Teekɨtɨga 30
30
Dɨngɨr lahor nduj mbikamt kɨkootmbĩ
1A i ɗa dɨngɨr mad kɨta lahor nduj mbikam kɨ kootmbĩ, a i ɗaa kɨ kag akasia. 2Ngala a i nusɨ metɨr tata a i nusɨ metɨr ho, ngala kɨ tata a asɨn na, ngala kɨ dõ a i metɨr kɨɗa. A i ɗa gajg dɔ kumat kɨsɔɔ. 3A ut dɔ kaga kɨ lɔr kɨjanjoi, ad i dɔa kɨ kadag kɨ gajag kamla a i ɗa lɔr nyapare gugɨn dɔ bɔga. 4A i ɗa ninga lɔrg joo kɨtaa girr nyaparet'n non dɔ bɔg kadat kɨjoo, a i ɗad dɔ kadat kɨjoo kɨta la kag kɨngalg kamt kɨta toan. 5A i tɔsɨ kag akasia kɨ ngal joo, a ut gid'd kɨ lɔr. 6A i ndaa nõ kubganglot kɨ nõ sund najkɨmat, sumba nõ nyakutdɔ kɨ i dɔ sund najkɨmat lot'n m'a m'ndɔdt. 7Kɨsĩ kɨndɔgndɔg lon a ɗan go lambag, Aarõ a lahor nduj mbikam kɨ ɗa kɨ nõkag dɔt. 8Na lon Aarõ a ndah horr lambagt lokɨsɔle a ne, a lahor nduj mbikamt kɨndɔgndɔg nõ Bɨraɓet kɨ ngakat kɨ ngaka. 9Ot lahor nduj mbikam kɨmbah dɔt, ke kadkari kɨlahorrt, ke kadkari nduj ko, ke kadkari nyakãi kɨ kũ kɔ. 10Aarõ a la kadkari utɨn dɔ majal dɔ gaj dɨngɨr mbikamt nja kɨɗa ɓal kɨɗa kɨ mosɨ kadkari kɨjakɔ kɨtɔ majal kɨ ɗa, a utɨn dɔ majal kɨɗa nja kɨɗa ɓal kɨɗa kɨ ngakat kɨ ngaka. Dɨngɨr'n non i lambo i nyabadɔ ro kɨta lokɨjaɓat nya kɨjaɓat kɨtɔitɔi kɨta Bɨraɓe.
Larjã nyabadɔ ro
11Bɨraɓe el Moij an: 12Lon a i tɨda kɔr Israelag a ne, dekɨɗen a ad Bɨraɓe nyabadɔ ron, lon a tɨdand kɨtakad yokoosɨ so dɔdt al, lon a tɨdand ne. 13Nya'n a adɨn ye: Dekɨɗen ku degt kɨ tɨdand a ne, a ad nusɨ nar kɨgo nart kɨ ɗan ne kɨla kam lot kɨjaɓat. Nusɨ nar a i kadkari kɨ la kad Bɨraɓe. Nar kɨɗa asɨ nar gera dɔjoo. 14Dekɨɗen ku degt kɨ tɨdand, kɨ ɓala i dɔjoo a ne, a ad kadkari kɨ la kad Bɨraɓe. 15Ngemaj a ad tɔi do nusɨ nar al, ngendo a ad du al tɔ, lon a adɨn ne kadkari kutdɔ majal kɨ ɗa kɨta rosɨ. 16A i ta nar kutdɔ majal kɨ ɗa ji Israelagt. A i nda kɨta kɨlaɓer kam kujkub ndɔd nat kɨ Luwah kad i nyagakamdɔt ro Israelagt nõ Bɨraɓet kɨta la kadkari kutdɔ majal kɨ ɗa kɨta rosɨ.
