Luka 18

Nuhmei leh Thuṭhentu Thuṭhim

1Cuhnukah Jesuh ni a kaizulle cu thla an cam berbo ṭulnak thu leh an thin deng lo dingah thuṭhim pakhat a sim hngai. 2“Khua pakhat ah Pathian khaw ṭihzah lo, mipawl khaw a hmaizah lo tu thuṭhenbawi pakhat a om ta. 3Acui khua ahcun amah hemah pha ṭiuṭeu in, ‘Kamah rum thungeihtia tu rum kan thu ah thuhmaan in ma ṭhen piak hram’ tiah a ti tu nuhmei pakhat a om ta ve. 4Caangkhat sung cu thu a ṭhen piak duh lo; a i nain hnukdeuh ahcun amah leh mah, ‘Pathian ṭihzah ngei lo leh ahukhaw hmaizah ngei lo ka i na’n, 5hi nuhmei hi ni a ma hnaihnawh reuri ruangah thuhmaan ka rel piak a ṭul thok, culocu ma pha berboin ka retheikau ma vua lei-a’ tiah a ti tia,” tiah a ti. 6Culeh Bawipa ni, “Mihmaanlo thuṭhenbawi ih aanmi cu ngai hman uh. 7Pathian ni amah hemah a sun leh zan in a au tu a rilmile cu an thuhmaan a ṭhen piak hngai thok lo maw? Anmah bawn hngai dingah a nolnawk thok hmen maw? 8Ka tan sim hngai, thuhmaan a ṭhen piak hngai vohvi kau thok. A i nain Mi Tiapa a phat tikah vulei parah zumnak hmu lei hmen im?” tiah a ti.

Farisi pa leh Siahkhuan pa Thuṭhim

9Anmah leh anmah miding ti in a rinsantia tu mipawl leh mi pace nautathmang tu mi hrekkhat hemah hi thuṭhim hi khaw a sim hngai: 10“Mi pahnih biakinn ah thlacam dingin an tat, pakhat pa cu Farisi a ii ih, pakhat pa cu siahkhuan a ii. 11Farisi pa cu amah ceu diing hratin, ‘Pathian, mipacepawl: mitir, daanbuar, nuriim-pariimle mang ka ik lo, cun hi siahkhuan pa mang khaw ka ik lo ruangah ka tan lawm. 12Zarh khat ah voi hnih caw ka ul; ka ngahmi zate ih ṭhen hra ah ṭhen khat ka pia’ ti in thla a cam. 13A i nain siahkhuan pa cu lam hlapi ah diing hratin, vanla hman cau ngam lo, a ṭaang zong cuumtiain, ‘Maw Pathian, kei misual hi veel ma ngeih hram!’ tiah a ti. 14Ka tan sim hngai, pakhat pa sawn iloin hi pa tu hi thiamcoin a inn ah a tlung; icatile mah leh mah a hlortia tu hmawhhmawh cu ṭhum i lei uh khawh, mah leh mah a ṭhumtia tu hmawhhmawh cu hlirsan an i thok,” ti in.

Tepangpawl Thluasuahnak

(Mat 19:13-15; Mar 10:13-16)

15Jesuh ih tham hngai dingah mipawl ni naute hman a hemah an pita; culeh kaizulle ni an hmuh tikah ngekngeihin an dawn. 16Ihmansela Jesuh ni ko hngai in, “Tepangpawl cu ka hemah ma pha u seh, dawn hlah uh; icatile Pathian uknak cu ahile mang a i mile ih ta a ii. 17Thungaiin ka tan sim hngai, ahukhaw tepang mangin Pathian uknak a cosang lo tupoh cu a sungah an lut dah thok lo,” tiah a ti hngai.

