Teekɨtɨga 35
35
Ta lo ngomgo ndɔ kɨkõtanãimɨta
1Moij kun Israelag ngékawna tube kɨnat, eld an: Nyag 'nten la Bɨraɓe ndasɨ mbera kad i ɗan: 2A i ɗan kɨla ndɔ kɨbojidet, na ndɔ kɨkõtanãimɨta a i ndɔ kɨjaɓat kɨtɔsɨ ad i ndɔ taakò kɨ nda kɔtko kɨɗa kɨta Bɨraɓe. De'n a ɗa kɨla ndɔt'n non a ne, a tɔlɨna kɔ. 3A i ɗan horr kam londɨsɨt mad ndɔ taakòt al.
Israelag ɗen kɨ kadkari adɨn Bɨraɓe kɨta ɗa kuj ndub Luwah
(Oo 25:1-9)
4Moij elta Israelag ngékawna tube an: Tag'n Bɨraɓe nda mbera la teen: 5Ɔin nyag kam nyagt losɨ adɨn Bɨraɓe kadkarit. De'n kama ndig a ne, kɨ ɗe kɨ kadkari ad Bɨraɓe: Lɔr kɨ larjã kɨ ningakasɨ 6kɨ kɨla kub kɨkil musɨmusɨ kɨ kɨkɨre wor wor kɨ kɨkɨre pirɨr, kɨ lẽ kɨ sɔl lom lom kɨɓew, kɨ bĩ bĩã, 7kɨ ndar bal batg kɨnda kɔl, kɨ ndar hangg kɨ kam mant, kɨ kag akasia, 8kɨ yib kɨta lambag, kɨ nõkagg kɨta ɗago yib kurdɔt, kɨ kɨta nduj mbikam kɨkootmbĩ, 9kɨ medkɔsɨ oniksg, kɨ medkɔsɨg kɨ gatd i ngãi kɨta nda kam epodt kɨ kam yakutdɔ gut tɔ.
Nyag kɨdandang kɨta kujkub londɨ
(Oo 39:32-43)
10Kɨ dekɨdɨngãg tube kɨ ngeterrkam ɗe ɗan nyag tube'n Bɨraɓe nda mbera, 11ad i kujkub londɨ kɨ kubkut kada, kɨ kubkutdɔa, kɨ ningag loa, kɨ barkagg loa, kɨ kag kɨngalg loa, kɨ pilieg loa kɨ nyahɔdg, 12kɨ sund kɨ kag kɨngalg loa kɨ nyakutdɔa, kɨ kubganglo, 13kɨ tabɨl kɨ kag kɨngalg loa kɨ nyaɗakɨlaa tube kɨ kuɓɨr bɨna kɨnda nõt, 14kɨ kag nda lambag to kɨta kunj kɨ nyaɗa kɨlaag, kɨ bai lambag loa kɨ yiba, 15kɨ dɨngɨr mbikam kɨ kag kɨngalg loa, kɨ yib kurdɔt, kɨ nduj mbikam kɨkootmbĩ, kɨ kubkut tabit kand kam kujkub londɨt, 16kɨ dɨngɨr kadkari kɨlahorrt, kɨ nya la yalhorr loa kɨ ningakasɨ, Kɨ kag kɨngalg loa kɨ nyaɗakɨlaa tube, kɨ bai girr kutg. 17Kɨ pal kubg kɨta natlo, kɨ kagndog loa kɨ nyahɔdg, kɨ kubkut lo kand natlot, 18kɨ kagg kɨta dɔ kɨla hɔ pilie kujkub londɨ, kɨ kagg kɨta dɔ kɨla hɔ kagndog lo natlo lo kɨllag 19kɨ kubg kɨ joo'n majmaj kɨta ɗa kɨlaɓer kam lot kɨjaɓat ad i kubg kɨjaɓat kɨta Aarõ ngejanyamosɨkadkari, kɨ kubg kɨta ngana kɨta ɗan ne kɨlaɓer kam kɨla jamosɨkadkarit.
