Johan 8

1Ihmansela Jesuh cu Oliv tlang ah a kai. 2A zingla mawpan cu Biakinn ah a tat ṭhan. Mi hmawhhmawh ni an pha, cun a to ih thuzirh hngai a thawh. 3Daanzirhtupawl leh Farisipawl ni pa a riim lio ih an pon mi numi pakhat an pita; an zate ih hmalaah diinsak hratin, 4Jesuh cu, “Zirhtupa, hi nu ni pa a riim lio rori ah pon a ii. 5Daan sungah Moses ni acumang numi cu lung in phon dingah thu a man pia #Tlang 20:10; Daan 22:22. Nang teh itu sim ding ngei ci?” tiah an ti. 6Ahiti an ti hi amah sual an puh khawh nakding ca-ih thangtunmi a ii. Jesuh cu kuum in khur parah a kutzung in lai a ngan. 7Amah cu thu an dil berbo ruangah, han dangtia in, “Nanmah lakih sualnak ngeilo tu pakhatkhat cu ahi nu lung ih phon peitleng tu ii seh,” tiah a ti hngai. 8Culeh kuum ṭhanin khur parah lai a ngan ṭhan. 9Acu an zak tikah, a upapa in thawh in pakhat hnuk pakhat ciikpaakin an zuang; culeh Jesuh cu amah ceu a taang, a hmalaah minu cu a diing. 10Jesuh ni han dangtia in, “Minu, khaw an hi? Ahuhman ni sualthu an tan ṭhen lo maw?” tiah a ti. 11Minu ni, “Ahuhman ni ṭhen piak hlah, Bawipa,” tiah a ti. Culeh Jesuh ni, “Kei ni khaw sualthu ka tan ṭhen cuang lo. Tlung tia la, atu hnuk cu sual ṭhan ti zong hlah,” tiah a ti.

Jesuh Vulei Ceunak

12Jesuh ni Farisile bia hngai ṭhanin, “Kei hi vuleipi ih ceunak ka ii. A ma zul tupoh khuamaw lakah an vak dah thok lo, nun ceunak tu an ngei thok,” tiah a ti. 13Cutikah Farisile ni, “Nang hmawh namah ih thuhla namah ni na ang tia kovawh, na aanmi a hmaanlo,” tiah an ti. 14Jesuh ni, “Kamah ih thuhla kamah can ih ka aan hman ah ka aanmi cu a hmaankau, icatile khawnang in ka pha ih khawnangah ka tah thok ka tiah. A i na’n nangmi ni cu khawnang in ka phat leh khawnangah ka tah thok nan tiah lo. 15Nangmi ni cu minung thisa daan te in thu nan ṭhen; kei cu ahuhman thu ka ṭhen lo. 16A i nain thu ka ṭhen hman ah, ka thuṭhen cu a hmaan; icatile thuṭhentu cu kei ceu ka i lo, kei leh a ma thlah tu Pa kan ii. 17Nan Daan sungah, ‘mi pahnih ih thutiahpimi cu a hmaan’#Daan 19:15. tiah ngan a ii. 18Kei ni kamah canah ka thu ka diinpi, cun a ma thlah tu Pa ni ka canah ka thu a ang,” tiah a sawn hngai. 19Cutikah anmimi ni, “Khaw hi na Pa cu?” tiah an ti. Jesuh ni, “Nangmi hmawh kei a ma tiah hngai taktaai lopi, ka Pa khaw nan tiah lo. Kei ma tiah u la cu ka Pa khaw tiah hngen tur cu,” tiah a ti hngai. 20Hi aankapawl hi biakinn ahlu kuang siahnak hmun ih thu a zirh lioah a ang hngai, ihmansela amah ih tikcu a phat rih lo ruangah ahuhman ni an pon lo.

A Thih Thok A Simcia

21An hemah, “Kei cu ka tat mianmi thok ih, nangmi ni a ma hrawl hngai thok. A i na’n nan sualnak nan thihpi thok. Ka tah nak thok cu nangmi nan pha kholo,” tiah a ti hngai ṭhan. 22Cutikah Judah mipawl ni, “A that tia thok he tur im? Acu cu, ‘Ka tah nak thok cu nangmi nan pha kholo’ a tidawtmi maw a ik?” tiah an ti. 23Jesuh ni, “Nangmi cu tangla mi nan ii ih, kei cu cungla mi ka ii, nangmi cu hi vuleipi ih ta nan ii, kei cu hi vuleipi ih ta ka i lo. 24Nan sualnak nan thihpi thok ka tan ti hngai khi, icatile Kei ka ik a ma zum hngai lo a’cun nan sualnak nan thihpi kau thok,” tiah a ti hngai. 25Anmimi ni amah cu, “Ahu na ii?” tiah an ti. Jesuh ni, “A hramthawh in ka tan sim hngaimi khi ka ii. 26Nan thuhla aan awk tampi leh sualthu tan ṭhen hngai awk tampi ka ngei; a i na’n a ma thlah tu cu a hmaan ih, a hemin ka zakmi cu hi vuleipi ah ka than,” tiah a ti hngai. 27Pa ih thu a sim hngai rero ti an tiahthiam lo. 28Curuangah Jesuh ni, “Mi Tiapa nan han thlai tikah Kei ka ik leh, kamah ih thu in ituhman ka ti lo, Pa ni a ma zirh mangin hipawl ka ang hngai, ti tiah leh lei cu. 29Culeh a ma thlah tu ni a ma ompi; a lunghmuinak ka vuak ringring ruangah kamah ceu a ma mata lo,” tiah a ti. 30Hipawl a sim ahhin mi tlungpi ni amah cu an zum.