Uktu Milian

(Mat 19:16-30; Mar 10:17-31)

18Uktu pakhat ni, “Zirhtu ṭha, kumkhua nun hi ro ah co dingin itu ti lang?” tiah a dil. 19Jesuh ni, “Ica’h miṭha tiah a ma ko? Pathian simlo ahuhman miṭha an i lopi. 20Thupiakpawl: ‘Nuriim pariim sualnak nan vua thok lo; Lai nan nawng thok lo; Ti nan tiir thok lo; A hmaanlopiin mi thu ah diinpitu nan i thok lo; Nan pa leh nan nu upat uh’ tipawl na tiah hin,” tiah a ti. 21Ani ni, “Hipawl hi cu ka nawh lio in ka zul ta hngai rom,” tiah a sawn. 22Jesuh ni acu cu a zak tikah, “Thil pakhat a baumi a om rih. Na ngeihmi zate zuar la mifarah zem hngai, cun vancung ah hlawnthil na ngei thok; cuhnukah phain ma zul,” tiah a ti. 23Acu cu a zak tikah a ngaih a sia; icatile amah cu a lian vuai. 24Jesuh ni amah cu zoh in, “Milianpawl Pathian uknak sung luh thok har zia cu! 25A ngaingai ahcun milian pakhat Pathian uknak sungih luh vanin cu ṭhim kaa sungih kalauk luh a baisawn,” tiah a ti. 26Acu cu a za tu mipawl ni, “I taw ah, ahu cu run i zo lei hmen?” tiah an ti. 27Jesuh ni, “Minung ca’h a cangthiamlomi cu Pathian ca’h a cangthiam hekhawh,” tiah a sawn hngai. 28Cutikah Piter ni, “Zoh hnik; kan inn leh kan lo matain kan tan zulh hi!” tiah a ti. 29Culeh Jesuh ni, “Thungaiin ka tan sim hngai, Pathian uknak caah inn iseh, nupi iseh, ulenau, nulepa iseh, tiale iseh a mata tu cu, 30atu san ah tlungsawn rori in, cun a pha thokmi san ah kumkhua nunnak a ngah thok lo tu ahuhman an om lo,” tiah a ti hngai.

A Thih, Thawh thok a Sim Voi Thumnak

(Mat 20:17-19; Mar 10:32-34)

31Cuhnukah Jesuh ni hleihnihle cu thliar hngai deuh in, “Zoh hman uh, Jerusalem laah kai le hu khawh profetpawl ni Mi Tiapa thuhla an nganmi izongza cu a kimngah thok. 32Icatile Zentail mipawl hemah ap i lei khawh; cun nihsan leh hmuhsit leh cilriit saak a i thok. 33An thawi hnukah an that thok, cun a ni thumnak ah a tho ṭhan thok,” tiah a ti hngai. 34Ihmansela ahi thilpawl ih thuhla ituhman an tiahthiam lo; a ngaingai ahcun, Jesuh ih simmi cu an hemin thuh a ik ruangah a simmi cu an tlaihngah thiam lo.

Mitcaw Kutdong-awkhlawh Damsaknak

(Mat 20:29-34; Mar 10:46-52)

35Jesuh cu Jerikho a hnaihdeuh tikah mitcaw pakhat cu lamhrial ah toin kutdong in mi thil a dil hngai. 36Mibuur vah thawng a zak tikah itu a cang ti a dil hngai. 37Anmimi ni, “Nazareth mi Jesuh a man lonlio,” tiah an sim. 38Cutikah, “David Tiapa Jesuh, ka parah veel ma ngeih hram,” tiah a au. 39Hmala ih om tu mipawl ni acu pa cu daite-ih om dingah ngekngeihin thu an pia; ihmansela, “David Tiapa, veel ma ngeih hram!” tiah dak hlehhlo in a au. 40Jesuh cu a diing rimriam ih, acu pa cu a hemah hruaita dingin thu a pia hngai; culeh a hrial a phat tikah, 41“Itu tan ti piak ning la na daw?” tiah a dil. Ani ni, “Bawipa, khua ma hmuhsak ṭhan la,” tiah a ti. 42Jesuh ni, “Khua hmu vel; na zumnak ni a tan rung rom,” tiah a ti. 43A voi khat ah khua a hmu ṭhan ih Pathian thangṭhat thah in Jesuh a zul; culeh mi hmawhhmawh ni acu cu an hmuh tikah Pathian an thangṭhat.

Currently Selected:

Luka 18: KHBF

Highlight

Copy