Marka 10
10
Nupa Mattiak Thu
(Mat 19:1-9)
1Acui hmun matain Judea peng leh Jordan khatla ral ah a tat; culeh mibuurpawl ni an von ulkim ṭhan ih, a daankeel in thu a zirh hngai ṭhan. 2Farisile hrekkhat phain amah hniksak dawt ah, “Mi pakhat ni a nupi mat phung a ii maw?” tiah an dil. 3Jesuh ni, “Moses ni itu thu tan pia hmen uh?” tiah a ti hngai. 4Anmimi ni, “Moses ni sawh cu matnak lai ngan ih mat a sen kau,” tiah an let. 5Ihmansela Jesuh ni, “Nan lung khawng ruangah hi thupiak hi nan ca’h a ngan. 6A i na’n thil seemsuah hramthawh in Pathian ni pami leh numi a vua hngai. 7Hi thu ruangah pami ni a nulepa mata hngai in 8an pahnih cu thisa khat ah an cang thok; pahnih an i ti lo, pakhat an ii. 9Curuangah Pathian ih komciami cu ahuhman ni ṭhian hlah u seh,” tiah a ti hngai. 10Cuhnukah a kaizulle ni hi thu hi inn sungah an dil ṭhan. 11Culeh ani ni, “A nupi ma hratin a pace a pi tupoh nu a riim; 12cun numi ni khaw a pumah zuangta hratin mi pace a pumah a’cun pa a riim ve,” tiah a ti hngai.
Tepangpawl Thluasuahnak
(Mat 19:13-15; Luk 18:15-17)
13Jesuh ni tham hngai in thluasuah hngai dingah mi ni a hemah tepangpawl an hruai ih kaizulle ni an cam hngai. 14Ihmansela Jesuh ni acu cu a hmuh tikah a thin a kaangaw ih, “Tepangpawl cu ma pha kau u seh, dawn hlah uh; icatile Pathian uknak cu hile mang a i tu mipawl ih ta a ii hekhawh. 15Thungaiin ka tan sim hngai, Pathian uknak hi tepang mangin a cosang lo tupoh a sungah an lut dah thok lo,” tiah a ti hngai. 16Culeh a cawi hngai ih, an parah a kut suangin thlua a suah hngai.
Milian Pa
(Mat 19:16-30; Luk 18:18-30)
17Jesuh khualtlawn dingih a pawh fang ah pakhat pa ni zuangin a ke hramah a khuk a bil ih, “Zirhtu ṭha, kumkhua nunnak co dingah itu ka ti thok?” tiah a ti. 18Jesuh ni, “Ica’h miṭha tiah a ma ko? Pathian simlo ahuhman miṭha an omlo pi. 19‘Lai nan nawng thok lo; Nuriim pariim sual nan vua thok lo; Ti nan tiir thok lo; A ilopi in misual nan puh thok lo; Mi nan deu thok lo; Nan pa leh nan nu upat uh’ timi thukhaam na tiah hngai kau hin,” tiah a ti. 20Ani ni, “Zirhtupa, hipawl hi cu ka tepan te in ka zul hngai rom,” tiah a ti. 21Jesuh ni a zohhliah ih a khacoh#10:21 Khacoh ti cu dawt, rem, ngaih tipawl komtiaza khi a ii., culeh, “Thil pakhat te ceu na bau. Tat lei ci khawh, na ngeihsiah zuarin mifarah ṭhen hngai, cun vancung ah hlawnthil na ngei thok; cuhnukah ma phain ma zul,” tiah a ti. 22Ahihi a zak tikah a hmai a haan ih thinnuamloin a tat mianmi, icatile ngeihsiah tampi a ngei. 23Jesuh ni a hrialkam a zoh ih, a kaizulle cu, “Milianpawl ca’h Pathian uknak sung luh a har thok zia cu!” tiah a ti hngai. 24Culeh a kaizulle ni a aan cu an don a har vuai. Ihmansela Jesuh ni, “Tiale hngai, Pathian uknak sung luh a har zia cu! 25Milian pakhat Pathian uknak sung luh vanin ṭhim kaa sungih kalauk luh a baisawn,” tiah a sim hngai beeng. 26Acu cu a kaizulle ni an don a har vuai ih pakhat leh pakhat “Ahu cu run a i zo thok hmen?” tiah an ti tia. 27Jesuh ni zoh hngai in, “Minung ca’h cu a cangthiamlomi a ii, Pathian ca’h zong cu a i lo; icatile Pathian ca’h cu izongza a cangthiam,” tiah a ti hngai. 28Piter ni, “Zoh hnik, keimi hi izongza matain kan tan zul hekhawh,” tiah a ti. 29Jesuh ni, “Thungaiin ka tan sim, kamah leh thuthangṭha ruangah inn iseh, unau iseh, tarle iseh, nulepa iseh, tiale iseh, lorampawl iseh, pakhatkhat a mata tu cu 30atu san ah inn, unau, tarle, nule, tiale leh lorampawl a let 100 leh hremnak rum, culeh a pha leimi san ah kumkhua nunnak an co thok. 31A i nain hmapitleng a i tu mi tlungpi cu dungtatleng, cun dungtatleng cu hmapitleng an i thok,” tiah a ti.
