Teekɨtɨga 4
4
1Moij tur an: A admɨn kamd al, a oon ta lom al tɔ, kɨta a elɨn anan: Bɨraɓe tee hɔi kɨ romt al. 2Bɨraɓe ndɨjea an: Ɗi i jiit a? Moij tur an: Kag tɔsɨ. 3Bɨraɓe el an: I la ningt Moij la kagtɔsɨ lon ningt, na kagtɔsɨ loa tel li. Moij ãi nõ lit'n non. 4Bɨraɓe el Moij an: I la jii, i hɔn ɓonga Moij la jin hɔn ɓonga, na li tel kagtɔsɨ gog kam jiat. 5I kɨtakad geri ne Bɨraɓe Luwah lo bɔwdg, Luwah lo Abraham, Luwah lo Isaak, Luwah lo Jakob'n tee hɔi kɨ roit. 6Bɨraɓe ela gog tɔ an: I nda ji kadit. Moij nda jin kadɨnt, kamla ɔrr jin. Lon un jin a ne, banj ũ jiat ad jia ɔrr nda bung tit bul be 7Bɨraɓe el an: a i la jii kadit gog Moij nda jin kadɨnt gog, na lon un jin gog a ne, jia tel to kari tit ndeg roa. 8Luwah el an: A i titbe: Ĩla adin kamd al a ne, ke oon ndaa nyakɔj kɨdasa al kaa ne, maja a oon dɔ ta lo nyakɔj kɨkõjoo. 9Na ĩla a adɨn kamd nyakɔj kɨjoo'n non, ke a oon dɔ ndii al a ne, ɔd man bah ũ ningt, na man bah'n ɔd ye, a tel mosɨ dɔningt.
Luwah kɔt Aarõ kad ɗa kɨla nat kɨ Moij
10Moij el Bɨraɓe an: Bɨraɓe, mĩ ngegoosɨ kelta al, ke maɗi nu, ke tajigla lon elmɨn ta mĩ ɓer loi, kɨta tam ɔi ngãi ad m'elta ɔrr warang al. 11Bɨraɓe ela an: Nõ ɗa ta de a? Nõ tel de mbot, ke ngekelta jɨkjɨk, ke ngekoolo, ke mundo a? I mĩ Bɨraɓe ale? 12Kɨtɔ 'nten tajigla aw m'a mĩ nat kɨ tai, m'a m'ndooi nya'n a el.
13Moij el an: Bɨraɓe, m'kɔi kɨ i la de mad kɨɗang 14Kamla Bɨraɓe ɓawong kɨ Moij, el an: Ngonkõi Aarõ kɨ i Lebia i nõ ale? M'ger a asɨ kelta maj. Oo ĩ kɨɓe ndɨ ɗe kɨ n'ndɔdi. Lon a ooi ye, a ɗa ronel kamɨnt. 15A ela ta, a i nda tag taat. Mĩ tɔ, m'a mĩ nat kɨ tai kɨ taa, na m'a m'ndoosɨ nya'n a i ɗan. 16A i ngekelta deg kɨtɔi, a ga goot tai, na ĩ a i ga goot Luwah kɨtaa. 17A un kag tɔsɨ 'nten jiit, a i ɗa'n nyakɔjg.
Moij tel kɨgog dɔning Ejipt't
18Moij tel aw ro mumɨn Jetrot, ela an: M'kɔi kɨ i nyam adɨm m'tel m'aw ro ngankomt'n ndɨn dɔning Ejipt't, kɨtakad m'oo ke ndɨn kɨ dɔd dõ kari a? Jetro tur Moij an Aw kɨ kam kɨsokɨber 19Bɨraɓe el Moij kam dɔning Madiãt an: Aw, i tel kɨ dɔning Ejipt gog kɨta ngesah tɔli tube oin kɔ. 20Moij ɔi nẽn kɨ nganɨn kɨdɨngã, ndad dɔ korrot, tel kɨgog dɔning Ejipt't. Un kag tɔsɨ lo Luwah jint.
21Bɨraɓe el Moij an: Lon a i tel kɨ dɔning Ejipt gog ye, oo maj kad i ɗa nyag kɨyaya tube'n m'la jiit nõ Paraõt. Na m'a mad kama kongkong, a nya deg ad awɨn al. 22A el Paraõ an: Bɨraɓe el an: Israel'n i ngonɨm, i ngonderɨm. 23M'eli kad i nya ngonɨm ad aw kɨtakad ɗa kɨlaɓer adɨm Na ĩla i mbet nyàa kad aw a ne, oo maj m'a m'tɔl ngonderi kɨdɨngã.
24Go kawat, Bɨraɓe ndɔd Moij lon hɔ lot kad'n ɓit, sah tɔla. 25Kamla Sepora un gaj mbal kɨ at pepep jan gaj ngonɨn kɨdɨngã na laa nja Moijt, el an: Rota ĩ ngawɨm kɨtakul mosɨ. 26Na Bɨraɓe nyàa. Kamla Sepora el an: Ngawɨm kɨtakul mosɨ kɨgo ɗob gaj kɨja.
27Bɨraɓe el Aarõ an: Aw kam dɨlalot kad i ndɔd Moij Aarõ aw ndɔd Moij kad mbalbot lo Luwah, ɗaa lapia njuta. 28Moij el Aarõ tag tube lo Bɨraɓe'n lan, kɨ nyakɔjg tube'n ndaa mber kad ɗa. 29Moij kɨ Aarõ awɨn, kawɨn kɨbog lo Israelag tube kɨnat. 30Aarõ eltag tube'n Bɨraɓe el Moij, na ɗa nyakɔjg takum degt. 31Deg taan ta loa. Lon oon kad Bɨraɓe ɗe ro Israelagt, oo daiyog lod tɔ ye, ndɨn kɨ gojd ɔsɨn dɔd ber.
Currently Selected:
Teekɨtɨga 4: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