Deg ɗen kɨ kadkari adɨn Bɨraɓe
20Israelag ngékawna tube ɓain ro Moijt teen tɨga. 21Deg tube'n geen, kɨ deg tube'n kamd ndig ɗen kɨ kadkari adɨn Bɨraɓe kɨta kɨla kujkub ndɔdna kɨ Luwah kɨta kɨlaɓer loa tube, kɨ kɨta kubg kɨjaɓat. 22Deg ɗen, kɨdɨngãg kɨ kɨdẽg, ĩgɨn kamd ndig tube, ɗen kɨ ningag kɨ ninga mbig kɨ ninga kɔsɨdɔnyag, kɨ ninga jig, kɨ nya lɔrg kɨ dang dang, dekɨɗen la kadkari lɔr lon kɨ nda kɔtko kɨɗa ad Bɨraɓe. 23Deg tube'n ndɨn kɨ kɨla kub kɨkil musɨmusɨ, kɨ kɨkɨre wor wor kɨ kɨkɨre pirɨr, kɨ lẽ kɨ sɔl lom lom kɨɓew, kɨ bĩ bĩã, kɨ ndar bal batg kɨnda kɔl, kɨ ndar hangg kɨ kam mant ɗen ne. 24Deg tube ndig lan kadkari larjã kɨ ningakasɨ, unɨn kadkari lod ɗen ne adɨn Bɨraɓe. Tubeg'n awɨn kɨ kag akasia kɨ asɨ ɗan nya mad kɨta kɨla'n non ɗen ne. 25Dekɨdẽ ngéterrkamg tube ɓewɨn kɨla kub kɨ jid kamla ɔin kɨla kubg kɨ ɓewɨn non ɗen ne, ad i kɨla kub kɨkil musɨmusɨ kɨ kɨkɨre wor wor kɨ kɨkɨre pirɨr, kɨ lẽ kɨ sɔl lom lom. 26Dekɨdẽg tube'n kamd ge na ĩn kɨ goosɨ ye, ɓewɨn bĩ bĩãg. 27Mbaiɓeg ɗen kɨ medkɔsɨ oniksg kɨ medkɔsɨg kɨta nda kam epodt, kɨ kɨta yakutdɔ gu 28kɨ nõkagg kɨkootmbĩ, kɨ yib kɨta lamba kɨ kɨta yib kurdɔt kɨ kɨta nduj mbikam kɨkootmbĩ. 29Israelag tube, kɨdɨngãg kɨ kɨdẽg'n kamd ndig kad ɗen kɨ nyag kɨta kɨla tube'n Bɨraɓe ndad mbera kɨtakul Moij kad ɗan ye, ɗen kɨ kadkari kamndig adɨn Bɨraɓe.
Bɨraɓe kun Betsalel kɨ Oholiab kad ɗan kuj
(Oo 31:1-11)
30Moij el Israelag an: Oon Bɨraɓe kun Betsalel, ngon Uri kɨdɨngã ngon Hur ko girr Judat, kɨ tɔa, 31na ɗoosa kɨ Ndil Luwah kɨ terr kɨ terrkam kɨ nyager kɨ goosɨ ɗa kɨla tube, 32kɨtakad ɗan kɨla kɨ dang dang ad i kɨla lɔr kɨ kɨla Larjã kɨ kɨla ningakasɨ, 33kad tɔsɨn medkɔsɨg kɨta ndad kam nyahɔdt, kad tɔsɨn kag, na kad ɗan kɨlag tube. 34Luwah nda kamat kad ndoo deg nat kɨ Oholiab, ngon Ahisamak ko girr Dant. 35Luwah ɗoosɨd kɨ terrkam kad ɗan kɨla tube, ad i kɨlag tɔsɨ mbal kɨ goosɨ ɗa kɨla kɨ dang dang, kɨ kurnya, kɨ jo kub kɨ kɨla kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom, kɨtakad gerɨn go ɗa kɨla kɨ dang dang, kad ĩn ngegoosɨ kɨla tɔ.
Currently Selected:
Teekɨtɨga 35: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
