Marka 11

Sungparin Jerusalem Luhnak

(Mat 21:1-11; Luk 19:28-40; Joh 12:12-19)

1Jerusalem an hnaih cuahco ih Oliv Tlang hrial Bethphage leh Bethani khua an phat ah Jesuh ni a kaizul pahnih thlah hngai in, 2“Nan hmala ih khua ah tat u la, nan luh caangte ciittiak thah rih lomi laak no saammi nan hmu thok; phoih in hinangah dawkta uh. 3Mi pakhatkhat ni, ‘Itu nan ti?’ a tan ti hngai a’cun, ‘Bawipa ni a poi, hinangah kan thlah ṭhan cop thok’ ti hruak uh,” tiah a ti hngai. 4An tat lohliih, khua sung lampika kap ih inn pawnla, sangka hramah laak no saammi cu an hmu. An phoih lioah 5an hrialih diingtule mi hrekkhat ni, “Icaah laak no hri nan phoih rero?” tiah an ti. 6Anmimi ni Jesuh ih sim hngai mangin an sim ih, acule ni khaw lat an sen. 7Culeh laak no cu Jesuh hemah an dawkta ih a parah an angki pawnthuah an thaap, cun Jesuh ni a ciitia. 8Mi tlungpi ni lam ah an puan an thaap, mi hrekkhat ni lo sungin an latpahmi hnahhluai an thaap.

9Culeh a tat li tu mipawl ni iseh, a zultule ni iseh,

“Hosanna!#11:9 Hosanna ti cu Atu man rung tican.

Bawipa ih min in

a pha tu cu thluasuak hram seh!#Saam 118:25-26.

10Kan pupa David ih uknak

a pha leimi cu

thluasuak hram seh!

A sangtleng vancung ah

Hosanna i hram seh!”

tiah an hek hiamho.

11Culeh Jesuh cu Jerusalem ah lutin biakinn ah a tat; cun a velkim thil zate a zoh hngai hnukah, ni a siim vel ruangah hleihnihle rum Bethani ah an tat.

Thei kung Camkhaatnak

(Mat 21:18-19)

12A zingla, Bethani in an kirṭhan tikah Jesuh cu a ṭa a ṭhi. 13Lam hla nawn in a hnah a niim ngaimi thei kung pakhat a hmu ih, a vuang awkṭha tuah pang ah ti in a fuk. A hrial a phat tikah a hnah simlo ituhman a hmu lo, icatile thei vuan khuk a i lo. 14Thei kung cu, “Ahuhman ni na vuang tan aw dah hlah u seh,” tiah a ti. A kaizulle ni acu cu an za.

Biakinn a Thian

(Mat 21:12-17; Luk 19:45-48; Joh 2:13-22)

15Cuhnukah Jerusalem an pha. Cun biakinn sungah lutin biakinn sungih thilzuartupawl leh a leitupawl ṭhawl hngai in, tangka thlengtule ih cabuaipawl leh laileeng zuartule ih tokhengpawl a kuplet hngai, 16cun ahuhman biakinn tual ah thilphur ih vah a sen hngai lo. 17Thu zirh hngai in:

“ ‘Ka inn cu miphun zate ca-ih

thlacamnak inn tiah

kawh a i thok’

ti’h ngan a i lo maw?#Isa 56:7.

A i na’n nangmi ni cu

rokhmangle#11:17 Kawl ih damiah timi a ii. ih

lungkuak ah

nan vuak hi!”#Jer 7:11.

tiah a ti hngai.

18Tlangbawi upapawl leh daanzirhtupawl ni cui thu an zak tikah amah thah daan thok an hrawl; icatile Jesuh ih thuzirhmi ni mibuur zapi cu an thinlung a lat hngai tuk ruangah hile ni amah an ṭih. 19Siimla a phat tikah Jesuh leh a kaizulle cu khua sungin an suak.

Thei Kung Vuai hemin Zirding

(Mat 21:20-22)

20A zingla maw, lam ih an vah lioah thei kung cu a tawhram tiang vuaicar#11:20 Ṭo titu kan om. remro an hmu. 21Culeh Piter ni mangtiaṭhan in, “Zirhtupa, zoh hman! Na camkhaatmi thei kung khi a vuaicar hi,” tiah a ti. 22Jesuh ni, “Pathian zum phot uh. 23Thungaiin ka tan sim hngai. Hi tlang hema’hin, ‘Phoktia in rili sungah zamtia’ nan tiih, nan thinlung sungah zumhrotlonak ngeilotein, nan ti mangih cang hrimhrim dingin nan zum a’cun, vuak piak nan i kau thok. 24Curuangah ka tan ti hngai, thlacam ih nan ngenmi poh, ngah rom in zum u la culeh nan ta a i thok. 25Diingin thla nan cam tikpohah, mi pakhatkhat parih lungkimlonak nan ngeih a’cun ngaidam uh; cuticun vancung ih a ommi nan Pa ni khaw nan sualnak a tan ngaidam hngai ve thok,” tiah a ti hngai. 26“Mi’h sualnak nan ngaidam lo a’cun vancung ih a ommi nan Pa ni khaw nan sualnak a tan ngaidam hngai ve thok lo,” tiah a ti hngai.

A Thungeihnak Thudilnak

(Mat 21:23-27; Luk 20:1-8)

27Jerusalem an pha ṭhan. Jesuh cu Biakinn sungih a vah rero lioah tlangbawi upale, daanzirhtupawl leh upapawl phain, 28“Itu thungeihnak in hi thilpawl hi na vua hngai? Ahu ni hipawl vua dingah thungeihnak an tan pia?” tiah an ti. 29Jesuh ni, “Thu pakhat ka tan dil hngai thok: ma let uh, cun kei ni khaw itu thungeihnak in hi thilpawl ka vua hngai ti ka tan sim hngai thok. 30Johan ih timihnimnak hi vancung in maw a suah, iklole minung hemin a thawh? ma let uh,” tiah a ti hngai. 31Pakhat leh pakhat, “ ‘Vancung ih thupiak’ kan ti a’cun ani ni, ‘Ica’h nan zum duh lo hmen?’ a man ti thok. 32A i nain ‘Minung hemin a thawh’ kan ti thok he hmen im?” an ti. Mipi an ṭih ṭung, icatile, mipi ni Johan cu profet ngaingai ah an sia. 33Curuangah, “Kan tiah lo,” tiah an ti. Culeh Jesuh ni, “Itu thungeihnak in hi thilpawl ka vua hngai ti kei ni khaw ka tan sim hngai ve ce thok lo,” tiah a ti hngai.

Currently Selected:

Marka 11: KHBF

Highlight

Copy