Johan 16

1“Nan zumnak nan zamtaak lo nakdingah hi thilpawl hi ka tan sim hngai. 2Sinakok in an tan ṭhawl thok. Nanmah tan that tu mipawl ni acuti an ti cu Pathian rian rero ah an ruah tiak caan pha leh lei. 3cun, Pa iseh, kamah iseh, a man tiah lo ruangah ahihi an ti thok. 4A i na’n nan hemah hi thilpawl ka sim, cuticun an caan a phat tikah anmah ih thuhla ka tan sim ta hngai ti a cingkeng taw cu.

Thiang Thlarau Rianṭuan

5“A pek in nan hemih hi thilpawl ka sim lo cu nan hemih ka omtaak ruangah a ii. A i nain atu cu a ma thlah tu hemah ka tat thok; a i nain ahuhman ni, ‘Khawnangah na tat thok hmen?’ tiah a ma dil hngai lo. 6A i nain hi thilpawl nan hemih ka sim ruangah nan thinlung cu ngaihsiatnak in nan khat. 7Amahbelte, thungai ka tan sim hngai: ka tah mianmi hi nan ṭhathnemnak ca’h a ii, icatile ka tah mianmi lo a’cun nan hemah Khunsatu a pha thok lo. A i nain ka tah a’cun nan hemah amah ka thlah thok. 8Culeh a phat tikah vulei mipawl hi sualnak, dingnak leh thuṭhennak thu ah an palh ti a lansak thok. 9Sualnak thu a’cun, a ma zum hngai lo ruangah; 10dingnak thu a’cun, Pa hem ka tat thok ih nangmi ni a ma hmuh hngai ti thok lo ruangah; 11thuṭhennak thu a’cun, hi vuleipi uktu cu sual thuṭhen piak a ik rom ruangah. 12“Nan hemih sim awk tlungpi ka ngei hngai rih, a i nain atu cu nan phur zolo. 13Thutak Thlarau pha taw zong ah, thutak zate ah tan hruai hngai leh lei; icatile amah ih thu in a ang thok lo, a zakmi itupoh a ang thok, cun a pha leimi thilpawl nan hemah a than thok. 14Kamah ih ta la hratin nan hemih a simthan thok ruangah a ma sunparsak thok. 15Pa ih ngeihmi hmawh cu kamah ih a ii. Ahi ruangah kovawh kamah ih ta la hratin nan hemah a simthan thok ka ti nak cu.

Ngaihsiatnak cu Lungawinak ah

16“Ii hlet hlanah nangmi ni a ma hmu hngai ti thok lo, cun ii hlet hlanah a ma hmu hngai sei thok,” tiah a sawn. 17Cutikah a kaizulle hrekkhat cu pakhat leh pakhat, “ ‘Ii hlet hlanah nangmi ni a ma hmu hngai ti thok lo, cun ii hlet hlan sei ah a ma hmu hngai thok;’ culeh ‘Pa hem ka tah thok ruangah’ a man ti hi itu a tican i na la?” tiah an ti tia. 18“ ‘Ii hlet hlanah’ a ti dawtnak itu i na? Itu thu a sim ti tiah hlah hu ee,” an ti. 19Jesuh ni amah an dil dawt cu a tiah, curuangah, “Ii hlet hlanah nangmi ni a ma hmu hngai ti thok lo, cun ii hlet hlan sei ah a ma hmu hngai thok’ ka ti tikih ka tidawtmi itu a ik nan thluktia rero hetuhmen? 20Thungaiin ka tan sim hngai, nangmi cu nan ngaihsia in nan ṭap thok, vulei mi zong cu an tha a nuam thok; titiak nan tuar thok, a i na’n nan titiak cu lungawinak ah a cang thok. 21Numi pakhat cu a nausanpiak tiah caan ni a tlun a’cun amah ih caan a phat ruangah titiak a tuar. A i na’n a nau a suah tika’cun, vulei cungah minung pakhat a suahngah ruangah lungawi in a titiak a palhtia. 22Curuangah atu cu nan ngaih a sia; a i nain ka tan tuak hngai ṭhan thok ih nan thin a nuam thok, cun ahuhman ni nan lungawinak cu an tan sut zo thok lo. 23Cui ni a’cun nangmi ni itu thu hman a ma dil hngai ti thok lo. Thungaiin ka tan sim hngai, Pa hemah ka min in itumaw nan dilmi cu a tan pia hngai kau thok. 24Atu tiang cu ka min in ituhman nan dil rih lo. Dil u la nan ngah thok, cuticun nan lungawinak a kim taw.

Kaizulle ca-ih Nangamnak

25“Hi thilpawl hi nan hemah sawhce-ngeimi hmangin ka sim. Nan hemah sawhcengei in ang loin, Pa ih thu fiangte-ih ka tan sim hngai caan pha leh lei. 26Cui ni a’cun ka min in dil leh lei cu, Nan can-ai ah Pa hemah ka dil thok ka tan ti hngai lo; 27icatile nangmi ni a ma daw hngai ih, a hemin ka pha ti nan zum ruangah Pa amah rori ni a tan daw hngai. 28Pa hemin vuleipi ah ka pha; vuleipi matain Pa hemah ka tat sei thok,” tiah a ti hngai. 29A kaizulle ni, “A ii, atu hi sawhce ngeimi hmang loin fiangtein na ang pan. 30Atu hi thil zate na tiah hngai ti kan tiah, cun pakhatkhat ni thu tan dil na ṭul lo; ahi thawngin Pathian hemin na pha ti kan zum,” tiah an ti. 31Jesuh ni, “Atu hi nan zum maw? 32Mah le inn vek panin nan parcak ih, kamah ceu a ma mattaak hngai caan pha leh lei, a ngaingai a’cun a pha rom la. A i nain Pa ni a ma ompi ruangah kamah ceu cu ka i lo. 33Kamah sungah nangamnak nan ngeih nakdingah ahihi ka tan sim hngai. Vuleipi a’hin hartuarnak nan tuak. A i na’n tha la uh; vuleipi ka neh rom!” tiah a sawn hngai.

Currently Selected:

Johan 16: KHBF

Highlight

Copy