Johan 18

Jesuh Leirawi Leh Ponnak

(Mat 26:47-56; Mar 14:43-52; Luk 22:47-53)

1Jesuh ni ahipawl ang hngai in thla a cam hnukah Kidron thlawng an tan ih, duum pakhat omnak hmun ah an lut. 2Jesuh cu a kaizulle rum acunangih an tuahtiak bil ruangah, amah leirawitu Judas ni khaw cui hmun cu a tiah. 3Curuangah Judas ni ralkapbuur khat leh, tlangbawi upapawl leh Farisipawl hemin biakinn kiltu palikle a pita hngai ih, mei-inn, datmei leh hriamhreipawl rum an pha. 4Cutikah Jesuh cu a parih cang thokmi zate a tiah ruangah, hmaiah suakin, “Ahu he maw nan hrawl?” tiah a dil hngai. 5Anmimi ni, “Nazareth khuami Jesuh,” tiah an sawn. Jesuh ni, “Kei hi amah cu ka ii,” tiah a sawn hngai. Amah leirawitu Judas cu an hemah a diing. 6Jesuh ni, “Kei hi amah cu ka ii,” a ti hngai tikah dung an tolh ih khur ah an ngal. 7“Ahu he maw nan hrawl?” tiah a dil hngai ṭhan. Culeh anmimi ni, “Nazareth khuami Jesuh,” tiah an sawn. 8Jesuh ni, “Kei hi amah cu ka ii tiah ka tan sim hngai rom hin. Curuangah a ma hrawl i taw cu ah hile hi cu thlah uh,” tiah a sawn hngai. 9Ahihi, “Nang ni a ma piak mi pakhat hman ka tlaubaansak hngai lo,” tiah a aanmi thu kimsak dingah a ii. 10Cutikah, Simon Piter, ralreen a ngeitu ni a ralreen cu a phawi, tlangbawipa ih sal cu a thawi, cun a vorhla na ṭotkau a set. 11Jesuh ni Piter cu, “Na ralreen cu a kawng sungah thun ṭhan. Pa ih ma tulh mi hai cu ka ding thok lo hmen maw?” tiah a ti.

Tlangbawi Saang Hmaiah

12Curuangah ralkaple, an bawipa leh Judah palikle ni Jesuh cu pon-in hreng an khuah. 13Peitatleng ah acui kum ih Tlangbawi Saang a imi Kaiafas ih nupi ih pa Annas hemah an tahpi. 14Kaiafas cu mipi caah mi pakhat thih a ṭhasawn ti in Judah thungeitule ruahnak pia hngai tu khi a ii.

Piter ih Phehnak

(Mat 26:69-75; Mar 14:66-72; Luk 22:54-62)

15Simon Piter leh kaizul pace ni Jesuh cu a dung an zul. Acui kaizul cu Tlangbawi Saang ih mitiah a ik ruangah a tuallai tiang Jesuh rum an tat. 16A i nain Piter cu pawnla, kotka hramah a diing. Curuangah Tlangbawi Saang ih mitiah dungzul pace cu va suakin, kotka kiltu numi a bia ih Piter cu a luhsak. 17Numinu ni Piter cu, “Nang khaw hi pa ih dungzul pakhat na i ve lo hena im?” tiah a ti. Piter ni, “Ka i lo ee,” tiah a ti. 18Ii a sih ruangah salpawl leh palikpawl ni meiril in mei an tikih a velkim in an ai. Piter khaw an hemah diingin mei a ai ve.

Tlangbawi Saang ih Thudilnak

19Tlangbawi Saang ni Jesuh cu a kaizulle thu leh a thuzirhmi thu a dil. 20Jesuh ni, “Vulei mipawl hemah langhnganin ka ang rom hin; Judah mipawl zate an von tumtiak nak sinakok leh Biakinn sungah thu hmawh zirh cua ing ee. A thup leh thli in ituhman ka sim tal lo. 21Ica’h maw a ma dil hngai? An hemih ka simmi a za tu mipawl dil tu hmen uh; ka simmi an tiah kau hin,” tiah a sawn hngai. 22Acuti a ti tikah a hrialih ding tu palik pakhat ni Jesuh cu a hmai beeng in, “Ahihi Tlangbawi Saang na leh daan cu a i maw?” tiah a ti. 23Jesuh ni, “A sualin ang taw ing ah a sualmi cu lansakin sim tu hmen. A i na’n a hmaan in ka aan a’cun ica’h a ma beeng?” tiah a ti. 24Cutikah Annas ni amah cu hreng khuah in Tlangbawi Saang Kaiafas hemah a kuat.

