Teekɨtɨga 29
29
Aarõ kɨ ngana ĩn kɨ nda kɔtko kɨɗa kɨta Luwah
1Nya 'nten la i nya'n a i ɗa kad i ndadɨn kɔtko kɨɗa kad ɗan kɨlaɓer admɨn kam kɨla jamosɨkadkarit. A i hɔ ngon bɔw mang kɨɗa kɨ bal bat jo kɨkanj nya mad ɗad. 2A ɔi kuɓɨr bɨna kɨkanj berrkasɨ, ke woina kɨkanj berrkasɨ kɨ lɔi kɨ yib, kɨ bɨna kɨta lewlew kɨkanj berrkasɨ kɨ ɗa kɨ yib, a i ɗad kɨ nduj gem kɨ to letlet. 3A ũ kam keht kɨɗa, i ɗen nat kɨ bɔw mang kɨ bal bat kɨjoo nõ. 4A i ɗe kɨ Aarõ kɨ ngana ta tabit kand kam kujkub ndɔdnat kɨ Luwah, a i ndogd man. 5A ɔi kubg, a i la kub kɨ joo'n, kɨ epod kɨ kubji kɨ ngal lo epod, kɨ kubkutdɔ gu ro Aarõt. A i dɔa kɨ kubdɔɓo lo epod tɔ. 6A i nda jɔg dɔat, a i nda bar lɔr kɨjaɓat dɔ jɔgt'n non. 7A i un yib kurdɔt, a ũ dɔat, a wuran. 8Kamla a i ɗe kɨ ngana, na a i lad kubg. 9A i dɔɓod kɨ kubdɔɓo, ad i Aarõ kɨ ngana, a i nda jɔg dɔdt. Kɨlaɓer jamosɨkadkari a i lod kɨtakul mberkɨnda kɨ tokɨnõt. Titbe la a i ndan Aarõ kɨ ngana kɔtko kɨɗa ye.
10Kamla a i ɗe kɨ bɔw mang nõ kujkub ndɔdnat kɨ Luwah, na Aarõ kɨ ngana a ndan jid dɔ bɔw mangt'n non. 11A i jakɔ bɔw mang'n non nõ Bɨraɓet ta tabit kand kam kujkub ndɔdnat kɨ Luwah. 12A un mosɨ bɔw mang'n non, a i tɔsɨ dɔ gaj dɨngɨr kadkarit kɨ ngon jii, na a i mbel ndeg mosɨn non tube ningt kad dɨngɨr kadkarit. 13A ɔi mbool dã tube kɨ ut dɔ tia, kɨ kandaa kɨ munjo joo, kɨ mbool dã kɨ dɔdt, a i lahor dɔ dɨngɨr kadkarit. 14Na dã bɔw mang kɨ ndara kɨ kiã a i lahort tɨga gid lo hɔlondɨ. I kadkari kɨjakɔ kɨtɔ majal kɨ ɗa.
15A un kɨkɨɗa ku bal batgt, na Aarõ kɨ ngana a ndan jid dɔ bal bat'tn non. 16A i jakɔ bal bat'n non, a un mosa, a i tud i gugɨn dɔ dɨngɨr kadkari. 17A i gang bal bat dɨtim dɨtim, a i tugo tia kɨ njaa, a i kawd dɔnat kɨ dã kɨ gang nõ kɨ dɔa tu. 18A i la bal bat kɨtaagbe horrt dɔ dɨngɨr kadkarit. I kadkari kɨlahorrt kad Bɨraɓe, i sé kɨkootmbĩ kɨnel, i kadkari kɨ la kad Bɨraɓe dɔ horrt.
19A un bal bat kɨkõjoo, na Aarõ kɨ ngana a ndan jid dɔ bal bat'tn non. 20A i jakɔ bal bat'n non, a ɔd mosa tẽ, ɔsɨn moj mbi Aarõ kɨ ko kõt, kɨ mbɔj mbi ngana kɨ ko kõt, kɨ ɔsɨ dɔ kɨbojidt kɨ ko kõt, kɨ dɔ kɨbonjadt kɨ ko kõt. A i tud ndeg mosɨn non i gugɨn dɔ dɨngɨr kadkari kurrdɔt tɔ. 21A i ɔd mosɨ kɨ i dɔ dɨngɨr kadkarit 'nten kɨ yib kur dɔt 'nten tɔ. A i tud dɔ Aarõt kɨ dɔ kubgt loa, kɨ dɔ nganat kɨ dɔ kubg lod a ĩn kɨjaɓat. Aarõ a i ĩ kɨjaɓat kɨ kubg loa kɨ ngana kɨ kubg lo ngana nat sia. 22A un mbool dã bal bat'n non kɨ ɓonga, kɨ mbool dã kɨ ut dɔ tia, kɨ wura, kɨ munjo dun dã joo, kɨ mbool dã kɨ gug dɔd, kɨ bɨnga kɨ ko kõt, kɨta i bal bat ndah de kɔtkokɨɗa. 23A un kuɓɨr bɨna kɨɗa kɨ oina kɨ ɗa kɨ lɔi kɨ yib, kɨ bɨna kɨɗa kɨ to lewlew, to kam keht ad i keh kuɓɨr bɨna kɨkanj berrkasɨ kɨ nõ Bɨraɓet. 24A i la nyag'n non tube daji Aarõt kɨ ji ngana. A ad'd kɨta kadkari'n non kɨ ji kɨɓii nõ Bɨraɓet. 25Kamla a i ta jidt, a i lahort dɔ dɨngɨr kadkarit dõ dɔ kadkarit kɨlahorrt kɨta sé kɨ kootmbĩ kɨ nel Bɨraɓe. 'Nten i kadkari kɨ la kad Bɨraɓe dɔ horrt. 26A un gu bal bat nda Aarõ kɔtko kɨɗa, a i bia kɨta kadkari kɨ bii nõ Bɨraɓet, a i nya loi. 27A un gu bat kadkari kɨ bii, kɨ bing bat kadkari kɨ kun kɨ dõ ad i gu kɨ bing bal bat ndah de kɔtkokɨɗa. 28A i nya lo Aarõ kɨ ngana ko ro Israelagt kɨgo mberkɨndat kɨ tokɨnõt, kɨta i kadkari kɨ kun kɨ dõ. A i kadkari kɨ kun kɨ dõ kokɨro Israelagt kɨ kun kam kadkarigt kɨkad kamsɔllom, ad i kadkari kɨ kun kɨ dõ. Lod kɨ la kad Bɨraɓe.