Jo man kɨta kar ro
17Bɨraɓe el Moij an: 18A i lẽ ningakasɨ ɗan bai kɨ njaa kɨta tugo ro, a i ndaa mbɨna kujkub ndɔdnat kɨ Luwah kɨ dɨngɨr kadkari, na a i ũ man kamt. 19Aarõ kɨ ngana a awɨn ta bait'n non, tugon jid kɨ njad. 20Lon a andɨn ne kam kujkub ndɔdnat kɨ Luwah, ke lon a ndɔt'n ne kɨ ro dɨngɨr kadkarit, kad ɗan kɨlaɓer lahor kadkarit adɨn Bɨraɓe a ne, a tugon rod kɨ man kɨtakad a oin al. 21A tugon jid kɨ njad kɨtakad a oin al. 'Nten la i mberkɨnda kɨ tokɨnõt rodt ad i ro Aarõt kɨ ro koaht ngakat kɨ ngaka.
Yib kurdɔt kɨjaɓat kɨ mbikam kɨkootmbĩ
22Bɨraɓe el Moij an: 23Ɔi nyag kɨkootmbĩ kɨmajtɔi, ad i myrr kɨ man asɨ nar ɓumi, kɨ sĩamom kɨmbẽ asɨ nusɨ myrr ad i nar ɓujoo kɨ dɔmi, kɨ kadnya kɨkootmbĩ asɨ nar ɓujoo kɨ dɔmi, 24kɨ kasɨ asɨ nar ɓumi kɨgo nart kɨ ɗan ne kɨla kam lot kɨjaɓat, kɨ yib kand ɓir asɨ litɨr kɨbojidet 25i ɗan yib kurdɔt kɨjaɓat ad i yib kɨkootmbĩ in ngeɗaa a bur nat kɨgo goosat. A i yib kurdɔt kɨjaɓat kɨta kur.
26A ɔd yib'n non wurɨn kujkub ndɔdna kɨ Luwah kɨ sund najkɨma, 27kɨ tabɨl kɨ nyaɗakɨlaa tube, kɨ kag nda lamba, kɨ nyaɗakɨlaag kɨ dɨngɨr mbikam 28kɨ dɨngɨr kadkari kɨlahorr kɨ nyaɗakɨlaa tube, kɨ ɓai kɨ njaa. 29A i ndad kɔtko kɨɗa kad ĩn kɨjaɓat kɨtɔitɔi, na nya kɨ ɗi kɨ a ɔd'd a ne, a i kɨjaɓat tɔ. 30A i wur Aarõ kɨ ngana, a i ndad kɔtko kɨɗa kɨtakad ɗan kɨlaɓer admɨn kam kɨla jamosɨkadkarit.
31A el Israelag titbe: 'Nten la a i yib kurdɔt lom kɨjaɓat kɨ ngakat kɨ ngaka. 32A ũ yib'n non ro det kɨkari al, a i ɗa yib mad kɨ bur nat kɨ titna sia al tɔ. I yib kɨjaɓat, na a i nya kɨjaɓat rosɨt tɔ. 33Dekɨɗen kɨ a ɗa yib mad kɨ bur nat kɨ titna sia ke wurɨn de kɨkari a ne, a goto kɔ dan degt lon.
Nõkag kɨkootmbĩ
34Bɨraɓe el Moij an: Ɔi nyag kɨkootmbĩ ad i nõkag stakte, kɨ kar kɨ bah kɨ ot nel, kɨ nõkag galbanum. A i ɔi nyag kɨkootmbĩ'n non kɨ nõkag oliban kɨjanjoi, na kɨlo koid a asɨn na. 35A i ɗan mbikam ad i nduj kɨkootmbĩ'n ngeɗaa a burnat kɨgo goosat, a i kɨ kũ kat't, a i kɨjanjoi kɨ kɨjaɓat. 36A i ɔd ur ndujt kɨ to letlet, a i nda nõ sund najkɨmat kam kujkub ndɔdnat kɨ Luwah lot'n m'a m'ndɔdt. A i nya kɨjaɓat kɨtɔitɔi rosɨt. 37Dukan'n non'n a i ɗa ye, a i ɗa nduj mad kɨ bur nat tit sia kɨta rosɨ al. A i nya kɨjaɓat rosɨt kɨta Bɨraɓe. 38Dekɨɗen'n a ɗa kɨ titna sia kɨtakad oota, a goto kɔ dan degt lon.
Currently Selected:
Teekɨtɨga 30: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