Kaizul Taktak

31Cutikah Jesuh ni amah a zumtu Judah mipawl cu, “Ka thu mangih nan om peh a’cun, ka kaizulle taktak nan ii; 32culeh thutak nan tiah lei ih, thutak ni a tan luatsak hngai thok,” tiah a ti hngai. 33Anmimi ni, “Keimi cu Abraham ih hrinsarle ii hu khawh ahu ih sal hman ka i thah lopi. ‘Luatsak nan i thok’ na ti cu itu na tican a ii?” tiah an sawn. 34Jesuh ni, “Thungaiin ka tan sim hngai, sualnak a vua tupoh cu sual ih sal a ii. 35Sal cu innsang ah omnak riingreeng a ngei lo; tiapa zong cu acunangah hmun a ngei kumkhua. 36Curuangah Tiapa ni tan luatsak hngai taw ah nan luat ngaingai thok. 37Abraham ih hrinsarle nan ik cu ka tiahkau; a i nain nan sungah ka thu caah hmun om hlah khawh ma thah nak thok caanṭha nan hrawl. 38Kei cu ka Pa hemih ka hmuhmi ka than; nangmi cu nan pa hemin nan zakmi mangin nan vua,” tiah a sawn hngai.

Jesuh leh Abraham

39Anmimi ni, “Abraham kan pa a ii hekhawh,” tiah an sawn. Jesuh ni, “Abraham ih tiale ii u la cu, Abraham ih vuakmi vua hngen tur cu. 40A i nain atu cu Pathian hemin ka zakmi thutak a tan sim hngai tu pa kei hmawh ma thah khaai cu ee. Abraham ih vuakmi cu acu cu a i tal lo. 41Nangmi hmawh nan pa ih vuakmi nan vua pan kovawh,” tiah a ti hngai. Anmimi ni, “Keimi hmawh zultia#8:41 Ziltia ti khaw kan om. kan i lopi, Pa pakhat cu kan ngei, cucu amah Pathian a ii,” tiah an ti. 42Jesuh ni, “Pathian nan Pa ii sela cu ma daw hngen tur cu, icatile Pathian hemin ka pha ih atu hinangah ka om. Kamah ih thu in ka pha lo, amah ni a ma thlah. 43Ituruangah ka simmi nan tiahthiam lo? Ka thu nan cosan lo ruangah a ii. 44Nangmi cu nan pa khawsia hemin ii cu khawh nan pa ih dawtzawng vuak nan daw. Amah sungah thutak a om lo ruangah ani cu a pek te in mithat a ii ih thutak ah a diing lo. Thulo a puah tikah amah ih iknak mangin a ang, icatile ani cu thulo sim pa leh thulopawl ih pa a ii. 45A i nain kei cu thutak ka sim ruangah a ma zum hngai lo. 46Nan lakih ahu tleng a ii ka sualnak fiangte’n a lansak kho tu? Thutak ka sim ah, ituruangah a ma zum hngai lo? 47Pathian hemin a i tupoh ni cu Pathian aan an ngai. Nangmi nan ngaih lonak a ruang cu Pathian hemin nan ik lo hi a ii,” tiah a ti hngai. 48Judah mipawl ni, “Samariami na ii ih khawsia na ngei kan tan ti cu hmaan hu maw?” tiah an sawn. 49Jesuh ni, “Khawsia ka ngei lo; ka Pa tu ka upat, nangmi ni cu a ma upat hngai lo. 50Kamah ih sunlawinak ka hrawl lo; a hrawl tu pakhat a om ih amah cu thuṭhentu a ii. 51Thungaiin ka tan sim hngai, ka thu a zul tupoh cu thihnak a tuak dah thok lo,” tiah a sawn hngai. 52Judah mipawl ni, “Atu cu khawsia na ngeih kan tiah. Abraham cu a thi, profetpawl khaw an thi; a i nain nang ni cu, ‘Ka thu a zul tupoh cu thihnak a tuak dah thok lo’ na ti. 53Nang cu kan pa Abraham mithi van na pipasawn ah maw? Profetpawl le an thih ve ah. Ahu e na ti tia hmen?” tiah an ti. 54Jesuh ni, “Kamah ka sunparsak tiak a’cun ka sunparnak cu ii hman a i lo. A ma sunparsak tu cu ka Pa a ii, ani cu, ‘Amah hi kan Pathian a ii’ tiah 55nan tiah naloin nan timi cu a ii. a i na’n kei ni cu tiah hngen ing. Amah ka tiah lo ti thok ning la le nangmi mangin thulopuahtu ka i thok. A i na’n amah ka tiah ih a thu ka zul. 56Nan puhram Abraham cu ka phat a hmuh thok lakhlah in a lung a awi; a hmu ih a ngetia,” tiah a sawn hngai. 57Judah mipawl ni, “A nang kum sawmnga hman ti rih lo ni Abraham cu na hmu rom hmen maw?” tiah an ti. 58Jesuh ni, “Thungaiin ka tan sim hngai Abraham a omtaak hlanah Kei Ka ii,” tiah a ti hngai. 59Curuangah amah phon nakding lung an sar, ihmansela Jesuh cu a thuptia ih biakinn in a suak mianmi.

Currently Selected:

Johan 8: KHBF

Highlight

Copy