29Kubg kɨjaɓat lo Aarõ a ĩn lo ngana kɨgoat. A lan lon a wurɨnd ne kɨ yib kad ndand kɔtko kɨɗa. 30Ngona'n a i ngejanyamosɨkadkari gootat ye, a la kubg'n non asɨ ndɔ tanãimɨta, lon andɨn kam kujkub ndɔdnat kɨ Luwah, kɨta ɗa kɨlaɓer kam lot kɨjaɓat.
31A un bal bat ndah de kɔtkokɨɗa'n non, a i ndirr dãã kam lo madt kɨjaɓat. 32Aarõ kɨ ngana a san dã bal bat'n non kɨ kuɓɨr bɨna kɨ kam keht ta tabit kand kam kujkub ndɔdnat kɨ Luwah. 33A san nyag'n non ĩn i kadkari kutdɔ majal kɨ ɗa kɨtakad ĩn ne kɨ nda kɔtko kɨɗa, na kɨtakad ĩn ne kɨjaɓat tɔ. De kɨkari a sa al kɨta ĩn nyag kɨjaɓat. 34Ĩla ndeg dã ndah de kɔtkokɨɗa ke kuɓɨr bɨna nãi mbã loti dɔt a ne, a i la ndega'n non horrt. A san al kɨta i nya kɨjaɓat. 35A i ɗa titbe kɨ Aarõ kɨ ngana kɨgo nyagt tube kɨ m'ndai mbera, a i ndad kɔtko kɨɗa asɨ ndɔ tanãimɨta. 36Kɨ ndɔ kɨɗen a i jakɔ bɔw mang kadkari kɨta kut dɔ majal kɨ ɗa, a i ar dɨngɨr kadkarit lon a i lan kadkari kɨta kut dɔ majal kɨtaa. A i wura kɨ yib kɨtakad tela kɨjaɓat't. 37Ndɔ tanãimɨta a i la kadkari kutdɔ majal kɨ ɗa kɨta dɨngɨr kadkari, a i tela kɨjaɓat't, na dɨngɨr kadkari a i kɨjaɓat kɨtɔitɔi, nya kɨ ɗi'n a ɔd dɨngɨr kadkari'n non a ne, a i kɨjaɓat.
Kadkarig kɨ la kɨndɔgndɔg
38'Nten la i nya'n ad Luwah dɔ dɨngɨr kadkarit ye: Ngan batg joo kɨ asɨ ɓal kɨɗa, a ad kɨndɔgndɔg kɨkanj nya ta. 39Ngon bat kɨkɨɗa, a i laa kɨsĩ, na ngon bat kɨmad a i laa lokɨsɔle. 40Nat kɨ kõ bat kɨdasa a i ɗen kɨ nduj gem kɨ to letlet kilo mɨta a i burɨn kɨ yib kɨmaj litɨr kɨɗa kɨ nusɨ, a i ɗen kɨkasɨ nduu litɨr kɨɗa kɨ nusɨ a i lan kadkarit kɨkootmbĩ admɨn. 41Ngon bat kɨkõjoo a i laa lokɨsɔle. A i la ɗa i lan kadkari nduj kɨsĩ kɨ tit'n i lan kadkari nyakãi kɨ kũ kɔ. I sé kɨkootmbĩ kɨnel, i kadkari kɨ la kad Bɨraɓe nõ Bɨraɓet lot'n m'a m'ndɔdsɨt kad m'eli ta. 42'Nten la a i kadkari kɨ la horr kɨ ndɔgndɔg kɨ ngakat kɨ ngaka, kɨ la tabit't kand kam kuj kubt nõ Bɨraɓet lot'n m'a m'ndɔdsɨt kad m'elsɨ ta. 43Nu la m'a m'ndɔd Israelagt ye, na kunjɨm kɨɗangeɗeng a tel lon non kɨjaɓat't. 44M'a m'tel kujkub ndodna kɨ Luwah kɨjaɓat kɨ dɨngɨr kadkari tɔ. M'a m'tel Aarõ kɨ ngana kɨjaɓat't kɨtakad ɗan kɨlaɓer admɨn kam kɨla jamosɨkadkarit. 45M'a m'ndɨ dan Israelagt, m'a mĩ Luwah lod. 46A gerɨn kad mĩ la mĩ Bɨraɓe Luwah lod kɨ nge tee sed kam dɔning Ejipt't kɨtɨga kad m'ndɨ dandt. Mĩ la mĩ Bɨraɓe Luwah lod ye.
Currently Selected:
Teekɨtɨga 29: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
