Luka 22

Jesuh That dingih Thuphiarnak

(Mat 26:1-5; Mar 14:1-2, 10-11; Joh 11:45-53)

1Atu cu Lontaak timi Colnu phulh-lo Sang puai a nai vel. 2Tlangbawi upapawl leh daanzirhtupawl ni Jesuh thah nakding lam an hrawl, icatile mipi an ṭih. 3Cutikah hleihnih lakih pakhat a imi, Iskariot timi Judas sungah Satan a lut; 4a tat mianmiih tlangbawi upapawl leh biakinn kiltu upapawl rum an hemah Jesuh khawtiin a leiroih hngai thiam thok thu an rontia. 5An lung a awi ngai ih tangka piak ding an naa a tla. 6Curuangah a lungkimin mibuur omlo lioah Jesuh a leiroih hngai nakding caanṭha hrawl a thawh.

Lontaak Puai Tuahtimnak

(Mat 26:17-19)

7Cuhnukah Lontaak tusuan in raihriik ni, Colnu phulh-lo Sang puai ni cu a pha vel. 8Curuangah Jesuh ni Piter leh Johan cu, “Tat lei cu khawh kan ca’h awk ding Lontaak puai caw zaal uh,” tiah ti in a thlah hngai. 9Anmimi ni, “Acu caah khawnangah man zalhsak daw ci?” tiah an dil. 10Ngai uh, khuapi sung nan luh tikah ti uum a puttia mipa ni a tan tuakla hngai thok; a luhnak inn ah zul u la 11inn ngeitu cu, “Zirhtupa ni, ‘Ka kaizulle rum Lontaak Puai caw kan awknak thok khual khaan teh khawnangah a ii? tiah a tan dil’ ti uh. 12Inn cungah thomciami khaan hnempi a tan hmuh hngai thok. Acunangah kan ca’h zaal uh,” tiah a ti hngai. 13Curuangah an tat ih a sim hngaimi mangin izongza an hmu; culeh Lontaak puai caw cu an zaal.

Bawipa Zanriah

(Mat 26:20-30; Mar 14:17-26; Joh 13:21-30)

14Caan a phat tikah, cabuai ah caw a uum, culeh tirhthlahle ni an um bawn. 15Jesuh ni, “Ka in hlanah hi Lontaak puai caw hi nanmah rum awk khat ka daw vuai; 16icatile Pathian uknak sungih a kimngah hlansung cu ka awkngah ti thok lo ti ka tan sim hngai,” tiah a ti. 17Cuhnukah hai cu a la, cun lungawithu a sim hnukah, “Hihi la u la nanmah lakah zemtia uh; 18icatile atu in cu Pathian uknak a phat hlansung sabit vuang ih suakmi cu ka ding ti thok lo,” tiah a ti. 19Cuhnukah sang hlom khat a la, culeh lungawithu a sim hnukah seu in a pia hngai ih, “Hihi ka punsa, nan ca-ih piakmi a ii. Kamah tiahringringnak ah hmang bil uh,” tiah a ti. 20Zanriah an awk hnukah hai khaw acumangcun a tiih, “Nan ca’h thletmi hi hai hi ka thisan sungih thukam thar a ii. 21A i na’n zoh hman uh, a ma leirawitu cu ka hemah caw a um ve hi! 22Icatile Mi Tiapa cu ruahcat rom mangin a tat kau thok, a i na’n a leirawitu cu a hmaka a pit!” tiah a ti. 23Cutikah pakhat leh pakhat, acuti thok tu cu ahu tleng hi lei a ik ti in an dil tia.

