Teekɨtɨga 40
40
Tɨlan kujkub ndɔdna kɨ Luwah ta nat
1Bɨraɓe el Moij an: 2Ndɔt kɨdasa lo nah kɨdasa i tɨla kujkub londɨ, kujkub ndɔdna kɨ Luwah ta nat. 3A i nda sund najkɨma gid kubganglot. 4A i ɗe kɨ tabɨl kamt, na a i ndah nyag dɔt kɨgoagoa. A i ɗe kɨ kag lambag, na a i ɗago bailambag loa. 5A i nda dɨngɨr lɔr kɨta mbikam nõ sund najkɨmat, na a i ga kubkut tabit kand kam kujkub londɨt dõ. 6A i nda dɨngɨr kadkari kɨlahorrt nõ tabit kand kam kujkub londɨt, kujkub ndɔdna kɨ Luwah. 7A i nda baigirr kut gid njat mbɨna kujkub ndɔdnat kɨ Luwah kɨ dɨngɨr kadkari, a urr man tit. 8A i tɨla palkubg nyag tube ta nat gugɨn dɔ natlo. A i ga kubkut lo kand kam natlot dõ. 9A i un yib kurdɔt urɨn kujkub londɨ kɨ nyag kɨ kamt tube. A i ndaa kɔtko kɨɗa kɨ nyag tube kɨ kamt, kad i kɨjaɓat 10A i wur yib dɨngɨr kadkari kɨlahorrt kɨ nyaɗakɨlaag tube. A i ndaa kɔtko kɨɗa, na dɨngɨr kadkari a i kɨjaɓat kɨtɔitɔi. 11A wur yib bai girr kutg ho, a i telan kɨjaɓat't. 12A i ɗe kɨ Aarõ kɨ ngana ta tabit kand kam kujkub ndɔdnat kɨ Luwah, na a i ndogd man. 13A i la kubg kɨjaɓat ro Aarõt, a i wura yib, a i ndaa kɔtko kɨɗa kɨtakad ɗa kɨlaɓer adɨm kam kɨla jamosɨkadkarit. 14A i ɗe kɨ ngana, na a i la kubg rodt. 15A i wurd yib tit'n urɨn bɔwd kɨtakad ɗan kɨlaɓer admɨn kam kɨla jamosɨkadkarit Kur yib'n non a ad'd kɨla jamosɨkadkari mbãkɨnõt kɨ ngakat kɨ ngaka.
Moij ad ndan dɨngɨr kadkari
16Moij ɗa titbe kɨgo nyagt tube'n Bɨraɓe ndaa mbera, titbe la ɗan ye. 17Taa ne, kam naht kɨdasa lo ɓal kɨkõjoo, ndɔt kɨdasa, tɨlan kujkub londɨ ta nat. 18Moij tɨla kujkub londɨ ta nat, ndah nyahɔag ber, na ɔsɨ barkag loa dõ, la kag kɨngalg tit, na ɔsɨ pilieg kɨ dõ. 19Ga kub kutdɔ kuj londɨ dõ, na la nyakutdɔ kujkub'n non dõ dɔt, tit'n Bɨraɓe ndan mbera Moij.
20Kamla un bar mbalg najkɨma kɨndang nya dɔt, ndaa kam sundt, la kag kɨngalg kad sund, na ndah nyakutdɔ dɔ sund. 21Un sund ɗen kam kujkub londɨt, na ga kub ganglo dõ utɨn sund najkɨma kɨ keme tit'n Bɨraɓe ndan mbera Moij.
22Nda tabɨl kam kujkub ndɔdnat kɨ Luwah kad kujkub londɨ ko ɓodo nõ kubganglot. 23Nda kuɓɨr bɨna kɨ njɔra njɔra dɔt nõ Bɨraɓet, tit'n Bɨraɓe ndan mbera Moij.
24Nda kaglambag kam kujkub ndɔdnat kɨ Luwah sumba nõ tabɨl sew, kad kujkub londɨ ko dɔɔ. 25La horr bailambag nõ Bɨraɓet, tit'n Bɨraɓe ndan mbera Moij.
26Nda dɨngɨr lɔr kam kujkub ndɔdnat kɨ Luwah nõ kubganglot. 27La horr mbikam kɨ ɗa kɨ nõkagg kɨkootmbĩ, tit'n Bɨraɓe ndan mbera Moij.
28Ga kubkut tabit kand kam kujkub londɨt dõ. 29Nda dɨngɨr kadkari kɨlahorrt nõ tabit kand kam kujkub ndɔdnat kɨ Luwah, na la kadkari kɨlahorrt dɔt kɨ kadkari nduj ko tit'n Bɨraɓe nda'n mbera Moij.
30Nda bai tugo nja mbɨna kujkub ndɔdnat kɨ Luwah kɨ dɨngɨr kadkari, urr man kamt kɨta tugo ro. 31Moij kɨ Aarõ kɨ ngana awɨn ta bai girrkut't nõ, tugon jid kɨ njad. 32Lon a andɨn kam kujkub ndɔdnat kɨ Luwah a ndɔt'n kɨkad dɨngɨr kadkarit ye, a tugon rod tit'n Bɨraɓe ndan mbera Moij.
33Tɨla palkub lo natlo ta nat gugɨn dɔ kujkub londɨ kɨ dɨngɨr kadkari, na ga kubkut tabit kand kam natlot dõ. Titbe la Moij tɔlɨn kɔn kɨla ye.
Kunj Bɨraɓe kɨɗangeɗeng unj kam kujkub ndɔdnat kɨ Luwah
34Kilndii ut dɔ kujkub ndɔdna kɨ Luwah, na kunj Bɨraɓe kɨɗangeɗeng unj kam kujkub londɨt kɨtaagbe. 35Moij asɨ kand kam kujkub ndɔdnat kɨ Luwah al kɨta kilndii ndɨdɔt, na kunj Bɨraɓe kɨɗangeɗeng unj kam kujkub londɨ kɨtaagbe. 36Kaglo ndiadt tube, lon kilndii ɓai dɔ kujkub londɨt a ne, ngan Israelg tɔ a ɓai awɨn, 37na lon kilndii ɓai al a ne, ĩn tɔ a ɓai awɨn al mbã ndɔt'n kilndii ɓai kamtã. 38Kɨtɔ kilndii lo Bɨraɓe a ndɨ dɔ kujkub londɨt kàda, na horr a i kamt ndɔ takum ngékɨɓe lo Israel tube kaglo ndia mbaht lod tube.
Currently Selected:
Teekɨtɨga 40: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
