Johan 14

Pa hem Phatnak Lam

1“Nan thinhar hlah seh. Pathian zum u la, kei khaw ma zum uh. 2Ka Pa ih inn sungah omnak hmun tlungpi an om. Nan ca’h hmun tuahsi dingah ka tat thok. Acuti’n i hlah sela nan ca’h hmun tuahsi dingah ka tat thok tiah ka tan sim ta hngai thok hmen maw? 3Culeh, tatin nan ca’h hmun ka tuahsiit a’cun, ka omnak ih nan om ve nakdingah ka pha ṭhan thok ih ka hemah ka tan la hngai thok. 4Ka tah nak thok hmun vahnak lam cu nan tiah kau,” tiah Jesuh ni a ti hngai. 5Thomas ni, “Bawipa, khawnangih na tah thok tal kan tiah lo. Khawtiin a lam cu kan tiah thok hmen?” tiah a ti. 6Jesuh ni, “Kei cu lam, thutak leh nunnak ka ii. Kamah thawngin simlo ahuhman Pa hem a pha zo lo. 7Ma tiah u la cu ka Pa khaw tiah hngen tur cu! Atu hin cu amah nan tiah in nan hmu rom,” tiah a ti. 8Filip ni, “Bawipa, Pa cu man hmuh la kan lung kim tur ee,” tiah a ti. 9Jesuh ni, “Filip aw, ahi hlet liangluang nan hemah ka om rom na’n a ma tiah rih lo maw? A ma hmu rom tupoh ni cu Pa an hmu rom. Khawti’n, ‘Pa cu man hmuh’ na ti thiam? 10Kei hi Pa sungah ka om ih, Pa cu ka sungah a om ti hi na zum lo maw? Nan hemih ka aanmi aankapawl hi kamah thu in ka ang hngai lo; ka sungih a om tu Pa ni amah ih rian a ṭuan. 11Kei hi Pa sungah ka om ih Pa cu kamah sungah a om ti hi zum uh; a i nain nan zum lo a’cun ka thiltipawl ruang tal ah cu ma zum uh. 12Thungaiin ka tan sim hngai, kamah a ma zum tu ni cu ka vuakmi thilpawl a vua ve thok ih, Pa hemih ka tah thok ruangah hipawl van pipasawnmi hman a vua thok. 13Pa cu Tiapa sungah sunparsak a ik nakdingah ka min in nan dilmi poh ka tan vuak piak hngai thok. 14Ka min in thil pakhatkhat, nan dil a’cun, ka vua kau thok.

Thiang Thlarau Tiamnak

15“A ma dawt hngai a’cun, ka thupiakpawl nan zul thok. 16Culeh Pa hemah ka dil lei ih, nanmah hemih kumkhua om dingah Khunsatu #14:16 Khunsatu ti cu ompi ringring tu: bawntu, hneemtu, thaap iatu, ṭanpitu, zokhentu timi a huap. pace a tan pia hngai thok. 17Ahihi vulei mi ni cu an hmuh lo leh an tiah lo ruangih an co khawh lo mi thutak Thlarau a ii. Nangmi ni tu cu, nan hemah a hmun ih, nan sungih a om thok ruangah nan tiah. 18“Ngakṭah in ka tan mata hngai thok lo; ka tan pha hngai sei thok. 19Ii hlet hlanah vulei mi ni cu amah hmu hngai ti thok lo, a i nain, nangmi ni cu a ma hmu hngai kau thok; ka nun ruangah nan nung ve thok. 20Cui ni a’cun kei cu Pa sungih ka om, cun nangmi cu ka sungih nan om leh kei nan sungih ka om nan tiah leh thok. 21Ka thupiakpawl ngei ih zul hngai tu mipawl cu a ma daw tu mipawl an ii; culeh a ma daw tu mipawl cu ka Pa ni a daw hngai thok, cun kei ni daw hngai in an hemah ka phuanglang tia thok,” tiah a ti. 22Judas (Iskariot a i lo mi) ni, “Bawipa, vulei mi hemah cu iloin kan hemih na phuanlan tiak thok cu khawtiin a ii?” tiah a ti. 23Jesuh ni, “A ma daw tu mipawl ni ka thu an zul thok, culeh ka Pa ni a daw hngai thok ih an hemah kan pha thok, cun an hemah hmun kan khuar thok. 24A ma daw lo tupoh ni cu ka thupawl an zul lo. Ka aan nan zakmi hi kamah ih a i lo, a ma thlah tu Pa hemin a ii. 25“Hi thilpawl hi nan hem ka om rih lioah ka ang hngai. 26A i na’n Khunsatu pace, Thiang Thlarau, Pa ni ka can-ai ih a thlah thokmi ni cu izongza a tan zirh hngai lei ih, nan hemih ka sim taakmi hmawhhmawh a tan phirphuak#14:26 Phirphuak cu Phualphuak ti kan om, vonmangṭhan ih vuaktican a ii. hngai thok. 27Nangamnak ka tan matta hngai; ka nangamnak ka tan pia hngai. Vulei mi ih piak mangin ka tan pia hngai lo. Nan sivang hlah uh; cun hrul hlah uh. 28‘Ka tat mianmi thok, cun ka tan pha hngai thok’ tiah nan hemah ti in a ma za hngai. A ma dawt hngai a’cun, Pa cu kei van a hnemsawn ruangah Pa hem ka tah thok cu nan tha a nuam thok. 29A can tikih nan zum nakdingah ahihi a can hlan atu-ah ka tan sim hngai rom. 30Thu tampi ka tan thluk hngai ti thok lo, icatile hi vuleipi uktu a pha lio. Ka parah cu thu a ngei zo lo; 31a i na’n vulei mi ni Pa ka daw ti an tiah nakdingah Pa ni thu a ma piak mangin ka vua. Tho uh, hi hmun hin tat le hu,” tiah a sawn.

Currently Selected:

Johan 14: KHBF

Highlight

Copy