Teekɨtɨga 31
31
Bɨraɓe kun Betsalel kɨ Oholiab kɨta ɗa kujkub londɨ
(Oo 35:30—36:1)
1Bɨraɓe el Moij an: 2Oo m'kun Betsalel, ngon Uri kɨdɨngã ngon Hur ko girr Judat kɨ tɔa. 3M'ɗoosa kɨ Ndil Luwah kɨ terr kɨ terrkam kɨ nyager kɨ goosɨ ɗa kɨlag dang dang tube, 4M'ada goosɨ ɗa kɨlag kɨ dang dang: Kɨla lɔr, kɨ kɨla larjã kɨ kɨla ningakasɨ, 5kad tɔsɨn medkɔsɨg kɨta ndad kam nya hɔdt, kad tɔsɨ kag, na kad ɗan kɨlag kɨ dang dang tube. 6Na oo m'ada Oholiab ngon Ahisamak kɨdɨngã ko girr Dant kad i madkɨlaa, na m'nda terr kam ngéterrkamg madgt tube kɨtakad ɗan ne nyag tube kɨ m'ndai mberd: 7ad i kujkub ndɔdna kɨ Luwah kɨ sund najkɨma kɨ nyakutdɔa kɨ nyag tube kɨta kujkub'n non, 8kɨ tabɨl kɨ nyaɗa kɨlaag, kɨ kag nda lamba kɨ ɗa kɨ lɔr kɨjanjoi kɨ nyaɗa kɨlaa tube, kɨ dɨngɨr mbikam, 9kɨ dɨngɨr kadkari kɨlahorrt kɨ nyaɗakɨlaa tube, kɨ ɓai girr kutg, 10kɨ kubg kɨ joo'n majmaj, kɨ kubg kɨjaɓat kɨta Aarõ ngejanyamosɨkadkari, kɨ kubg kɨta ngana, kad ɗan ne kɨlaɓer admɨn kam kɨla jamosɨkadkarit, 11kɨ yib kurdɔt, kɨ mbikam kɨ ɗa kɨ nyag kɨkootmbĩ kɨta lokɨjaɓat, kɨgo tagt tube kɨ m'ndai mberd la a ɗan ye.
Ndɔ taakò lo Bɨraɓe
12Bɨraɓe el Moij an: 13El Israelag tɔ an: a i ngomɨn go ndɔ taakò lom kɨta i nyakɔj mbɨnamt kɨ ĩn, kɨ ngakat kɨ ngaka kɨtakad i gerɨn mĩ la mĩ Bɨraɓe kɨ ngetelsɨ kɨjaɓat't ye. 14A i ngomɨn go ndɔ taakò kɨta i ndɔ kɨjaɓat kɨtɔsɨ. Dekɨɗen kɨ a tela kɨyerrt a ne, a tɔlɨna kɔ rota, na dekɨɗen kɨ a ɗa kɨla mad kam ndɔt'n non a ne, a goto kɔ dan degt lom. 15A i ɗan kɨla ndɔ kɨbojidet, na ndɔ kɨkõtanãimɨta a i ndɔ taakò kad deg taan kòt, a i kɨjaɓat kɨta Bɨraɓe. Dekɨɗen kɨ a ɗa kɨla mad kam ndot'n non a ne, a tɔlɨna kɔ. 16Kɨtɔ 'nten la Israelag a ngomɨn ne go ndɔ taakò, a taan kò kam ndɔt'n non kɨ ngakat kɨ ngaka kad i kunkɔ kɨ tokɨnõt. 17'Nten la i nyakɔj mbɨnamt kɨ Israelag kɨ mbãkɨnõt kɨta Bɨraɓe ɗa dɔrã kɨ dɔning ndɔ kɨbojidet, na dɔ ndɔt kɨkõtanãimɨta, nya ta ɗa kɨla, na taakò.
Deg ɔsɨn dɔd ber nõ yo lɔrt kɨ ɗa ɓakumta ngon mang
18Lon Bɨraɓe nya takelta kɨ Moij dɔ mbalbo Sinait ye, ad Moij bar mbal kɨjoo'n i najkɨma, i kɨndang kɨ ngon ji Luwah.
Currently Selected:
Teekɨtɨga 31: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
