Luka 19

Jesuh leh Zakia

1Jesuh cu Jerikho khua ah a lut ih khua sung tanin a vak miarmo. 2Acunangah Zakia timi mipa a om; amah cu siahkhuan upatleng leh milian a ii. 3Jesuh cu ahu a ii ti hmuhngah a khaaitia, ihmansela amah cu mi tungniam a ik ruangah mipi ni an pheen ih a hmu thiam lo. 4Jesuh cu cui lam zulin a vah thok ruangah Zakia cu mipi hmalaah a zuang li ih Jesuh hmu dingah thei kung par a kai. 5Jesuh acunang hmun a phat tikah cungla han zoh in, “Zakia, zong ṭum vakvak, icatile nihinni na inn ah ka tan tlung thok,” tiah a ti. 6Curuangah a ṭum caal ih Jesuh cu a inn ah lungawitein a tlunsak. 7Acu cu a hmu tu hmawhhmawh ni phuntlokin, “Misual pakhat ih inn ah khual i dingin a tat rom hi!” tiah an ti. 8Zakia cu diingin Bawipa cu, “Zoh hman, Bawipa, ka thilngeihmi ih hrek cu mifarah ka pia hngai thok; cun thil pakhatkhat ah ahumaw ka deu ta i taw ah a let li tlungsawn in ka rul thok,” tiah a ti. 9Cutikah Jesuh ni, “Amah khaw Abraham ih tiapa a ik ve ruangah, runnak cu nihinni hi inn ah a pha rom. 10Icatile Mi Tiapa cu a hmami hrawl ding leh rung dingah a pha,” tiah a ti.

Sui Tangka Thuṭhim

(Mat 25:14-30)

11Hi thu an ngaih thah ah, amah cu Jerusalem a hnaih vel ruangah leh Pathian uknak cu pha lohli thok in an ruah ruangah, Jesuh ni thuṭhim pakhat sim a peh. 12Curuangah, “Mi diinhmun sang pakhat cu siangphahrang iknak a lattiak hnukih kirṭhan dingin ram hla pi ah a tat. 13A tah hlanah a salle pahra a ko hngai, cun sui tangka deem khat#19:13 Denarii 100 rum a ruang. vek a pia hngai ih, ‘Ka kirṭhan hlansung hi rum hi sumlet uh’ tiah a ti hngai. 14A i nain a ram sung mipawl ni an hua ih a dung in ai-awh thlah in, ‘Hi pa ih man uk cu kan daw lo,’ tiah an ti. 15Siangphahrang iknak a co hnukah a kirṭhan ih tangka a piak taak hngai mi salle pahra khi, an sumlehnak in itu an miatmi a om ti tiahngah dingah a hemah a ko hngai. 16Peitatleng pa ni hmaiah suakin, ‘Bawipa, na tangka ni deem hra a miat a suah” tiah a ti. 17A bawipa ni, ‘Ti ṭha ci ee, sal ṭha! Thil tiinte ah rinsantlak na ik ruangah khuapi pahra uk ding ṭuanvo la law’ tiah a ti. 18A pahnihnak phain, ‘Na tangka ni deem nga a miat a suah’ tiah a ti. 19A bawipa ni, ‘Nang cu khuapi panga uk hngai law’ tiah a ti. 20Cuhnukah a pace ni phain, ‘Bawipa, hinangah hi na tangka cu a om. Puanthaan in ka tuun riureu, 21icatile nang cu mi tikherkher na ik ruangah ka tan ṭih; na thuncia lomi khaw lat na hmang ih na tuh lomi khaw rih na hmang,’ tiah a ti. 22A bawipa ni, ‘Na aanfang rori in namah thu ka tan ṭhen thok, nang sal ṭhalo! Mi tikherkher ka ik, ka thuncia lomi laṭhanin, ka tuh lomi ka rip ti cu na tiah ii im? 23Ica’h ka tangka cu tangka khawlnak zung ah na sia lo hmen? Cuti’n i sela ka kir tikah a pungkarh ka ngah kho tena thok’ tiah a ti. 24A hrialkam ih diingtule cu, ‘A tangka cu sut in deem hra ngei tu pa pia uh’ a ti hngai. 25(Culeh anmimi ni, “Bawipa, ani tangka deem hra a ngei kovawh! tiah an ti.) 26‘Ka tan sim hngai, a ngei tu hmawhhmawh hemah tlungsin piak an i thok; a i nain ituhman a ngei lo tu hemin cu an ngeihmi hman suh mianmi an i thok. 27A i nain an siangphahrang dingah a ma daw lo tu hi ka ralpawl zong cu hinangah pitain ka hmuhhngan ah that uh’ a ti,” tiah a ti.

