Lebitik Takɨdɔt
Takɨdɔt
Maktub 'nten, deg'n ndangɨn ye in ngéjanyamosɨ kadkarig, kɨta in deg kɨ kɨlaɗad ndaa tot ngãi ku ngan Israelt. Kaglot kɨ maɗi, ngéjanyamosɨ kadkarig in deg kɨ teen ko girr Lebit. Nyan 'nten la a kunɨnd ne Lebitg ye.
Maktub Lebitik i maktub mberkɨndag kɨdangdang'n Luwah ad Moij kad ad ngan Israelg.
Maktub kon kunkɔ taa ne elta dɔ ɗobgt kɨdangdang'n Luwah la kɨta hɔn nam kɨ girrdeg lon. Telro go mberkɨndagt'n Luwah ad'd ɔj go namna'n Luwah hɔ sed. Nya mad i ɗa kɨlaɓer kad Luwah kɨ kɔsɨ dɔ ber nõat. Dɔning Israelt, ngéjanyamosɨ kadkarig in deg kɨ ndah kɔtkokɨɗa kɨta ɗa kɨlaɓer kad Bɨraɓe. A ngahn kaglo kɨta ɗa nõ Luwaht, kɨ ɗa nam na sia ho, in tɔ la a lan kadkarig kɨdangdang'n deg a ɗen ne adɨn Luwah tɔ ye. Kadkarig ĩn nya kɨ ndaa tot kɨta ĩn nyag kɨ deg ɗene kɨ nõ Luwaht. Na Luwah taa ne, a ɔj ron ho, a nyàgo majal lo deg'n ɗan ho. Maj kad kɨ ger go ɗob kɨ titbãi kadkarig'n non, lon deg a lan ye kad nel Bɨraɓe.
Leb 1:1—7:38, maktub Lebitik elta kɨ ɔj dɔ mberkɨndag kɨ ndikung kɨta lan kadkarig kad Luwah.
Leb 8:1—10:20, maktub Lebitik elta dɔ go ɗob kɨ titbãi ngéjanyamosɨ kadkarig a ɗan ne kɨlaɓer adɨn Bɨraɓe.
I Kaglot kɨ maɗi dɔning Israelt, ta kɨ dɔ nyat kɨjaɓat't kɨ nya kɨjaɓat al ye, ndaa i ngãi. Kɨtɔ sumba kad ngejanyamosɨ kadkari i de kɨjaɓat kamla a asɨ ɗa nõ Luwaht kad la kadkari ada ye. Nya'n i nya kɨkar nyang, ke kɨjaɓat i nya kɨ bur kɨ nya mad al, na i nya kɨ kasɨnatap kɨkanj kad de ngah majal mad roat.
Leb 11:1—16:34 kam maktub Lebitikt Luwah i Luwah kɨkunjɗang. Lon de el an Luwah i Luwah kɨkunjɗang ye, i kel kan Luwah i dang kɨ deg ho, na i kɨ kɨɗanbe la i Luwah ye. Ĩla de mad, ke nya mad, i kɨjaɓat a ne, i nya kɨ nda kɔtko kɨɗa kɨta Luwah. Maktub kunkɔt kɨ kete el an: Girrdeg kɨ Israel in deg kɨjaɓat lo Luwah. Nyan 'nten maj kad ndɨ kɨ dɔ dõ lod sumba kad i dang kɨ kɨ lo ndeg girrdeg.
Leb 17:1—27:34 lo maktub Lebitik, daj ɗob kɨ titbãi ngan Israelg maj kad arɨn ne rod ho, ndulon ne go Luwah ho. Girr nyan maj kad arɨn ne rod ho, telɨn ne kɨkujɗang la ten: I jan rosɨ ɓat dɔ majalt kɨ ɗa kɨta mĩ Bɨraɓe Luwah losɨ mĩ kɨkunjɗang (Leb 19:2). Leb 19, elta dɔ nam nat kɨ hɔ lo ngan Israelg kɨ Luwah, kɨ deg kɨ kam dɔningt'n ndɨn tit, kɨ Israelg, kɨ girrdeg kɨ dang dang.
Mberkɨnda dɔ tart, i nya mad kɨ to tɨga wakɨsɨ kam maktub Lebitikt asɨ girr joo. Kɨdasa (Leb 19:18). A i tar madɓei tit roi be. Na mbah'n hɔlondɨ kusɨt ye, oon na tit ngon ngeɓe be, a i tara tit roi be, kɨta maɗi in mbahg kam dɔning Ejipt't (Leb 19:33-34).
Mberkɨndag kɨ ndikung ɔj go ɗob kɨ sah kɨta kɔsɨ dɔ ber nõ Luwaht. Ɓone kaa, nyan 'nten to lo tont, ɔj'j kad kɨ sah go nam na kɨ hɔ kɨ Luwah, ndaa nooj kɨ hɔ ye, a to lo tont mbãkɨnõt.
Currently Selected:
Lebitik Takɨdɔt: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.