Marka 12
12
Rianṭuantu Ṭhalo Thuṭhim
(Mat 21:33-46; Luk 20:9-19)
1Cuhnukah thuṭhim hmangin thu sim hngai a thawh. “Mi pakhat ni sabit duum a vua, a velkim a kul, a suur nak ah khur a saai, a kilnak ah hawte a don; culeh a hlawhsetmile hemah hlawhsak hngai in amah cu khual a tlawn mianmi. 2Sabit lawh a zat tikah sabit duum ih suakmi a covo la dingin a sal pakhat cu hlawhsetmile hemahcun a thlah. 3A i nain ponlain an thawi ih a kut rom in an thlah. 4Culeh a sal pakhat a thlah ṭhan; acu pa cu a lu ah an thawi ih an hmuhsit. 5Cuhnukah a pace a thlah ih, acu pa cu an that. Sal pace tlungpi khaw acumangcun an ti; mi hrekkhat cu an thawi, mi hrekkhat cu an that. 6A ngeih rih mi pakhat cu a dawtmi tiapa a ii. Netatleng ahcun, ‘Ka tiapa tal cu an upat thok a ii’ ti tia in a thlah. 7A i nain, hlawhsetmile ni khat leh khat, ‘Hi pa hi rocotu a ii, suak uh, that he hu khawh ro cu kanmah ih co thok a ii’ an ti tia. 8Curuangah ponlain an that ih sabit duum pawnla ah an zam. 9Sabit duum ngeitu ni itu ti thok na? Pha lei khawh hlawhsetmile cu that hngai in, sabit duum cu mipace a pia hngai thok.
10‘Innsatule ih hnonmi lung cu
inn kil lung ah a cang;
11Hihi kan Bawipa ih vuakmi a ii,
kan mithmuh ah donharṭha a ii,’
timi Lai Thianghlim nan rel
thah lo hmen maw?”
tiah a ti hngai.
12Hi thuṭhim hi anmah a simsan hngai ti an tiahthiam tikah amah pon an daw, ihmansela mibuur an ṭih. Curuangah amah cu an vakta mianmi.
Ngunkhuai thu Thudilnak
(Mat 22:15-22; Luk 20:20-26)
13Cuhnukah a thusim parin awh dawt ah Farasipawl leh Herod ih minung hrekkhat cu Jesuh hemah an thlah. 14An pha ih, “Zirhtupa, nang cu mihmaan na ii, ahuhman upatcuangnak na lansak lo, cun mi hi thleidannak rum na zoh hngai lo ti kan tiah; icatile Pathian thudawt hi a iknak mangin na zirh. Khumpi hemih ngunkhuai piak hi a daan ii im? 15Kan piak a mawi maw mawi lo?” tiah an ti. Ihmansela an tisaktiak a tiah hngai ih, “Ica’h a ma hniksak hngai? Nan ngun cu ma pia u la, zoh hnik lang,” tiah a ti hngai. 16Culeh ngun tangka saa khat an pia. “Hihi ahu ih hmuihmel leh ṭuanmin a cuang?” tiah a ti hngai. Anmimi ni, “Khumpi ih,” tiah an sawn. 17Jesuh ni, “Khumpi ih thilpawl cu Khumpi pia u la, Pathian ih thilpawl cu Pathian pia uh,” tiah a ti hngai. Culeh amah cu an don a har vuai.
Thawhṭhannak Thudil
(Mat 22:23-33; Luk 20:27-40)
18Thawhṭhannak a om lo tiah a ti tu Sadusi-le hrekkhat Jesuh hemah phain, 19“Zirhtupa, Moses ni, ‘Pakhat pa cu a upa a thi ih, tiangeiloin a nupi ceu a mattaak ahcun amah ni a mo nuhmei cu ompi lei khawh a u caah tia a ngeihpiak thok’ tiah daan a man ngan piak.#Daan 25:5. 20Unau pasarih an om. Upatleng ni nu a pi ih, a thih ah tia a ngeita lo; 21culeh a naupa ni a mo cu a ompi ih tia ngeita loin a thi; a pathumnak khaw acumang siksik; 22an pasarih in ahuhman ni tia an mata lo. Netatleng ah amah khaw a zong thi dah. 23Thawhṭhan tikah ahu tleng ih nupi i lei? Icatile an pasarih ni an ompi vek,” tiah an ti. 24Jesuh ni, “Lai Thianghlim iseh, Pathian huham iseh nan tiah lo hi nan palhnak san a i lo hmen maw? 25Icatile mithi an thawhṭhan tikah nupi pi in leh pumah ngei in an om lo, vancung ih vanmipawl mang an i thok. 26Mithi thawhṭhannak thu ah Moses laibu sungih hluaibuah lakin Pathian ni, ‘Kei cu Abraham ih Pathian, Isaak ih Pathian leh Jakob ih Pathian ka ii’ a timi thu#Suah 3:6. khi nan rel thah lo hmen maw? 27Pathian cu mithile ih Pathian a i lopi, a nungmile ih Pathian a ii hekhawh; nan palh vuai,” tiah a ti hngai.
