Teekɨtɨga 6
6
1Bɨraɓe el Moij an: A oo tajigla nya'n m'a m'ɗa kɨ Paraõ, kɨta kɨtakul ji kɨtɔg la a nyadɨn ad awɨn, kɨtakul ji kɨtɔg tɔ la a tuɓadɨn kɔ kam dɔningt lon. Luwah kun Moij kun kɨkõjoo.
Luwah un kɔn ad Moij kad n'tee kɨ Israelg ɓe ɓert
2Luwah elta Moij an: Mĩ Bɨraɓe. 3Mĩ Luwah Ngetɔgtube, m'tee hɔi kɨ ro Abrahamt kɨ Isaak kɨ Jakob, na gerɨmɨn rodt kɨ tɔm kɨ Bɨraɓe al. 4M'un kɔm m'ad'd mad to kɨɗubagt, m'a m'ad'd dɔning Kana, ad i dɔning kawd kɨ nja dõ, dɔning'n ndɨn mbaht. 5M'oo dɔ tõ ɗusɨɗusɨ lo Israelag'n Ejiptiag ndɨ hɔnd bá kam kɨlaɓert, na m'ga dɔ kunkɔt lom. 6Kɨtɔ 'nten el Israelag an: Mĩ Bɨraɓe, m'a m'tee sesɨ kɔ girr kɨlaɓert kɨkɔi lo Ejiptiag, m'a m'ɔrrsɨ kɔ kam ɗa ɓert lod, m'a m'ug m'ɔrrsɨ kɨ ji kɨ la kɨ dõ kɨ takɨgangg kɨbobe. 7M'a m'taasɨ kɨ romt kad ĩn deg lom, m'a mĩ Luwah losɨ, a i gerɨn kad mĩ Bɨraɓe Luwah losɨ'n tee sesɨ kɔ girr kɨlaɓert kɨkɔi lo Ejiptiag. 8M'a mad andɨn kam dɔningt'n m'ndan yo mad Abraham kɨ Isaak kɨ Jakob, m'a m'adsɨ nyakagɓet, mĩ Bɨraɓe. 9Moij el Israelag titbe, na oon dɔ ta lo Moij al kɨta kamd il bɨrɨm kɨta kɨlaɓer kɨkõkõ. 10Bɨraɓe el Moij an: 11Aw, i el Paraõ ngar kɨ Ejipt't kad nya Israelag ad teen kam dɔningt loa kɔ 12Moij turta takum Bɨraɓet an: Israelag oon dɔ ta lom al, titbãi Paraõ a oon dɔ ta lom mĩ'n tam ɔi dɔ keltat a? 13Bɨraɓe elta kɨ Moij kɨ Aarõ, ndadɨn mber kɨta Israelag ho kɨta Paraõ ngar kɨ Ejipt't kad tee kɨ Israelag kɔ kam dɔning Ejipt't.
Ngaka Moij kɨ Aarõ
14Ĩgɨn ten la in bɨrabɔwg lo ngékɨɓe lo bɔwdg. Ngan Ruben kɨdɨngã ngonderr Israel i Henok kɨ Palu kɨ Hesron kɨ Karmi, Ĩgɨnon la ĩn ngékɨɓe lo Ruben.
15Ngan Simeõ kɨdɨngã ĩn Yemuel kɨ Yamin kɨ Ohad kɨ Yakin kɨ Sohar kɨ Sawul ngon kooj Kana mad kɨdẽ, Ĩgɨnon la ĩn ngékɨɓe lo Simeõ.
16Ĩgɨn ten la ĩn tɔ ngan Lebi kɨdɨngã kɨgo koojdt: Gerson kɨ Kehat kɨ Merari. Ɓal'n Lebi ndɨn kɨ dɔn dõ i ɓu kɨdɔmɨta gidaitanaimɨta. 17Ngan Gerson kɨdɨngã ĩn Libni kɨ Simei kɨgo girrkoojdt. 18Ngan Kehat kɨdɨngã ĩn Amram kɨ Jisehar kɨ Hebrõ kɨ Ujiel. Ɓal'n Kehat ndɨn kɨ dɔn dõ i bu kɨdɔmɨta gidaimɨta. 19Ngan Merari kɨdɨngã ĩn Makli kɨ Musi. Ĩgɨn non la ĩn ngékɨɓe lo Lebi kɨgo koojdt.
20Amram ta bãrin Jokebed nẽnt, ooj sia Aarõ kɨ Moij. Ɓal'n Amram ndɨn kɨ dɔn dõ i ɓu kɨdɔmɨta gidaitanaimɨta. 21Ngan Jisehar kɨdɨngã ĩn Kore kɨ Nepeg kɨ Jikri. 22Ngan Ujiel kɨdɨngã ĩn Misael kɨ El Japan kɨ Sitri.
23Aarõ taa Eliseba ngon Aminadab kõnan Nason nẽnt, ooj sia Nadab kɨ Abihu kɨ Eleajar kɨ Itamar.
24Ngan Kore kɨdɨngã ĩn Asir kɨ Elkana kɨ Abiasap ĩgɨn non la ĩn ngékɨɓe lo Kore.
25Eleajar ngon Aarõ ta kɨkɨɗa ku ngan kɨdẽgt lo Peltiel nẽnt, ngon kɨdẽ'n non ooj sia Pinẽas. Ĩgɨn non la ĩn bɨrabɔwg lo Lebiag kɨgo girrkoojdt.
26I Aarõ kɨ Moij nõ la Bɨraɓe eld an: I teen kɨ Israel kɔ kam dɔning Ejipt't kɨgo ɓut koosɨdt. 27I Ĩgɨnon la elɨn ta Paraõ ngar kɨ Ejipt kad teen kɨ Israelag kɔ dɔning Ejipt't ye. Ĩgɨn non i Moij kɨ Aarõ ka nõ.
Bɨraɓe la ta ji Moijt
28Ndɔt'n Bɨraɓe elta Moij kam dɔning Ejipt't ye, 29Bɨraɓe el Moij an: Mĩ Bɨraɓe. El Paraõ ngar kɨ Ejipt nyag tube kɨ m'ndɨ m'eli nõ 30Moij turta takum Bɨraɓet an: Mĩ'n tam ɔi dɔ keltat, titbãi Paraõ a oon dɔ ta lom a?
Currently Selected:
Teekɨtɨga 6: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
