Johan 7
7
A Naule ih Zumlonak
1Ahi hnukah Jesuh cu Galilee ramṭhen sung a tlawn niarno. Judah mipawl ni amah that dingin caanṭha an hrawl ruangah Judah ramṭhen sung cu tlon a daw lo. 2Atu cu Judah mipawl ih Puanthlaam Puai a nai vel. 3Curuangah a naule ni, “Hinang hi matain Judea laah tat la, na ṭuan reromi rianpawl na kaizulle ni khaw a hmu ve taw uh, 4icatile zapi tiah ik a daw tu ahuhman ni a thuptein an tekcak lo. Ahi thilpawl na vuak ceng ahcun namah leh mah vulei mi hmuhsak tia hngai lawlaw,” tiah an ti. 5(Icatile a naule hman ni amah an zum lo.) 6Jesuh ni, “Ka caan a pha rih lopi, nan caan zong cu om cua hngen. 7Vulei mi ni an tan hua thiamlo, a i na’n kei ni cu an rianṭuan a ṭhalo ti’h ka sim ruangah a ma hua hngai. 8Puai ah cu nanmahte tat uh. Kei cu hi puai ah ka tat thok lo, icatile ka caan a pha rih lo,” tiah a ti hngai. 9Ahihi a sim hnukah Galilee ah a taangta.
Jesuh Puanthlaam Puai ah
10Ihmansela puai ah a naule an tah hnukahcun ani khaw a tat ve, a i nain langhngan tuk iloin a thup deuh in a tat. 11Judah mi ni puai ah amah an hrawl rero ih, “Khawnangah ahi?” tiah an ti. 12Culeh mibuur lakah amah ih thuhla ah phuntlawhnak a om hnuaihni. A hrekkhat ni, “Ani cu miṭha a i kau,” an ti lioah a pacepawl ni, “I hlah e, mipi a deu hngai hekhawh,” an ti. 13Ihmansela Judah mipawl ṭih ah ahuhman ni langhnganin amah thu an ang lo. 14Puai sanlai hrawng ah Jesuh cu biakinn ah tatin thuzirh a thawh. 15Judah mipawl cu an donharin, “Ahu ih zirh i thah lopi in khawti’n hi pa ni ahiti’n thu a tiah a he?” an ti. 16Cutikah Jesuh ni, “Ka thuzirhmi cu kamah ih a i lo, a ma thlah tu ih a ii. 17Pathian dawtzawng vuak ding a ruatcat tu ni cu ka zirhmi hi Pathian hemin a ik leh kamah thuthu in ka aan a ik a tiah kau thok. 18Mah ih thuthu in a ang tu mipawl ni cu anmah ih sunlawinak an hrawl, a i nain amah a thlah tu ih sunlawinak a hrawl tu cu a hmaan, culeh a sungah a palhmi ituhman a om lo. 19Moses ni Daan a tan pia ta hngai a i lo maw? A i na’n ahuhman ni nan zul tal lo. Ica’h ma thah nakding caanṭha cu nan hrawl rero?” tiah a sawn hngai. 20Mibuur ni, “Khawsia na ngei! Ahu ni tan thah a khaai ah?” tiah an sawn. 21Jesuh ni, “Thil pakhat vua ing khawh nan zate nan don a har. 22Moses ni phawzim ṭhawhnak thu a tan pia hngai (Moses hemin iloin nan pupale hemin a i deuh), culeh Sabbath ni ah pami tepang pakhat a phawzim nan ṭhot. 23Moses ih Daan buar lo dingah tiah pami tepang pakhat Sabbath ni ah a phawzim nan ṭhawh a’cun, Sabbath ni ah mi pakhat ih ruangpun zate ka damsak ruangah maw a ma thinsiat hngai? 24Pawnla ih langmi parin thuṭhen loin, thuṭhen hmaan in ṭhen tu hmen uh,” tiah a sawn hngai.
Hihi maw Messiah?