Mipipa ik thu Altiaknak

24Anmah lakah ahu tleng hi mi pipatleng i thok nala timi altiaknak a suak. 25Ihmansela, “Zentail siangphahrangle ni cu mi an bawihnawh; culeh anmah cungih thungeitule cu ṭhatnak vuatule tiih kawh an ii. 26A i na’n nangmi hemah cu acumang a i thok lo henakhawh; a i thok sawn cu, nan lakih a upatleng cu nan nautatleng mang a cang thok, cun hruaitu cu miriantu mang a i thok. 27Cabuai ih caw uumtu maw, caw bartu ahu hnemsawn hmen uh? Cabuai ih caw uumtu a i lo maw? A i nain kei cu nan lakah riantu pakhat in ka om. 28“Nangmi cu ka harsat lioah ka hrialih ma diinpitu nan ii, 29culeh ka Pa ni ka hemah uknak a ma piak mangin kei ni nan hemah ka tan pia hngai, 30cuticun ka uknak sungih ka cabuai ah nan aw, nan ding kho thok, cun toṭhiang ah toin Israel hrin hleihnih parah thu nan ṭhen thok.

Piter ih Pheh thok Simcianak

(Mat 26:31-35; Mar 14:27-31; Joh 13:36-38)

31“Simon, Simon, ngai hman! Satan ni cawhii khei mangin nan zate tan khei hngai ding thu a ngah rom, 32a i nain na zumnak tlolh lo dingah na ca’h thla ka cam; culeh ka sanla ah mertiak ngah taw ci ah na unaule tha pia hngai lei ci,” tiah a ti. 33Culeh Simon ni, “Bawipa, thawnginn leh thihnak ah namah rum tat khat dingin ka ringtia!” tiah a ti. 34Jesuh ni, “Ka tan sim, Piter, a ma tiah hi voi thum tiang na pheh hlansung cu nihinni ah ar a khuang thok lo,” tiah a ti.

Tangkadip, Songkhoi, Ralreen

35Jesuh ni, “Tangkadip, songkhoi, kedaap iseh, keng loin ka tan thlahsuak hngai tikahkhin itu tal sambau cu im?” tiah a ti hngai. “Ituhman sambau hlah,” tiah an ti. 36Jesuh ni, “A i nain atu cu tangkadip a ngei tu ni kentia seh, cun songkhoi ngei tu ni khaw kentia ve seh. Culeh ralreen ngei lo tu cu a angki pawnthuah zuarin ralreen pakhat lei seh. 37Icatile hi Lai Thianghlim, ‘Culeh amah cu daanngeilo lakih siarcih a ii’#Isa 53:12. ti hi ka parah a kimngah thok;’ culeh a ngaingai ah kamah thuhla nganmi cu a kimngah rero ti ka tan sim hngai,” tiah a ti hngai. 38Anmimi ni, “Bawipa, zoh hnik, ralreen pahnih an om hi,” tiah an ti. “Acu cu a zaakau,” tiah a sawn hngai.

Oliv Tlang parih Thlacam

(Mat 26:36-46; Mar 14:32-42; Joh 18:1)

39Jesuh cu a suakih, a vah keel mangin Oliv Tlang ah a tat; culeh a kaizulle ni an zul. 40A hmun a phat tikah, “Tukforhnak sungih nan luh lo nakdingah thlacam uh,” tiah a ti hngai. 41Cuhnukah anmah hemin lunghnawh ban hlet tluk ah a thliartia ih, khuk bilin, 42“Pa aw, na dawtzawng a ik ahcun hi hai hi ka hemin ma thawn piak hram; a i nain ka dawtzawng iloin na dawtzawng vuak i kau seh,” tiah thla a cam. [43Cutikah vancung in vanmi pakhat Jesuh hemah a lang ih tha a pia. 44A thinharnak in thintak hlehhlo in thla a cam ih a thlan cu thi tor hnem pipi mang cang in vulei parah an tor.] 45A thlacamnak in a hang thawh tikah a kaizulle hemah a tat ih an ngaihsiat ruangah melioin a hmu hngai, 46culeh, “Ica’h nan me? Hang tho lei cu khawh, tukforhnak sungih nan luh lo nakdingah thlacam tu hmen uh,” tiah a ti hngai.

