Luka 14
14
Mitiakthling Damsaknak
1Ṭum khat cu sabbath ni ah Farisile hruaitu pakhat ih inn ah caw zawh dingih a tah tikah a hrialte in an bawh langlang. 2Cutikah a hmalaah mitiakthling pakhat pa a om. 3Culeh Jesuh ni daanthiampawl leh Farasipawl cu, “Sabbath ni a’hin mi damsak phung ii maw i hlah?” tiah a dil hngai. 4Ihmansela an dai ṭhipṭhep. Curuangah Jesuh ni acu pa cu a pita ih a damsak, cun a thlah mianmi. 5Cuhnukah, “Nanmah lakih mi pakhatkhat a tia maw a cawpe maw sabbath ni ah tikhur sungah tla hnik sela suah loin om thok na cu im?” tiah a ti hngai. 6Acu cu an let zo lo.
Niamcuh leh Khualṭhat
7Sawmmipawl ni upa tonakpawl an ril ti a hmuhngah tikah: 8“Mi pakhat ni tuartiak puai ih a tan sawm tikah tonak ṭhatleng ah to hlah, na innteek ni namah vanin thupisawn pakhatkhat a sawm pang a’cun; 9nan pahnih an tan sawm tu innteek phain, ‘Na tonak amah pial law,’ a tan ti kho, cutikah mualpho in, tonak niamtleng ih toin na thawh a ṭul thok. 10Ihmansela sawm na ik tikah tonak niamtleng ah to la, cuticun na innteek a phat tikah, ‘Ka rual, a sangdeuh ah thawntia’ a tan tikho men; cutikah namah rum caw a uum khat tu zate omhngan ah sunloih na i thok. 11Icatile mah leh mah a hlortia tupoh cu ṭhum i lei u khawh, cun mah leh mah a ṭhumniamtia tupoh cu hlirsan an i thok,” timi thuṭhim pakhat a sim hngai. 12Amah a sawm tu hemah khaw, “Suncaw maw, zanriah maw na doh tikah, na rualpile maw, na unaule maw, na sungkhatpawl maw, iklole na innkiang milianpawl timang sawm hngai hlah, tan sawm ṭhan ve pang in rulhṭhan i lei-a ci. 13Acuvanin cu cawdoh na vuak tikah mirafah, mikimlo, kutke zeng, cun mitcaw tipawl sawm hngai. 14An tan rulh thok lo ruangah thluasuahmi na i thok; icatile midingle thawhṭhan tikah rulh na i leh thok,” tiah a sim.
Cawdoh Puai Pi Thuṭhim
(Mat 22:1-14)
15Zanriah zawhtule lakih pakhat ni ahihi a zak tikah Jesuh cu, “Pathian uknak sungah caw a aw thok tu cu mithluasuak a ii,” tiah a ti. 16Cutikah Jesuh ni, “Mi pakhat ni zanriah dohnak pipa a vua ih mi tlungpi a sawm hngai. 17Zanriah awk caan ahcun sawmmipawl cu, ‘Suak vel uh; izongza tiari a i vel’ tiah sim hngai dingah a sal a thlah. 18A i nain an zate ni sakhatin an phehrel vek. A peitatleng ni, ‘Loram ka lei rom ih va tatin ka zoh taak a ṭul; poi ka ti hi ma cosang hram’ tiah a ti. 19Mipace ni, ‘Caw kaap nga ka lei hngai ih ka zirh hngai thok; poi ka ti hi ma cosang hram’ tiah a ti. 20A pace ni, ‘Nu ka pi pek te ih curuangah ka suak thiam thok lo’ a ti. 21Curuangah sal cu kirṭhan in cui thu cu a bawipa a simṭhan. Cutikah inn ngeitu ni a hehhar in a sal hemah, ‘Tat vakvak lei ci khawh zalam leh inn lakkar lampawl ih mifarah, mikimlo, mitcaw leh kutke zeng tipawl hruaita hngai,’ tiah a ti. 22Culeh a sal ni, ‘Bawipa, na thupiak cu vuak a i rom, a i nain khaan a tlong rih’ tiah a ti. 23Cutikah a bawipa ni a sal cu, zalam leh inn lalak lampawl ah tat lei ci khawh ka inn khat dingah mipawl va hneek hngai. 24Icatile ka tan sim, sawmmi ahuhman ka zanriah an teh ngah thok lo,” tiah a ti.
Kaizul ik Man
(Mat 10:34-39)
25Mibuur pipi cu Jesuh rum khual an tlawn khat; culeh anmah sanla ah, 26“Ka hem ma pha hratin a pa leh nu, nupi leh tiale, ule naule, cun tarnule, a ii, amah i nunnak rori hman, a hua lo tupoh ka kaizul a i zolo. 27Ahuhman mah ih thinglamtah puin a ma zul lo tu cu ka kaizul a i zolo. 28Icatile nanmah lakah inn sangpi sak a khaaitia tu ni, uuk dingih a daih zet a ngeih leh ngeih lo tiah dawt ah to peitain a deng dingmi a ruatdam lo maw? 29Culocu a hram a thawh ngah laklawh ih a uh zo lo a’cun a hmu tu hmawhhmawh ni nihsan in, 30‘Hi pa cu inn sak thawh hratin a uuk zo tal lo’ tiah an ti thok hekhawh. 31Iklole siangphahrang pace rum raldohtiak khaai hratin, ralkap 20,000 rum amah a vong dotu ding khi ralkap 10,000 rum a dohlaak zo thok leh thok lo to peitain a ruat lo tu thok cu itumang siangphahrang i na? 32A doh zo lo a’cun, siangphahrang pace lam hlapi ih a ik rih lioah remdunsak hngai dingin ai-awh a thlah thok. 33Curuangah, nangmi ahukhaw nan ngeihsiah zate nan mattaak lo a’cun ka kaizul nan cang zo lo.
Cite
(Mat 5:13; Mar 9:50)
34“Cite cu a ṭha; a i na’n a alnak a deng a’cun, khawti’n a alnak cu omsakṭhan a i thiam thok? 35Khur ṭhatsaknak ca’h iseh, nawn pengmi ca’h iseh san a tlai lo; an zam tlawi men. Zaknak naa a ngei tu ni ngai seh!” tiah a ti hngai.
Currently Selected:
Luka 14: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