A Thih thok a Voi Thumnak a Sim
(Mat 20:17-19; Luk 18:31-34)
32Jesuh leh a kaizulle Jerusalem la ih an soh lioah Jesuh cu an hmala deuh ah a tat; an don a har ih an dung in a zultupawl cu an thin a phang. Hleihnihle cu thliar hngai ṭhanin amah parih a cang thokmi sim hngai hram a thawh, 33“Ngai hman uh, Jerusalem ah kan so thok ih Mi Tiapa cu tlangbawipawl leh daanzirhtupawl ih kut ah ap i lei khawh, anmimi ni thah dingin thu an rel piak thok; cuhnukah Zentail mipawl kut ah an ap thok; 34anmimi ni nihsairawnnak ah hmangin cil an saak thok, cun thawi lei u khawh an that thok; culeh ni thum hnukah a tho ṭhan thok,” tiah a ti.
Jeim leh Johan ih Dilnak
(Mat 20:20-28)
35Zebedi ih tiapale Jeim leh Johan ni a hemah phain, “Zirhtupa, kan tan dilmi poh man vuak piak hram la kan daw,” tiah an ti. 36Culeh Jesuh ni, “Itu tan vuak piak hngai ning la nan daw hmen?” tiah a ti hngai. 37Anmimi ni, “Na sunparnak sungah na vorhla ah pakhat, na kehla ah pakhat to man sen hram la,” tiah an ti. 38Ihmansela Jesuh ni, “Nan dilmi nan tiah lo a ik hi! Ka dinmi tuarnak hai nan ding zo thok maw? Iklole ka hnimtiakmi tihnimnak ah nan hnimtia zo thok maw?” tiah a ti hngai. 39Anmimi ni, “Kan ti zo kau thok,” tiah an sawn. Jesuh ni, “Ka dinmi hai cu nan ding zoin, ka hnimtiakmi tihnimnak ah khaw nan hnimtia zo kau thok. 40A i nain ka vorh leh ka keh ih to ding cu kei ih piak zomi a i lo; tuahtim piak a i mile ca’h zong i pa’n,” tiah a ti hngai. 41Pahrale ni cui thu an zak tikah Jeim leh Johan parah an heh a har. 42Curuangah Jesuh ni ko khat hngai in, “Zentail mipawl laka’cun uktupawl ni an ukmipawl an bawihnawh, #10:42 Bawihnawh ti cu khawngkheng, hnenaang rori tican. cun an mithupile ni khaw thu mi an ngeihhnawh ngai ti nan tiah. 43A i nain nangmi lakahcun acumangin cu a i thok lo; nan lakih mipipa ik daw tupoh cu nan tungsau a i thok; 44cun nan lakih mi pipatleng ik a daw tupoh cu nan zate ih sal a i thok. 45Icatile Mi Tiapa cu mi ih ren dingah iloin mi rian dingah leh a nunnak cu mi tlungpi ca’h tlannak man ah liam dingin a pha,” tiah a ti hngai.
Mitcaw Bartimia Damsaknak
(Mat 20:29-34; Luk 18:35-43)
46Jerikho khua an pha, culeh Jesuh cu a kaizulle, cun mibuur pi rum Jerikho in an pawh fang ah Timia ih tiapa, mitcaw kutdong awkhlawh Bartimia cu lam kap ah a tola. 47Nazareth khuami Jesuh a ik a zak tikah, “David Tiapa Jesuh, veel ma ngeih hram!” tiah a au. 48Mi tlungpi ni cam in daite-ih om dingah an sim; ihmansela, “David Tiapa, veel ma ngeih hram” ti in dak hlehhlo in hman a au hoi. 49Jesuh cu a diing rimriam ih, “Hinangah ko uh,” a ti hngai. Culeh mitcaw pa cu an ko ih, “Na tha nuam kau, tho, a tan ko hi,” tiah an ti. 50A angki pawnthuah zamtain a phettia ih Jesuh hem a pha. 51Culeh Jesuh ni, “Itu tan vuak piak ning la na daw?” tiah a ti. Mitcaw pa ni, “Rabboni, #10:51 Rabboni: Zirhtupa tican. khua hmu ṭhan lang,” tiah a ti. 52Jesuh ni, “Tat; na zumnak ni a tan damsak rom” tiah a ti. Khua a hmu ṭhan lohliih Jesuh cu a zulhcih.
Currently Selected:
Marka 10: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
