Johan 20

Jesuh Thawhṭhannak

(Mat 28:1-10; Mar 16:1-8; Luk 24:1-12)

1Zarh khat ih ni peitatleng mawpan, khua a mawt rih lioah, Mari Magdalene cu thlaan ah a pha ih, thlaan khar lung cu thawntia rom in a hmu. 2Curuangah Simon Piter leh Jesuh ih dawtmi kaizul pace hemah zuangin, “Bawipa cu thlaan in an thiar rom ih khawnangih an siah cu kan tiah lo,” tiah a ti hngai. 3Cutikah Piter leh kaizul pace cu poksuakin thlaan laah an tat. 4An pahnih an zuang khat, ihmansela kaizul pace ni Piter cu a lon ih thlaan a pha peita. 5A sung zoh dingah a kuum ih ruak zawlnak sianglaraang puannem cu acunangah omkau in a hmu, ihmansela, thlaan sung cu a lut lo. 6Cuhnukah Simon Piter ni a dung in a pha ih, thlaan sungah a lut. Ruak zawlnak puannem acunangih a omkau leh, 7Jesuh lu an zelhnak puan cu a ruak zawlnak puan hemah omloin, amah ceu zawltia in a om ti a hmu. 8Cutikah, thlaan a pha peita tu kaizul pace khaw thlaan sungah a lut ve, culeh a hmu ih a zum. 9Icatile mithi lakin a tho thok timi Lai Thianghlim cu an tiahthiam rih lo. 10Cuhnukah kaizulle cu an inn ah an ṭiin.

Magdalene hemih Lannak

11Ihmansela Mari cu thlaan pawnla ah dingin a ṭap berbo. A ṭahthah ah thlaan sung zoh dingin a kuum; 12culeh vanmi pahnih puan raang sintia in, Jesuh ih ruak an thlim nak ahcun, a lula ah pakhat, a ke laah pakhat, toin a hmu hngai. 13Vanmile ni Mari cu, “Minu, ica’h na ṭap rero?” tiah an ti. Ani ni, “Ka Bawipa an thiarta mianmiih, khawnangih an siah ka tiah lo,” tiah a ti hngai. 14Acuti a ti hnukah a mertia ih, Jesuh cu acunangah diingin a hmu, ihmansela Jesuh a ik a tiah lo. 15Jesuh ni, “Minu, ica’h na ṭap rero? Ahu a ii na hrawl?” tiah a ti. Duumkiltu ah ruatin, “Sayapa, nang ni a ruak na la ta i taw ah na siahnak ma sim la, cun kei ni ka la mianmi thok,” tiah a ti. 16Jesuh ni, “Mari,” tiah a ko. Mari ni mertia in, Hebru aan in, “Rabbouni,” tiah a ti (acu cu Zirhtu tican a i). 17Jesuh ni, “Pa hem ka kai rih lo ruangah ma tlai berbo hlah. Ka unaule hemah tatin, ‘Ka Pa leh an Pa, ka Pathian leh an Pathian hemah ka tat thok tiah a ti’ ti’n sim hngai tu,” tiah a ti. 18Mari Magdalene cu tatin kaizulle cu, “Bawipa ka hmu rom,” tiah a than; culeh hi thupawl hi Jesuh ni a hemah a ang hngai ti a sim hngai.

Kaizulle hemih Lannak

(Luk 24:36-43; 1Kor 15:5)

19Zarh khat ih ni peitatleng siimlari, Judah thungeitule ṭih ruangih kaizulle ni an tuahtiaknak inn sangka an kharmi ah, Jesuh cu a pha ih, an lakah diingin, “Nan hemah nangamnak om seh,” tiah a ti hngai. 20Ahihi a aan hnukah a kut leh a nak a hmuh hngai. Kaizulle cu Bawipa an hmuh tikah an lung a awi vuai. 21Jesuh ni, “Nan hemah nangamnak om kau seh. Pa ni a ma thlah mangin, kei khaw ka tan thlah hngai,” tiah a ti hngai ṭhan. 22Ahihi a sim uh tikah an parah a hmut hngai ih, “Thiang Thlarau co uh. 23Ahumaw ih sualnakpawl nan ngaidam a’cun ngaidam an ii; ahumaw ih sualnakpawl nan tlaihtaan a’cun ngaidam lo an ii,” tiah a ti hngai.

Jesuh leh Thomas

24Ihmansela Thomas (Miphiir tiih kawh taak mi), Hleihnihle lakih pakhat, cu Jesuh a phat ah a om ve lo. 25Curuangah kaizul pace ni, “Bawipa kan hmu rom hekhawh,” tiah an sim. Ihmansela, “A kut an khennak maphe hmuin ka kutzung in ka tham lo leh, ka kut in a nak ka tham lo a’cun ka zum thok lo,” tiah a ti hngai. 26Zarh khat hnukah a kaizulle cu inn sungah an om ṭhan ih Thomas a om ve. Sangkapawl cu an kharkau nain, Jesuh a pha ih, an lakah diingin, “Nan hemah nangamnak om seh,” tiah a ti hngai. 27Cuhnukah Thomas cu, “Na kutzung cu hinangah sia la ka kut hi zoh hngai. Na kut suah la ka nak ma tham hnik. Zum loin om hlah, zum vel,” tiah a ti. 28Thomas ni, “Ka Bawipa leh ka Pathian!” tiah a sawn. 29Jesuh ni, “A ma hmuh ruangah maw a ma zum? Hmuhngah naloin a zum tu cu mithluasuak an ii,” tiah a ti.

Hi Laibu ih Tintahmi

30Hi laibu sungih a ngan tia lomi a pace donharṭha khithmuhnakpawl tlungpi Jesuh ni a kaizulle hmuhhngan ah a vuata hngai. 31Ihmansela hipawl hi ngan an ik cu Jesuh hi Messiah, Pathian Tiapa, a ii ti nan zumih, nan zumnak thawngin amah ih min ah nun nan ngeih nakdingah a ii.

Currently Selected:

Johan 20: KHBF

Highlight

Copy