Luka 13
13
Sualrim maw Rawhral
1Aculio fangte ah an thisan leh an raihriiknak Pilat ni a cawhrawi piak hngai mi Galilee peng mipawl ih thu Jesuh a sim tu mi hrekkhat acunangah an om. 2Jesuh ni, “Hi Galilee pengmipawl ahiti’n an tuar ruangah Galilee mipace hmawhhmawh vanin an sualsawn tiah nan ruat maw? 3I hlah, ka tan sim hngai; nan sualrim hlah taw cu ah anmah mangin nan thi remro thok. 4Iklole Siloam hmun ih donhleisang ni a min non hngai ih a thi mi minung hleiriat teh Jerusalem ih a ommi mipace hmawhhmawh vanin an sualsawn tiah nan ruat maw? 5I hlah, ka tan sim hngai; nan sual nan rim lo a’cun anmah mangin nan thi remro thok,” tiah a ti hngai.
A Dimmi#13:6 Dim ti cu Vuang lo tican. Thei kung Thuṭhim
6Cuhnukah hi thuṭhim hi a sim hngai: “Mi pakhat ni a sabit duum ah thei kung pakhat a ling; a vuang hrawl dingih a phat tikah pun khat hman a hmu lo. 7Curuangah duumṭuantu cu, ‘Zoh hman! Kum thum sung hi thei kung hi a vuang hrawl ah ka pha bil, a i nain ituhman ka hmu rih lo. Hau tia! Ica’h leiram a luah tlawi rero thok?’ tiah a ti. 8Duumṭuantu ni, ‘Ka bawipa, a velkim khur saai in nawn ka burh hlansung, kum khat cu om rih kau seh. 9A khumvoi a vuan ahcun a ṭha; vuang hlah taw ah na hau zo kau,’ ” tiah a ti.
Kengkul Minu Damsaknak
10Sabbath ni ah Jesuh cu sinakok pakhat ah thu a zirh rero. 11Culeh acunangah thlarau sia pakhat ni kum hleiriat sung a keeng a kulhsakmi minu pakhat a suaklang. A kuum reuri ih dangtein a diing thiam lo. 12Jesuh ni a hmu, culeh koin, “Minu, na titiak in luatsak na ii,” tiah a ti. 13Acu nu parih a kut a suan tikah, acu nu cu dangin a diing lohliih Pathian a thangṭhat. 14Ihmansela sinakok uktu cu Jesuh ni sabbath ni ah mi a damsak ruangah a heh a har ih, mibuur cu, “Rianṭuan nakding ni ni ruk a om; sabbath ni ah iloin cui nipawl ah phain damsak ii la hete’n,” tiah a ti berbo. 15Ihmansela Bawipa ni a let ih, “Nangmi mitisaktiale! Nanmah vek teh, sabbath ni ah nan cawpe maw nan laak an cawkuang in a hri nan phoih ih ti tul dingah nan hruai lo hmen maw? 16Hi nu, Abraham ih tianu, Satan ni kum hleiriat sung liangluang a ṭeemṭawnmi hi, hi a ṭeemṭawnnak hin sabbath ni ah luatsak a mawi lo hmen maw?” tiah a ti. 17Hihi a sim tikah amah dokalhtule cu an mualpho; culeh mibuur zate tu cu a vuakmi donharṭha thilpawl ah an lung a awi.
Mumiang Cii Thuṭhim
(Mat 13:31-32)
18Curuangah, “Pathian uknak cu itumang a ii? Itu rum ka tahṭhim thok he hmen? 19Mi pakhat ni lain duum ih a tuhmi mumiang ci mang a ii; a hang hnem ih thingkung ah a cang, culeh vapawl ni a tlaang ṭeekpawl lakah bu an sep,” tiah a ti.
Colnu Thuṭhim
(Mat 13:33)
20Cun, “Pathian uknak cu itu rum ka tahṭhim thok? 21Numi pakhat ni sangvut duncia rel thum sungah colnu tlawmte ceu a phulh nain acu cu ni sangvut zate a hmawnsak mang a ii,” tiah a sim ṭhan.
Sangka Bi
(Mat 7:13-14)
22Jesuh cu Jerusalem la ih a tahthah ah khuapi leh khuate pakhat hnuk pakhat palpah in thu a zirh. 23Mi pakhat ni, “Bawipa, a tlawmte ceu run an i thok maw?” tiah a dil. Jesuh ni, 24“Sangka bi in luh zuamtia uh; icatile tlungpi ni an zuamtia thok nain an lut zo thok lo, tiah ka tan sim hngai. 25Innteek ni hang thoin sangka a khar hnuk cu, pawnla ah diingin sangka nan kiing ih, ‘Bawipa, sangka man hon hram’ nan ti tikah, a tan lehnak hngai ah, ‘Khawnang in nan phat ka tan tiah hngai lo’ a tan ti hngai thok. 26Cutikah nangmi ni, ‘Nanmah rum kan aw kan ding khat ih, zalam ah teh thu a man zirhta hin’ tiah nan ti thok. 27A i nain ani ni, ‘Khawnang in nan phat ka tan tiah hngai lo ee; ka hemin vak mianmi uh, nangmi thilṭhalo titu hmawhhmawh’ tiah a ti thok. 28Abraham, Isaak, Jakob leh profet hmawhhmawh Pathian uknak sungah hmuin, culeh nanmah rori tu cu pawnla ih hei zam nan ik tikah nan ṭap thok ih nan hacang nan rial thok. 29Cutikah mipawl cu vapinla leh vongpinla, sak leh thlang in an pha thok ih, Pathian uknak sungah an to thok. 30A ngaingai ah, a peitatleng a i tu ding mi hrekkhat cu a netatleng an ii, cun netatleng i tu ding mi hrekkhat cu a peitatleng an ii,” tiah a ti hngai.
Jerusalem Ṭahhla
(Mat 23:37-39)
31Acui caan liote ah Farisile hrekkhat phain Jesuh cu, “Hinang hin vak mianmi, icatile Herod ni tan thah a daw,” tiah an ti. 32Jesuh ni, ‘Tat u la acui sase cu sim uh, ‘Ngai hman, nihinni leh zingla ah khawsiale ṭhawl hngai in mitiak ka damsak, cun ani thumnak ah ka rianṭuan ka uuk thok. 33A i nain nihinni, zingla leh tip cu ka lam ka tat rih kau thok, icatile profet pakhat cu Jerusalem hnaar pawn ih thah tuah ding a cangkholomi a ii’ tiah a ti. 34Cun, Jerusalem, Jerusalem, profetpawl that hngai tu leh a hemih thlah mile lung in a phon hngai tu khualipi! Arpinu ni a suanle a thla tangih a huh hngai mangin na tiale khawm hngai ding ka dawt taak ṭiuṭeu zia cu, nang ni le daw ta hlah ci. 35Zoh hman, na inn cu na hemah mattaak a ii. Cun ka tan sim, ‘Bawipa ih min in a pha tu cu mithluasuak a ii’ na ti caan a phat hlansung a ma hmu ti thok lo,” tiah a ti.
Currently Selected:
Luka 13: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