Thukhaam Pipatleng
(Mat 22:34-40; Luk 10:25-28)
28Daanzirhtu pakhat ni a hnaih hngai ih, pakhat leh pakhat an thu altiak zain, Jesuh ni ṭhavuai in a leh hngai a hmuh tikah, a hemah, “Khawmang thukhaam hi a pipatleng ii maw?” tiah a dil. 29Jesuh ni, “A pipatleng cu, ‘Maw Israel, ngai hman: Bawipa kan Pathian cu Bawipa pakhat a ii; 30Bawipa na Pathian cu na thinlung zate, cun na nunkhua zate, cun na ruahnak zate leh na thazaang zate rum na daw thok’ timi#Daan 6:4-5. hi a ii. 31A sontu cu, ‘Na innkiang cu namah na dawttiak mangin na daw thok’#Tlang 19:18. ti hi a ii. Hile vanin a pipasawnmi thukhaam a om lo,” tiah a sawn. 32Daan zirhtupa ni, “Na hmaan, Zirhtupa; Pathian cu pakhat a ii ih, amah simlo pakhat hman an om lo; 33cun amah cu thinlung zate, tiahthiamnak zate leh thazaang zate in dawt thok,’ culeh ‘mah innkiang cu mah dawttiak mangih dawt thok’ na timi cu a hmaan in na sim – hihi meitih raihriik leh raihriik hmawhhmawh vanin a thupisawn punpah,” tiah a ti. 34Tingngaiin thu a let ti Jesuh ni a hmuh tikah, “Nang hi Pathian uknak na hlat lo,” tiah a ti. Acuhnuk cu ahu ni hman thu an dil ngam ti lo.
David ih Tiapa A Ii Maw?
(Mat 22:41-46; Luk 20:41-44)
35Jesuh ni biakinn sungih thu a zirh lioah, “Messiah cu David ih tiapa a ii e tia daanzirhtule ni khawti’n an ti thiam?
36David amah rori ni Thiang Thlarau thawngin,
‘Bawipa ni ka Bawipa hemah,
Na ralle na ke tangih
ka siah hngai hlansung
ka vorhla ah to, #Saam 110:1.
tiah a ti,’ ti’n a than hin.
37David amah rori ni Bawipa tiah a ko hekhawh; curuangah khawti’n hmen a tiapa a ik thiam?” tiah a ti. Culeh mibuur pi cu lunghmui in a thusim an ngai.
Daanzirhtule Ṭhuatsiatnak
(Mat 23:1-7; Luk 20:45-47)
38Jesuh ni thu a zirhthah ah, “Angki tualpi rum vak ih, dawr hmun ah upatnak rum domi ik, 39cun sinakok ah tokheng ṭhatleng leh cawdoh puai ih upatnak hmun tipawl co a daw tu daanzirhtule hi ralring uh. 40Nuhmei inn rok leh dinhmuar an hmang ih lan dawt ah saupipi in thla an cam. Sualthuṭhennak ngekdeuh tuak leh lei uh,” tiah a ti.
Nuhmei ih Hlupiak
(Luk 21:1-4)
41Biakinn ih ahlu thlaknak kuang an siahnak khatlasan ah toin acunangah mipi ni tangka an thlak cu a zoh hngai langlang. Milian tlungpi ni cu ahlu tlungpipi an sang. 42Nuhmei farah pakhat phain, saa khat rum man ruangmi dar ngun pahnih a sang. 43Culeh Jesuh ni a kaizulle ko hngai in, “Thungaiin ka tan sim hngai, ahlu sannak sungih a buur tu an zate vanin hi nuhmei farah hi ni tlungsawn a sang. 44Icatile hile an zate ni cu an ngeih hlei sungin an buur, a i na’n ani cu a farah lakah a ngeihmi zongza, nunnak ih a rin dingmi a zate dengin a sang,” tiah a ti hngai.
Currently Selected:
Marka 12: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.