Piter ih Pheh ṭhannak

25Simon Piter cu dingin a emtia lio. “Nang hi a kaizulle lakih pakhat na i lo hena im?” tiah an dil. Acu cu a pheh ih, “Ka i lo,” tiah a ti. 26Tlangbawi Saang ih salle lakih pakhat; Piter ni a na ṭotkau a seh mipa ih sungkhat ni, “Duum sungah Jesuh rum ka tan hmu hngai lo hmen maw?” tiah a ti. 27Piter ni a pheh ṭhan ih, acui caan te ahcun ar a khuang.

Jesuh cu Pilat Hmaiah

(Mat 27:1-2, 11-14; Mar 15:1-5; Luk 23:1-5)

28Cuhnukah Jesuh cu Kaiafas hemin Mangki Pilat ih thurelnak zung inn ah an tahpi. Acu cu mawpan te ah a ii. Anmah ngaai cu, dotlalo#18:28 Rai thianglo tican. ik hrel ding leh Lontaak puai caw aw kho dingah zung sung cu an lut lo. 29Curuangah Pilat cu va suakin, “Hi pa ralsanin itu sualpuhnak a ii nan kentaak?” tiah a ti hngai. 30Anmimi ni, “Hi pa hi thitlak misual i hlah sela na hemah ap rua tur hu im?” tiah an sawn. 31Pilat ni, “Nanmahte pitain nan daan mangin a thu ṭhen tu hmen uh,” tiah a ti hngai. Judah mipawl ni, “Keimi hmawh mi pakhatkhat thah sen ka i lopi,” tiah an let. 32Ahihi Jesuh ni itu thihnak phun in a thih thok a lansakmi kimngah dingah a ii. 33Cutikah Pilat cu zung ah a lut ṭhan, Jesuh cu a ko ih, “Nang hi Judah Siangphahrang na ii maw?” tiah a dil. Jesuh ni, “Ahihi namahte in a ma dil maw? Iklole pakhatkhat ni ka thuhla an tan sim maw?” tiah a sawn. 34Pilat ni, “Kei cu Judah mi ka i hmen maw? Na miphun leh tlangbawi upale ni nang hi a ma ap hngai. Itu ti ta hmen ci?” tiah a let. 35Jesuh ni, “Ka uknak hmawh hi vulei ih ta a i lopi; Ka uknak cu hi vuleipi ih ta i sela cu kamah hi Judah thungeitule hemih ap i lo dingah ka kaizulle ni do hngen tur uh. A i nain a iknak mangin cu, ka uknak cu hi vulei ih ta a i lo,” tiah a sawn. 36Pilat ni, “Siangphahrang cu na i kau ti?” tiah a dil. Jesuh ni, “Siangphahrang ka ik cu nang ni na ti hin. Thutak diinpi dingah minung in suakin, ahi caah hi vuleipi ahhin ka pha. Thutak ah a om tu mipoh ni cu ka aw an ngai bil,” tiah a sawn. 37Pilat ni, “Thutak cu itu a i hmen?” tiah a dil.

Jesuh Thah ding Thusahnak

(Mat 27:15-31; Mar 15:6-20; Luk 23:13-25)

38Ahihi a sim hnukah Judah mipawl hemah va suak ṭhanin, “Amah sual puh awk ka hmu lo. 39A i nain Lontaak Puai caan ah thawngtla pakhat ka tan thlahpiak hngaimi daan nan ngei tak kovawh. Judah Siangphahrang tan thlahpiak hngai ning la nan daw maw?” tiah a ti hngai. 40An lehṭhannak ah, “Hi pa cu iloin, Barabbas tu ii seh,” tiah an au. Barabbas cu rokhmang a ita.

Currently Selected:

Johan 18: KHBF

Highlight

Copy