Johan 13

Kaizulle Ke A Ṭawl

1Lontaak Puai hlanah Jesuh ni hi vuleipi matain Pa hemih tat dingah a caan a pha rom ti a tiah. Hi vulei ih ommi a mipawl a dawt hngai ringring rom mangin a net tiang a daw hngai. 2Simon Iskariot ih tiapa Judas ih thinlung sungah Jesuh leirawi ding ruahnak a san cia rom. Culeh zanriah an awk lioah, 3Jesuh ni a kut sungah izongza Pa ih piak rom leh, Pathian hemin a pha ih Pathian hemih a tah vel thok a tiahtiak ruangah, 4Cabuai in a tho ih a angki pawnthuah tual phoihtia in a tai ah puanleng a ngerhtia. 5Cuhnukah hmaihum#13:5 Kuak hnempi. pakhat sungah ti buur in a kaizulle ih kepawl a ṭawl hngai ih, a tai ih a ngerhmi puanleng in a hnawt hngai. 6Simon Piter hem a phat tikah Piter ni, “Bawipa, nang ni maw ka ke a ma ṭawl lei?” tiah a ti. 7Jesuh ni, “Itu ka ti rero ti hi atu cu na tiah rih lo, a i na’n hnukah tiahthiam leh lei ci,” tiah a ti. 8Piter ni, “Nang ni ka ke cu ma ṭawl pang hlah law,” tiah a ti. Jesuh ni, “Tan ṭawl hlah taw’ng ah kei rum ṭomtiak awk na ngei lo,” tiah a sawn. 9Simon Piter ni, “Bawipa, ka ke ceu iloin ka kut leh ka lu khaw ma ṭawl lawlaw tu!” tiah a ti. 10Jesuh ni, “A kholtia rommi cu a ke simlo ṭawl a ṭul lo, a mipun in a thiang. Culeh nangmi cu nan thiang kau, nan zate ngai cu nan thiang lo na’n,” tiah a ti. 11Icatile ahu ni amah a leirawi thok ti a tiah; curuangah, “Nan zate ngai cu nan thiang lo,” a tinak a ii. 12An ke a ṭawl hngai hnukah, a angkitual a khop ṭhan, cun cabuai ah a kirṭhan, “Nan parih ka vuakmi tiah cu im? 13Nangmi ni Zirhtu leh Bawipa tiah a ma ko hngai – nan hmaan kau, icatile acu cu ka ii. 14Curuangah kei, nan Bawipa leh Zirhtu ni nan ke ka tan ṭawl hngai a’cun, nangmi ni khaw pakhat leh pakhat ih ke nan ṭawl piak tiak awk a ii. 15Icatile nan hemih ka vuak mangin nan vuak ve awkah zohṭhimawk ka tan pia hngai rom. 16Thungaiin ka tan sim hngai, salle cu an bawi vanin an hnemsawn lo; tirhthlahle khaw a thlah hngai tu van an hnemsawn lo. 17Hi thilpawl hi nan tiah ih, nan nunpi a’cun mithluasuak nan ii. 18Nan zate ih thu ka ang lo; ahule ka ril hngai ti cu ka tiahkau. Ihmansela, “Ka caw a aw tu cu ma ralsanin a tawbong a hlir rom,”#Saam 41:9. timi Lai Thianghlim kimsak dingah a ii. 19Atu hihi a can hlanah ka tan sim hngai, cuticun thil a can ngaingai tikah Kei cu Kei ka ik a zum taw cu. 20Thungaiin ka tan sim hngai, ka thlah mi a cosang tupoh ni a ma cosang; cun a ma cosang tupoh ni a ma thlah tu a cosang,” tiah a ti hngai.

An Leirawi thok Simcianak

(Mat 26:21-25; Mar 14:18-19; Luk 22:21-23)

21Ahihi a sim hnukah Jesuh cu a sivangngaiin, “Thungaiin ka tan sim hngai, nan lakih pakhat ni a ma leirawi thok,” tiah a than. 22Kaizulle cu ahu tisan nala ti in pakhat leh pakhat an zoh tia. 23A kaizulle lakih pakhat – Jesuh ih dawt mipa – cu Jesuh sontu ah a to. 24Jesuh ni ahu a tisan ti dil dingah Simon Piter ni acu pa cu a tehthawi in a sim. 25Curuangah Jesuh hnaih ah kiangdeuh in, “Bawipa, ahu a ii?” tiah a dil. 26Jesuh ni, “Hi sang seu hi kuak sungah ka hnimngah hnukih ka piak mipa a ii,” tiah a sawn. Curuangah sang seu cu a hnimngah tikah Simon Iskariot ih tiapa Judas a pia. 27Sang seu a co hnukah Satan a sungah a lut. Jesuh ni, “Na ti thokmi cu ti vakvak tu hmen,” tiah a ti. 28Cabuai ih caw uumtu pakhat ni khaw Judas hemah icaah ahiti in a sim ti an tiah lo. 29Judas cu tlaang tangkadip kiltu a ik ruangah Jesuh ni, “Puai ca-ih kan ṭulmi lei hngai,” a tinak a i thok; iklole mifarah itu maw ṭhen hngai a torh rua ti in mi hrekkhat ni cu an ruat. 30Curuangah sang seu a co hnukah Judas cu pawnla ah a suak vohvi. Acu cu zan a ii.

Thupiak Thar

31Judas a suahngah in Jesuh ni, “Atu cu Mi Tiapa hi sunparsak a i rom ih, Pathian cu amah sungah sunparsak a ii. 32Pathian cu amah sungah sunparsak a ik a’cun Pathian ni amah sung hrimhrim ah Mi Tiapa a sunparsak ve thok ih a sunparsak cop thok. 33Tiale hngai, nanmah rum caangkhat ceu ka om duau rih thok. Nangmi ni a ma hrawl hngai thok; culeh Judah thungeitule, ‘Ka tah nak thok ah nan pha kho lo’ tiah ka simtaak hngai mangin atu hi ka tan ti hngai. 34Pakhat leh pakhat daw tia dingah thupiak thar ka tan pia hngai. Ka tan dawt hngai mangin, nangmi khaw pakhat leh pakhat daw tia mawi nan ii. 35Pakhat leh pakhat nan dawt tiak a’cun ahi thawngin micang ni ka kaizul nan ik an tan tiah thok,” tiah a ti.

Piter ih Pheh thok Simcianak

36Simon Piter ni, “Bawipa, khawnangah na tat thok?” tiah a ti. Jesuh ni, “Ka tah nak thok ah atu nang ni a ma zul zolo, a i na’n hi hnukah na zul leh kau thok,” tiah a sawn. 37Piter ni, “Bawipa ica’h hmen atu ka tan zulh khawh lo? Na ca’h ka nunnak ka liam thok henaah,” tiah a ti. 38Jesuh ni, “Ka ca’h na nunnak maw na liam lei? Thungaiin ka tan sim, ar khuan hlanah voi thum a ma pheh rom thok,” tiah a sawn.

Currently Selected:

Johan 13: KHBF

Highlight

Copy