawipa cu a thluasuah vuai ih mingei a cang; turun leh merunpawl, cawrunpawl, sui leh ngun, numi salpawl leh pami salpawl, kalaukpawl leh laakpawl a pia hngai. 36Culeh ka bawipa ih nupi Sarah ni a hraamla ah tiapa a hrin ih ka bawipa ni a tiapa cu a ngeihmi zate a pia. 37Ka bawipa ni, ‘An ram ih ka omnak Kanaan mipawl sungin ka tiapa ca’h nupi na la thok lo; 38ka pa ih innsang, ka hrihrai hemah tatin ka tiapa nu na piit thok,’ ti’n thu a ma khaamsak. 39Kei ni ka bawipa cu, ‘Numinu ni ma zul hlah pang sela teh?’ tiah ka ti. 40Ihmansela ani ni ‘A hmaika ih ka nunmi Bawipa ni a vanmi cu nang rum thlah lei khawh na hluhsuah kau thok. Ka hrihrai ka pa ih innsang hemin ka tiapa ca’h nupi na ngah piak kau thok. 41Cutikah, ka hrihrai hem na phat tikah, ka thukhaam in na luat thok; numinu an tan piak thok lo hman ah ka thukhaam in tal cu na luat kau lei a ii’ tiah a ma ti.
42“Nihinni ah cirh a’hin ka pha ih, ‘Maw Bawipa, ka bawipa Abraham ih Pathian, atu ih ka tah nak lam hi ma hluhsuahsak hram. 43Hinangahhin cirhti hrialah ka diingkau; tikhaai dingin a pha tu numi, a hemah, “Na ti uum in tidin awk tlawmte ma pia hnik tu hmen,” ka tiih, 44ka hemah, “Ding kau tu, cun na kalaukle ca’h khaw ti ka khaai thok,” tiah a ma ti tu—amah cu Bawipa ni ka bawipa ih tiapa ca’h a ril rom mi minu i hram seh,’ tiah ka ti.
45“Ka thinlung sungih acu ka aan uh hlanah, Rebekah cu a liang parah a ti uum rum tikhaai dingin a pha; culeh cirh a’cun a ṭum ih ti a khaai. Kei ni, “Naktiahte’n ti ding lang maw’ tiah ka ti. 46Ani ni a ti uum cu a liang in a zon ṭhum lohliih, ‘Ding tu la, cun na kalaukle khaw ti ka tul hngai thok,’ tiah a ti. Curuangah ti cu ka ding ih ani ni khaw kalaukle ti a tul hngai. 47Cutikah, ‘Ahu ih tianu ii ci maw?’ tiah ka dil. Ani ni, ‘Milkah ni Nahor a hrinmi a tiapa Bethuel ih tianu ka ii’ a ma ti. Curuangah a hnaar parah hnaarthen ka thenih a baan baan ah baan naal ka khuah. 48Cuhnukah ka lu kuum in Bawipa ka bia, cun ka bawipa Abraham ih Pathian, ka bawipa ih tiapa ca’h a sungkhat pa hemin a tianu cu nupi ca’h ngah dingin lam hmaan ih a ma hruaitu Bawipa cu ka thangṭhat. 49Ka bawipa parah felte leh hmaante’n na ti thok leh thok lo ma sim kau, cuticun vorhla ah maw, kehla ah maw a pial taw ing,” tiah a ti. 50Cutikah Laban leh Bethuel ni, “Hi thil hi cu Bawipa hemin a pha; keimi ni cu a sia a ik ah a ṭha a ik ah kan ang kho lo. 51Zoh hman, Rebekah cu na hmaikaah a om kovawh, pita la tat kau, cun Bawipa ih ti mangin na bawipa ih tiapa ih nupi i kau seh,” tiah an let.
52Abraham ih tungsau ni an aanka a zak tikah Bawipa hmaiahcun vulei ah a kuum. 53Culeh tungsau ni ngun leh sui thilmankhung, partlaipawl a suah hngai ih Rebekah cu a pia; a ṭapa leh a nu khaw thilmankhung a ṭhen hngai. 54Cutikah amah leh mah rum a tat tu mipawl cu an aw ih an ding, cun acunang ahcun zan an caam. A zingla an thawh tikah, “Ka bawipa hemah ma thlah ṭhan hram,” tiah a ti. 55A ṭapa leh a nu ni, “Lengtianu cu kan hemah tawilio, ni hra tluk maw, taang rih duau sela; cuhnukah a tat leh lei cu,” tiah an ti. 56Ihmansela ani ni, “Hlawh ma leen sak tlawi men sawh hlah uh, ka Bawipa ni ka khualtlon a hluhsuahsak rom ruangah, ka bawipa hemah tat dingin ma tahsak kau uh,” tiah a ti hngai. 57Anmimi ni, “Lengtianu ko le hu khawh kan dil lei cu,” tiah an ti. 58Culeh Rebekah cu an ko ih, “Hi pa rum tat khat lei cu’m?” tiah an ti. Ani ni, “Ka tat lei,” tiah a ti hngai. 59Curuangah an tarnu Rebekah leh amah a tuamhlawmtu nu cu Abraham ih tungsau leh a milaipawl rum an thlah. 60Culeh Rebekah cu thluasuah in,
“Nang, kan tarnu cu
mi thawng tampi ih nu cang hram law;
Na ciitlangle cu an ralle ih
khuapipawl neh hram u se law,” tiah an ti.
61Cutikah Rebekah leh a hemomle cu an tho ih kalauk parah kai in mipa cu an zul; culeh tungsau ni Rebekah cu pitain a lam cu a tat.
62Isaak cu Beer-lahai-roi in a pha ih Negeb ah omhmun a khuar. 63Isaak cu siimlari ah lam a leng ih khua zoh na ah kalaukpawl an phat a hmu hngai. 64Culeh Rebekah ni khua a zoh ih Isaak a hmuh tikah kalauk parin a tholhtia lohliih 65tungsau pa cu, “Khinangih mipa, kanmah man tuak dingih lam a leng tu cu ahu a ii?” tiah a ti. Tungsau ni, “Ka bawipa cu a ii,” tiah a ti. Curuangah a hmaikhum lain a khumtia. 66Culeh tungsau ni Isaak cu a thiltimi a zate a sim remro. 67Cutikah Isaak ni a nu Sarah ih puanthlaam ah Rebekah cu a luhpi. Rebekah cu a la ih a nupi ah a cang. Culeh Isaak ni a daw vuai. Curuangah a nu thih hnukah Isaak cu Rebekah ni a hneem.
Currently Selected:
Seemthawhnak 24: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