Jesuh Leirawi leh Ponnak

(Mat 26:47-56; Mar 14:43-52; Joh 18:1-11)

47A aan rero rih lioah mibuur khat an pha dukdi; hleihnihle lakih pakhat Judas timi mipa ni hmai a hruai hngai. Jesuh cu hnam dingin a pan; 48ihmansela Jesuh ni, “Judas, hnamnak in maw Mi Tiapa cu na leirawi sawh lei?” tiah a ti. 49A hrialkam ih om mipawl ni thilcangmi an hmuh tikah, “Bawipa, reen in set le hu im?” tiah an dil. 50Cutikah anmah lakih mi pakhat ni tlangbawi sang ih sal pakhat a thawi ih a vorhla naa ṭotkau a set. 51Ihmansela Jesuh ni, “Ahihi ti ti hlah,” tiah a ti. Culeh a naa cu thamin a damsak. 52Cuhnukah Jesuh ni amah pon dingih a pha tu tlangbawi upale, biakinn kiltu upapawl leh upale hemah, “Rokhmang i ning la mang reen leh talvawng rum ma pon dingah nan pha maw? 53Nanmahpawl rum ni cang theih biakinn sungih ka om ah ka parah kut nan thlah ta tal lo? A i nain ahi cu nan caan, culeh khuamawt huham ih uk caan ik nihmawh!” tiah a ti hngai.

Piter ni Jesuh a Pheh

(Mat 26:69-75; Mar 14:66-72; Joh 18:15-18, 25-27)

54Cutikah amah cu pon-in an hruai mianmiih tlangbawi sang ih inn ah an phatpi. Piter ni cu lam hla nawn in a zul. 55Tual laisim ah meipual an tumngah tikah an ai khat, Piter khaw an lakah a to. 56Cutikah hemom lengtia pakhat ni meitle ah Piter cu a hmu ih darkau in a zoh, culeh, “Hi pa hi khaw Jesuh rum a bualleng ta mi a ii,” tiah a ti. 57Ihmansela a pheh ih, “Minu, amah cu ka tiah lo,” tiah a ti. 58Acuhnuk duau ah mipace pakhat ni Piter cu a hmu ih, “Nang khaw an lakih pakhat na i ve,” tiah a ti. Ihmansela Piter ni, “Mipa, ka i lo,” tiah a ti. 59Cuhnuk nazi pakhat hla tluk ah mipace pakhat ni, “Hi pa khaw Jesuh rum bualleng ta mi a i hrimhrim; icatile amah hi Galilee mi a ii,” tiah a ti reuri. 60Ihmansela Piter ni, “Mipa, itu thu na ang rero ti ka tiah lo ee!” tiah a ti. Acui caan fangte, a aan rero lioah ar a khuang. 61Bawipa ni mertia in Piter cu a zoh. Cutikah Piter ni Bawipa ih aan, a hemih, “Nihinni ar khuan hlanah voi thum a ma pheh thok,” a timi khi a vonmangṭhan. 62Culeh a suakih a ṭap kheeikho.

Jesuh Hmuhsit leh Thawinak

(Mat 26:67-68; Mar 14:65)

63Jesuh pontule ni amah cu hmuhsit leh thawi an thawh; 64a mit puan in an hup ih, “A tan vel tu ahu a ii? Cang hnik!” tiah an ti berbo. 65Jesuh cu a phunphun in an nautat berbo.

Jesuh cu Tlangsuak Hmaiah

(Mat 26:57-68; Mar 14:61-64; Joh 18:12-14, 19-24)

66Khua a hang van tikah, mipi upale khawmtiaknak – tlangbawi upapawl leh daanzirhtupawl an buur hnih hmunkhatah an khawmtia, culeh Jesuh cu an Sanhedrin hemah an hruai. 67“Messiah i na taw ci ah man sim,” tiah an ti. “Tan sim hngai ning la nan zum thok lopi; 68cun thu tan dil hngai ning la le nan let thok lo. 69A i nain atu in Mi Tiapa cu Pathian Cungnung vorhlasan ah a to thok,” tiah a sawn hngai. 70An zate ni, “A ik le, nang cu Pathian Tiapa na ii hetuhmen?” tiah an dil. Ani ni, “Ka ik cu nanmah ih ti a ii,” tiah a sawn hngai. 71Cutikah anmimi ni, “Thudiinpitu itu ṭul beeng na kau hu? Amah ih hmurka rori in kan za rom hi tang!” tiah an ti.

Currently Selected:

Luka 22: KHBF

Highlight

Copy