25Jerusalem in mi hrekkhat ni, “Hi pa hi thah an khaihmi pa cu a i lo maw? 26Hinangah hmawh omin langhnganin hman thu sim ee, a i nain a hemah ii tal an sim lo! Thungeitule ni hihi Messiah a ik an tiah ngaingai teh i thiam na im? 27Hi pa cu khawnang in a ik kan tiah ṭung hin; Messiah a phat tikah ahuhman ni khawnang in a ik an tiah thok lopi,” tiah an ti. 28Cutikah Jesuh ni biakinn sungih thu a zirhthah ah, “Nangmi ni a ma tiah hngai, cun khawnang in ka ik khaw nan tiah. Kamah ih thu in ka pha lo. a ma thlah tu cu a hmaan, a i na’n amah cu nan tiah lo. 29Kei ni cu, amah hemin ka ik ruang leh a ma thlah ruangah amah ka tiah,” tiah a au. 30Cutikah amah pon an khaai, ihmansela amah ih caan a phat rih lo ruangah ahuhman ni a parah kut an thlah lo. 31Ihmansela mibuur sungin mi tlungpi ni amah an zumih, “Messiah a phat tikah hi pa ih vuak rommi van tlungsawn in hmuhsaknak vua leng lei im?” tiah an ti.
Jesuh Pon dingih Mi Thlahnak
32Mipi ni Jesuh thuhla acumang an aan rilrial cu Farisile ni an za, culeh tlangbawi upapawl leh Farasipawl ni amah pon dingah biakinn kiltu palikle an thlah. 33Jesuh ni, “Caangkhat sung ceu ka tan ompi hngai rih thok ih, cuhnukah a ma thlah tu hemah ka tat thok. 34Nangmi ni a ma hrawl hngai thok, a i nain a ma hmu hngai thok lo; culeh ka omnak ah nan pha kho thok lo,” tiah a ti hngai. 35Judah mipawl cu pakhat leh pakhat, “Kan hmuh thok lonak khawnangah a tah khaai a he? Grik mipawl lakih mivaicale hemah tatin Grik mipawl thu a zirh hngai khaai he tur im? 36‘Nangmi ni a ma hrawl hngai thok nain a ma hmu hngai thok lo,’ ti leh, ‘Ka omnak ah nan pha kho thok lo’ a ti cu itu a tidawtmi i na?” tiah an ti tia.
Nunnak Piatu Ti nung Thlawngpawl
37Puai ni netatleng, puaipi ni ah, Jesuh ni diingin, “Ti a haal mi ahukhaw ma pha seh, 38cun a ma zumtu ni ti cu ding seh. Lai Thianghlim ih ti mangin, ‘Zumtu ih thinlung sungin nunnak piatu thlawng ti a luang thok,’ ” tiah tiakpiin a au. 39Ahihi amah a zumtupawl ih co thokmi Thlarau thu a sim; icatile Jesuh cu sunparsak a ik rih lo ruangah Thlarau cu piak a i rih lo.
Mipi Ṭhentiaknak
40Acui aan cu an zak tikah mibuur lakih a hrekkhat ni, “Hihi profet ngaingai a ii,” tiah an ti. 41Mipace ni, “Hihi cu Messiah a ii,” an ti. Ihmansela a hrekkhat ni, “Messiah cu Galilee in maw a suah lei? 42Lai Thianghlim ni Messiah cu David ih ciitlang ii khawh, David omnak Bethlehem ah a suak thok a ti lo hmen maw?” tiah an ti. 43Curuangah mibuur lakahcun Jesuh ruangah ṭhentiaknak a om. 44Mi hrekkhat ni cu amah pon an daw, ihmansela ahuhman ni a parah kut an thlah lo.
Thungeitule ih Zumlonak
45Cutikah biakinn kiltu palikle cu tlangbawi upapawl leh Farasipawl hemah an kirṭhan, “Ica’h nan ponta lo?” tiah an tila. 46Palikle ni, “Ahuhman ni hi pa mangin an ang thah lopi!” tiah an sawn. 47Cutikah Farisile ni, “Nanmah khaw a tan deuhngah hngai kau lo maw? 48Thungeitule lakin iklole Farisile lakin ahu ni amah zum thah hmen uh? 49A i nain Moses ih Daan a tiah lo tu hi mibuur sawh hi cu Pathian ih aansia tuak nihmawh,” tiah an sawn. 50Hlanah Jesuh hemih a tatta tu leh anmah lakih pakhat a i ve mi Nikodimas ni, “Kan daan ni mi pakhat cu a thilvuakmi tiahngah dingah a thusim za pei loin sualthuṭhen keel na kau im?” tiah a dil hngai. 51Anmimi ni, 52“Nang khaw Galilee in na i ve kau lo maw? Lai Thianghlim zingzoi la Galilee in profet pakhat khaw a suak thah lo ti cu na hmu kau thok,” tiah an sawn.
Pariim lio ih Pon Minu
53Cutikah mi hmawhhmawh cu an inn vek ah an ṭiin.
Currently Selected:
Johan 7: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