Sungparin Jerusalem Luhnak

(Mat 21:1-11; Mar 11:1-11; Joh 12:12-19)

28Hi thu a sim hnukah Jesuh cu an hmala in Jerusalem laah a kai. 29Oliv Tlang timi hmun ih Bethphage leh Bethani khua hrial a phat tikah a kaizulle pahnih thlah hngai in, 30“Nan hmala ih khua ah tat u la, nan luh ah ciittiak thah rih lomi laak no saammi nan hmu thok. A hri phoih lei cu khawh hinangah dawkta uh. 31Mi pakhatkhat ni, ‘Ica’h a hri nan phoih?’ tiah a tan dil hngai a’cun, ‘Bawipa ni a ṭul’ ti men uh,” tiah a ti hngai. 32Curuangah a thlah mile cu an pok ih a sim hngai mangcun an hmu. 33Laak no cu a hri an phoih rero lioah a ngeitule ni, ‘Ica’h laak no cu a hri nan phoih rero?’ tiah an dil. 34Anmimi ni, “Bawipa ni a ṭul,” tiah an ti. 35Cuhnukah Jesuh hemah an dawkta; culeh laak no parah an angkithuah tual an thah hnukah Jesuh an ciittiaksak. 36Laak no ciitia ih a vahnak thlurah, mipawl ni lam parah an angkithuah tual an thaap cuamco. 37Oliv Tlang in lam zong bing nak fang a hnaih vel ah, a zultu mibuur zapi ni donharṭhapawl an hmuhmi caah thanuamngai in aw dakpi rum Pathian thangṭhatin,

38“Bawipa ih min in a

pha tu Siangphahrang cu

thluasuak hram seh!

Van ah daihnak om sela,

culeh van a sangtleng ah

sunparnak om hram seh,”

tiah an ti.

39Mibuur lakih Farisile hrekkhat ni, “Zirhtupa, na dungzulle hi awlsak hngai,” tiah an ti. 40Jesuh ni, “Ka tan sim hngai, hile hi daite-ih an om a’cun lungpawl an au thok,” tiah a sawn hngai.

Jesuh ni Jerusalem a ṭah

41Khualipi hrial a pha ih a hmuh tikah, a ṭah ih, 42“Nang hrimhrim hi maw, remnak suahsaktu thilpawl nihinni ah tiahthiam ta ci la maw! A i nain atu cu na hmuh lo dingin thuh an ii. 43A ngaingai a’cun, na ralpawl ni na velkim kahsam saai in an tan kul ih a Kaakip in an tan von phihtaak ni a pha leh thok. 44Namah leh na sungih na tiale rum vulei ah an tan cilnaang thok, culeh Pathian ih a tan halh caan na tiahthiam lo ruangah na sungah lungpawl thuattia in an zuah thok lo,” tiah a ti.

Biakinn a Thian

(Mat 1:12-17; Mar 11:15-19; Joh 2:12-25)

45Cuhnukah Jesuh cu Biakinn ah lutin acunangih thilzuartule a ṭhawl hngai;

46culeh,

“ ‘Ka inn cu thlacamnak

inn a i thok’ ti’n ngan a ii;

a i nain nangmi ni cu

rokhmangle ih lungkuak ah

nan cansak hi,” #Isa 56:7; Jer 7:11.

tiah a ti hngai.

47Nicangin biakinn sungahcun thu a zirh rero. Tlangbawi upale, daanzirhtule, cun mipi hruaitule ni amah thah daan ding an hrawl berbo, 48ihmansela an ti khawhmi ituhman an hmu thiam lo, icatile mipi zate cu an thuzakmi ni a leem hngai.

Currently Selected:

Luka 19: KHBF

Highlight

Copy