Teekɨtɨga 28
28
Kubg kɨta ngéjamosɨ kadkarig
(Oo 39:1-31)
1I ɗe kɨ ngonkõi Aarõ nat kɨ ngana kɨdɨngã ku Israelagt kɨta ɗa kɨlaɓer adɨm kam kɨla jamosɨkadkarit, ad i Aarõ kɨ Nadab kɨ Abihu kɨ Eleajar kɨ Itamar, ngan Aarõ kɨdɨngã. 2A i ɗa kubg kɨjaɓat kɨta ngonkõi Aarõ kɨta pare roa kɨta kɔsɨgon tɔ. 3A elta kɨ ngéterrkamg tube ad i ĩgɨn m'ad'd goosɨ ngãi kad ɗan ne kubg lo Aarõ kɨta ndaa kɔtko kɨɗa kad ɗa kɨlaɓer adɨm kam kɨla jamosɨkadkarit. 4Kubg 'nten la a i, ĩn a ɗand ye: Nyakutdɔ gu kɨ epod kɨ kubji kɨ ngal kɨ kub kɨ joo'n kɨ jɔg kɨ kubdɔɓo. A ɗan kubg kɨjaɓat'n non kɨta ngonkõi Aarõ kɨ ngana kɨdɨngã kad ɗan kɨlaɓer admɨn kam kɨla jamosɨkadkarit.
Kub epod
5A unɨn kɨla lɔr kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew. 6A ɗan epod kɨ kɨla lɔr kɨ kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew kɨgo goosɨ jo kubt. 7Nya kɨdɔ bɔgt kɨjoo a dɔnd ta bɔg epodt kɨjoo kɨta dɔ kub epod nat kɨɗa. 8Kub dɔɓo kɨ ɗa kɨgo goosɨ jo kubt kɨdɔ epodt tɨga kɨta dɔa a i kɨla kɨ titna kɨ epod kɨ gaj kub kɨkɨɗa tɔ, ad i kɨla lɔr kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew. 9A ɔi medkɔsɨ mbal oniks joo, a i tɔsɨ tɔ ngan Israelg dɔ medkɔsɨgt'n non. 10Tɔ kɨbojidet a i dɔ medkɔsɨt kɨkɨɗa, na tɔ kɨbojidet kɨ nãin ye, a i dɔ medkɔsɨt kɨmad kɨgo koojdt. 11A i tɔsɨ tɔ ngan Israel dɔ medkɔsɨt kɨjoo'n non tit'n ngegoosɨ tɔsɨ nya a tɔsɨn dɔ mbalt ke dɔ kase kɔsɨdɔnyat. A i lad kam hɔdt kɨ ɗa lɔr. 12A i nda medkɔsɨ kɨjoo'n non dɔ nyagt kɨdɔ bɔg epodt kad ĩn medkɔsɨ ga kam dɔ tɔ ngan Israelt. Aarõ a to tɔd dɔ bɔgɨnt kɨjoo nõ Bɨraɓet kad i nyagakamdɔt. 13A i ɗa lɔr nyahɔd, 14kɨ kɨla lɔr kɨjanjoi kɨ nda gid nat joo, na a i la kɨlag kɨ nda gid nat'n non kam lɔr hɔdt.
Nyakut dɔ gu
15A i ɗa nyakutdɔ gu kɨta gangta kɨgo goosɨ joo kubt, a i ɗaa tit'n ɗan ne epod be, a i ɗa kɨ kɨla lɔr kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew. 16Tata kɨ ngala a asɨn na, a i kɨ teet dɔnat. Ngala a i daji kɨɗa, na tata a i daji kɨɗa tɔ. 17A i nda medkɔsɨg tit kɨ njɔra njɔra sɔɔ. Njɔra kɨdasa i mbal sardoin, kɨ mbal topaj kɨ mbal emerod. 18Njɔra kɨkõjoo i mbal rubis kɨ mbal sapir kɨ mbal diamãt. 19Njɔra kɨkõmɨta i mbal opal kɨ mbal agat kɨ mbal ametist. 20Njɔra kɨkõsɔɔ i mbal krisolit kɨ mbal oniks kɨ mbal jaspɨ. Medkɔsɨg'n non a ĩn kɨ la kam nya hɔdt kɨ ɗa kɨ lɔr. 21Medkɔsɨg'n non a ĩn kɨgo tɔ ngan Israel kɨkɨlah gidaijoo, kɨgo tɔdt, tit'n ngegoosɨ tɔsɨ nya a tɔsɨn dɔ kase kɔsɨdɔnyat. Medkɔsɨ kɨɗen a i kɨ tɔa dɔnt, kɨta girr Israel kɨkɨlah gidaijoo. 