Luka 21

Nuhmei ih Hlupiak

(Mar 12:41-44)

1Khua a zoh ih milianpawl ni an hlupawl biakinn tangka kuang sungah sangin a hmu hngai; 2nuhmei farah pakhat ni dar ngun pahnih a san khaw a hmu. 3“Thungaiin ka tan sim hngai, hi nuhmei farah hi ni an zate van tlungsawn a sang; 4icatile an zate ni cu an ngeih hlei sungin an buur, a i na’n ani cu a farahnak in nunnak ih a rin ding zate a sang,” tiah a ti.

Biakinn Rawh thok Simcianak

(Mat 24:1-2; Mar 13:1-2)

5Mi hrekkhat ni biakinn cu lung mawimawi leh Pathian hemih piakmi laksawngpawl rum thom a ik thu an rero tikah Jesuh ni, 6“Hi nan hmuhmi thilpawl hi, lung thuattia loin mattaak a ik ni a pha leh thok; a zate beeu an i thok,” tiah a ti.

Hmuhsaknakpawl, Hremnakpawl

(Mat 24:3-14; Mar 13:3-13)

7Jesuh cu, “Zirhtupa, acu cu khawcangah hi lei a ik, cun acu cu a cang vel thok ti hmuhsaknak itu hi lei a ik?” tiah an dil. 8Culeh, Jesuh ni, “Hruaisualmi nan ik lo nakding ralring uh; icatile mi tlungpi cu ka min kengin an pha thok ih, ‘Kei hi amah cu ka ii’ ti in leh, ‘Caan a nai vel!’ tiah an ti thok. An dung zulh duh hlah uh. 9“Raldohtiak leh ralthawh thupawl za taw cu ah hrul in om hlah uh; icatile hi thilpawl hi an cang peita thok, a i nain a dengnak ni a zul lohli thok lo,” tiah a ti. 10Cuhnukah, “Miphun khat leh phun khat, ram khat leh ram khat ral an dotia thok; 11linghnit pipi an om thok, cun hmun cece ah mangṭaam leh pulh an tlung thok; culeh vancung ah hrulṭha thilcang thok sim tu leh hmuhsaknak pipa an om thok. 12A i nain hi hmawhhmawh an can hlanah, tan pon-in an tan hrem thok; sinakok leh thawnginn ah an tan ap thok; culeh ka min ruangah siangphahrangpawl leh uktupawl hmaiah an tan phatpi thok. 13Ahi ni ka thuhla sim nakding caanṭha a tan pia hngai thok. 14Curuangah an tan puhmawhnakpawl khawti’n nan leh thok thu ah dontia cia hlah uh; 15icatile nan thu-altu ahuhman ni an in zo lo ding leh an alkalh khawh lo dingmi aanka leh tinnak ka tan pia hngai thok. 16Nulepa leh unaupawl, sungkhatpawl leh rualpipawl hman ih leirawi nan i thok; culeh mi hrekkhat le cu an tan that thok. 17Ka min ruangah mi zate ih huat nan i thok. 18A i na’n nan sam taa khat hman a hmalak thok lo. 19Nan inkhawhnak thawngin nan nunkhua nan ngah thok.

Jerusalem Rawhnak

(Mat 24:15-28; Mar 13:14-23)

20“Jerusalem cu ralkaple ni an kul nan hmuh tikah, a ṭionak a nai vel ti tiah uh. 21Cutikah Judea peng ih a om tu cu tlang laah zuang uh, cun khuapi sungih a om tu ni khuapi cu mata uh, cun khuapi pawnla hramlak ih om tu cu lut hlah uh; 22icatile hipawl hi nganmi hmawhhmawh a kimngahnak phuleisamnak nipawl an ii. 23Acui nikhuapawl ah naupai mipawl leh hnawitulh liomi nausuan ngei tu mipawl ca’h an hmaka a pit. Icatile vulei parah harsatnak hnempi leh, hi mipawl parah Pathian thinsiatnak a om thok; 24ralreen in an thi thok ih ram hmawhhmawh ah ralponmi diinhmun in an hruaita thok; culeh Jerusalem cu Zentail mipawl ni an caan a kim hlansung an cilnaang thok.

Mi Tiapa Phatnak

(Mat 24:29-31; Mar 13:24-27)

25“Ni, thlapa leh arsipawl parah hmuhsaknak an om thok, cun vulei par rampawl lakah rili leh tisuarpawl huk ruangih buainak timi harsatnak a om thok. 26Mipawl cu hrulnak ruang leh vulei cungih a pha dingmi harsatnak ruangah an dal thok, icatile vancung huhampawl hnin an i thok. 27Cutikah ‘Mi Tiapa cu meici sungin’ huham leh a pipami sunparnak rum a phat an hmu thok. 28Hi thilpawl can taw an thawh tikah diingin nan lu tung uh, icatile nan tlannak cu a nai hreuhhro,” tiah a ti hngai.

Thei kung in Thuzirnak

(Mat 24:21-35; Mar 13:28-31)

29Cuhnukah thuṭhim pakhat a sim hngai: “Thei kung leh thingkung hmawhhmawh zoh hnik uh; 30an hnah a cerh caang in ṭhal caan a nai ti cu nanmahte nan hmuin nan tiah kau. 31Acumang ve in, hi thilpawl an can nan hmuh tikah Pathian uknak a nai ti cu nan tiah. 32Thungaiin ka tan sim hngai, hi thilpawl an canngah remro hlansung cu hi san hi a liam thok lo. 33Van leh vulei cu an hmun thok lo, a i na’n ka aankapawl hi cu an hmun thok.

Ralring dingih Thapiaknak

(Mat 24:36-44; Mar 13:32-37)

34“Nan thinlung hi nom tlawinak, ritnak leh hi nunnak ca-ih dontiaknakpawl ni tan zo hngai lo dingah, cun cui Ni ni ringpangloah 35thang mangin tan awk hngai lo dingah hualhum tia uh. Icatile acu cu vulei parih a om tu hmawhhmawh hemah a pha thok. 36Khawcangah khaw tiimvarin om uh, a cang leimi hi thilpawl zate luat dingin thazaang nan ngeih nakding, cun Mi Tiapa hmai ih nan din khawh nakding thlacam ringring uh,” tiah a ti hngai. 37Nicangin Biakinn sungah thu a zirh hngai berbo, cun zan ahcun suakin Oliv tiih kawhmi Tlang parah a caam bil. 38Culeh mi hmawhhmawh cu biakinn sungah Jesuh ih thusim ngai dingin mawpan an hang tho bil.

Currently Selected:

Luka 21: KHBF

Highlight

Copy