Teekɨtɨga 13
13
Nda ngander deg kɨ nyakulg kɔtko kɨɗa kɨta Bɨraɓe
1Bɨraɓe el Moij an: 2Ɔrr nganderg tube kɔtko kɨɗa kɨtɔm Nya kɨ ɗi kɨ tee kamkõt dasa ku Israelagt, ke de ke nyakul, i lom.
Ɗà nah kuɓɨr bɨna kɨkanj berrkasɨ
3Moij el deg an: I gan kamsɨ dɔ ndɔt'n non kɨ i teen ne kɔ dɔning Ejipt't, kam ɓe ɓert, kɨta i kɨtakul tɔg ji Bɨraɓe la Bɨraɓe teen sesɨ kɔ lot 'nten ye. A i san kuɓɨr bɨna kɨ ɗa kɨ berrkasɨ al. 4A i teen ɓone kam naht kɨ tɔa i Abib. 5Lon Bɨraɓe a and sei kam dɔningt lo Kanag kɨ Hetiag kɨ Amoriag kɨ Hebiag kɨ Jebusiag ĩn Bɨraɓe nda yo kɨ n'ad bɔwig, dɔning'n mba kɨ tej ãint tit bah be. A i ngomgo kɨlaɓer 'nten kam nah kɨkɨɗat 'nten. 6A i sa kuɓɨr bɨna kanj berrkasɨ ndɔ tanãimɨta, na ndɔ kɨkõtanãimɨta a i nah lo Bɨraɓe. 7Kam ndɔgt kɨtanãimɨta'n non a san kuɓɨr bɨna kɨkanj berrkasɨ, a oon kuɓɨr bɨna kɨ ɗa kɨ berrkasɨ roit al, a oon berrkasɨ roit al kam dɔningt loi kɨtaagbe.
8Ndɔt'n non a el ngoni an: I kɨta nya'n Bɨraɓe ɗa kɨtɔm lon m'teen kam dɔning Ejipt't kɨtɨga. 9A i tit nyamanaj be jiit kɨ nyagakamdɔt mbɨna kumit kɨtakad ta lo Bɨraɓe i kam tait kɨta kɨtakul tɔg ji Bɨraɓe la Bɨraɓe teen sei kam dɔning Ejipt kɨtɨga ye. 10Kɨtɔ 'nten la a i ngomɨn go mberkɨnda 'nten dɔ kagat kɨɓalg ɓalg.
Ngander deg kɨ nyakulg ĩn lo Bɨraɓe.
11Lon Bɨraɓe a and sei kam dɔningt lo Kanag tit'n ndan yo adi kɨ bɔwig, na a adi tɔ ye, 12a ɔrr ngan derg tube'n teen kamkõt dasa, ndahn kɔtko kɨɗa kɨta Bɨraɓe mbã kɨ ngander nyakulg loi tube, kɨdɨngãg a ĩn lo Bɨraɓe. 13A i hɔ kõ bat i ban dɔ ngon korro kɨɗen, na ĩla i ndig badɔa al a ne, a i teet kɔa. Ngander deg ku nganigt a i badɔd tube. 14Lon ngoni a ndɨjei ndɔ madt an: Girr nya 'nten i ɗi a? A ela an: Kɨtakul tɔg ji Bɨraɓe la Bɨraɓe teen sej kam dɔning Ejipt't kɔ kam ɓeɓert ye. 15Lon Paraõ ɗa dɔngang, mbet nyàj kad j'aw, kamla Bɨraɓe tɔl nganderg kam dɔning Ejipt tube, ngander deg ho ngander nyakulg ho tu. Kɨtɔ 'nten la m'jan mosɨ nyakulg kɨdɨngã kɨ teen kamkõt dasa tube kadkarit mad Bɨraɓe, na m'badɔ ngonderr kɨɗen ku nganɨmt kɨdɨngã. 16A i tit nyamanaj be jiit, tit nya kɨ dɔ mbɨna kumit be, kɨta kɨtakul tɔg ji Bɨraɓe la Bɨraɓe teen sej Ejipt kɨtɨga ye.
Luwah ɔrr nõ girrdeg lon
17Lon Paraõ nya deg ad awɨn ye, Luwah ɔrrd ta ɗob kɨ dɔningt lo Pilistiag al, ke i nderbe, kɨta Luwah el an: Ĩla Israel'ng oon kad ɓet ɗɔɔ a ngad a ne, a awɨn kɨkete al, na a telɨn kɨgog dɔning Ejipt't. 18Na Luwah ɔrr deg ta ɗob kɨ ɗob'ngug dɔ dɨlalo kɨ kad Bahbot kɨkɨre. Israel'ng teen kam dɔning Ejipt, ndian go nat kɨgoagoa.
19Moij un kɨnga Jojep nat sen, kɨta Jojep ad Israelag ndan yo an: Rota Luwah a ɗe rosɨt, na a unɨn kɨngam nẽ be awɨn ne nu.
20Ɓain lot kɨ Sukot aw hɔn londɨ Etamt ta dɨlalot. 21Bɨraɓe aw kete nõdt kàda kam kilndiit kɨ ɗa kɨɗigg kɨ dõ kɨta kɔrrd ta ɗob, na ndɔ kam horrt, kɨɗa kɨɗingg kɨ dõ kɨtakad'd kunj, ad ndian ne ndian ne ndɔ ho kàda ho. 22Kilndii kɨ kàda kɨ horr kɨ ndɔ nyan ta kaw nõ degt al.
Currently Selected:
Teekɨtɨga 13: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