22A i ɗa kɨla lɔrg kɨjanjoi kɨ nda gid nat kɨta nyakutdɔ gu'n non. 23A i ɗa ninga lɔrg joo kɨta nyakutdɔ gu. A i nda ninga kɨjoo'n non dɔkum kɨjoo lo nyakutdɔ gu. 24A i la kɨla lɔr kɨjoo kɨ nda gid nat kam ningat kɨjoo ĩn ndan dɔkum nyakutdɔ gut. 25Na ta kɨ nãi joo lo kɨla lɔrg kɨjoo kɨ nda gid nat a i dɔ ta nyahɔdt kɨjoo, a i ndad dɔ nya kɨdɔ bɔg epodt kɨnõt. 26A i ɗa ninga lɔr madg joo, a i ndad dɔkum nyakutdɔ gut kɨber kokama kad epodt. 27A i ɗa ninga lɔrg joo, a i ndad girr nya kɨdɔ bɔgt kɨjoo lo epod kɨber kɨnõt, nderbe kɨ lo lad nat, kɨ dõ dɔ kubdɔɓot lo epod. 28Kɨ kɨla kɨkil musɨmusɨ la a i dɔn ningag lo nyakutdɔ gu kɨ ningag lo epod nat ye, kɨtakad nyakutdɔ gu a i dõ dɔ kubdɔɓot lo epod, na kɨtakad nyakutdɔ gu a gangɨn na kɨ epod al. 29Lon Aarõ a andɨn kam lot kɨjaɓat ye, a to tɔ ngan Israel dɔ gunt. Tɔd ĩn kɨ tɔsɨ dɔ nyakutdɔ gut kɨta gangta kad i nyagakamdɔt nõ Bɨraɓet kɨndɔgndɔg. 30A i nda Urim kɨ Tumim kam nyakutdɔ gut kɨta gangta. A ĩn dɔ gu Aarõt lon a andɨn nõ Bɨraɓet, na Aarõ a to takɨgang lo Israelag dɔ gunt nõ Bɨraɓet kɨndɔgndɔg.
31A i ɗa kubji kɨ ngal lo epod kɨtaagbe kɨ kɨllakub kɨkil musɨmusɨ. 32Bulo kɨta la dɔ a i ngawdant. Gug dɔ bulo'n non, a joo'n taa tit bulo kub hand ɗobe, kɨtakad til al. 33A i ɔsɨ desẽ ɓakumta kand grenadieg kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr gugɨn dɔ taa kɨber. Mand lɔrg a ĩn kɨ dɔ mbɨnadt gugɨn dɔ tɔ. 34Mand lɔr kɨɗa kamla ɓakumta kand grenadie kɨɗa, mand lɔr kɨɗa kamla ɓakumta kand grenadie kɨɗa a ĩn dɔ ta kubji kɨngalt'n non kɨber gugɨn dɔa tube, 35Aarõ a la ront lon a ɗan kɨlaɓer. Lon a andɨn kam lot kɨjaɓat nõ Bɨraɓet kɨ lon a teen a ne, deg a oon dɔ kah mandg kɨ ko kɨringkɨring. Titbe la a oin al ye. 36A i ɗa bar lɔr kɨjanjoi, a i tɔsɨ ta 'nten dɔt tit'n tɔsɨn ne dɔ kase kɔsɨdɔnyat; kɨjaɓat kɨta Bɨraɓe. 37A i dɔa kɨ kɨllakub kɨkil musɨmusɨ kɨtakad bar lɔr i dɔ jɔgt ko nõt. 38A natnõ Aarõt, na Aarõ a to ɗagootal lo Israelag kɨ ɗan lon a awɨn ne kɨ kadkarig kɨjaɓat. Lon a ndan ne kadkarig lod tube kɔt ko kɨɗa. A i natnõat kɨndɔgndɔg kɨtakad Bɨraɓe tan kadkarig lod. 39A i jo kub lẽ kɨ sɔl lom lom. A i ɗa jɔg lẽ kɨ sɔl lom lom, a i jo kub dɔbo kɨ desẽ kɨ kɔsɨ dɔt.
Kubg lo ngéjanyamosɨkadkari
40A i ɗa kubg kɨta ngan Aarõ kɨ kubdɔɓod kɨ jɔgg kɨta paren rod kɨ kɨta kɔsɨgon. 41A i la nyag'n non ro ngonkõi Aarõ kɨ ngana. A i wurd kɨ yib, a i ndad kɔtko kɨɗa, a i teld kɨjaɓat kɨtakad ɗan kɨlaɓer admɨn kam kɨla jamosɨkadkarit. 42A i ɗa kalesõ lẽg kɨtɔd kɨta kut dɔ rod kɨkari dɔ ɓodt mbã kɨdɔ bɨngdt. 43Aarõ kɨ ngana a lan rodt lon a andɨn ne kam kujkub ndɔdnat kɨ Luwah, ke lon a ndɔt'n ne kɨ ro dɨngɨrt kɨta ɗa kɨlaɓer kam lot kɨjaɓat kɨtakad a ĩn ne kɨkanj ta dɔdt, na ɓeta a oin. 'Nten la i mberkɨnda kɨ tokɨnõt. I kɨta Aarõ kɨ koah kɨgoat.
Currently Selected:
Teekɨtɨga 28: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
