Yaɓooda 19
19
Bɨraɓe nuj ɓebog, Sodom kɨ Gomor
1Malaikag kɨjoo'n non ten ɓebo Sodomt lokɨsɔle, na Lot ndɨ ber tabit kand kam ndogbɔrrt kɨ Sodom. Lon Lot ood ye, ɓai dõ kad n'la tad, na ɔsɨ dɔn ber kɨ takumɨn kɨ dɔningt. 2Lot el an: M'kɔsɨ ngémg, kɨ andɨn kam kujt lom mĩ ɓer losɨ kad i hɔn loɓit, i tugon njasɨ, kamla ka i ɓain kɨsĩ ritit i son ɗobo ye. Turɨna anan: Ã ã J'a kɨ hɔ lo ɓi natɓet. 3Na Lot kɔd kɨ rotĩn mbã ad ɗen ɓe loa, na andɨn kuju, ɗa nyasa ad'd, tɨnga bɨna kɨ lɔi kanj berrkasɨ, ad'd san.
4Ton ber al ɓaitɔ a ne, deg kɨ ɓebot kɨ Sodom ɗe gugɨn dɔ kuj gej, de kɨdɔdug kɨ ngahtɔgg, deg tube kɨ kam ɓebot kɨ ndɨ gidt goto. 5Kunɨn Lot, ndɨjena anan: Dekɨdɨngãg'n ɗen roit ndɔ la ye, ĩn ɗah a? Ad'd teen kɨtɨga rojt kad kɨ to sed 6Lot tee tɨga kɨ rodt, na ut tabit gont. 7El an: Ngankom m'kɔsɨ kad i ɗan sed majal al. 8Oon nganɨm kɨdẽg ĩn nõ joo, kɨ gerɨn ngawg al ɓaitɔ, adɨm m'tee sed tɨga kɨ rosɨt kad i ɗan sed nya'n kamsɨ ndig; na ot ɗan nya kɨ dekɨdɨngãg'n non, kɨtɔ ɗen kam kujt lom 9Elɨn Lot: I ɗa kɨgog nõ Tel elɨn na anan: De'n ɗan i mbah la danjt ye, na ge kɨ nĩ ngegangta kuujt. Maj j'a kɨ ɗa sia majal kɨ tɔid ɓaitɔ. Ɔsɨn Lot kɨ tɔgd, ndɔt'n kad kɨ n'tetɨn tabit kuj. 10Na deg kɨjoo'n non lan jid hɔn ne Lot, ɔrrɨna kɨ rodt kam kujt, na utɨn tabit. 11Ndan deg'n ɗan tabit kujt ad telɨn mundog, kɨdug kɨ kɨbog, adɨn rod kõ ngãi, na asɨn ngah tabit al.
12Deg kɨjoo'n non ndɨjen Lot anan: Ĩ kɨ deg madg la tɔ ɔ? Mumi kɨdɨngã kɨ ngani kɨdɨngã kɨ kɨdẽ, ke de loi mad kam ɓebot'n ɗan, i tee sed kɨtɨga kɔ lot 'nten 13J'a kɨ nuj lo 'nten kɔ kɨtɔ ko kɨ ndoor deg kɨ kamt i ngãi nõ Bɨraɓet, na Bɨraɓe laj kad kɨ nujakɔ. 14Lot tee, el mumɨng ngétaa ngana kɨdẽ an: I ɓain dõ, i teen lot 'nten kɔ, Bɨraɓe a nuj ɓe'n ɗan. Na mumag oona tit ɗa el ta ɗeb be.
15Lon, lo ndɨ sah ti ye, malaikag ɔsɨn Lot tõtõ anan: I ɓai dõ, ɔi nẽi kɨ ngani kɨdẽ kɨjoo'n ndɨn ne, na i teen kɔ kam ɓet'n ɗan, na ɓeta i nujɨn kɔ kam takɨgangt. 16Tit'n ndɨ kɔkɨ ɓaitɔ ye, deg'n non hɔn jia kɨ ji nẽa kɨ ji ngana kɨdẽ kɨjoo, kɨtɔ Bɨraɓe oo kumtondo loa, na ɔrrɨna kam ɓebot kɨtɨga. 17Lon ten sed kɨtɨga woi ye, kɨkɨɗa ku malaikagt el an: Ãi aj roi Ot mbel koo lo kɨgoit, na ot dɨba lot mad kam dɨlambot. Ãi kɨdɔ mbalbot, na ɓeta i nuj kɔ. 18Lot el an: Ã ã Bɨraɓe i root al. 19Oo ɓer loi ngah maj takumit, na ɔjɨm kamkẽ loi kɨbobe kɨ lo kajt'n aj rom. Na mĩ m'asɨ kãi tee dɔ mbalbot'n non al, kanj kad nya mad kɨmajal tee dɔmt pat ad m'oi. 20Oon ɓe'n ɗan i nderbe kad m'ãi kɨtit, na i ɓe kɨ tee nya al. M'kɔi kad m'ãi m'yarom tit. I nya ndije kɨ tẽbe kad de ndɨn kumkajir. 21Na tur an: Oo m'ndig dɔt sei, na m'ɗa sei maj nja kɨɗa ɓaitɔ. Ɓe'n eltaa nõ, m'a m'nuja al. 22Ãi kanangbe aw i yaroi nu, kɨtɔ m'asɨ ɗa nya mad al mbã i tee tit kamtã. Kɨtɔ 'nten la ndan ne tɔ ɓe'n non Soar ye. 23Lon Lot tee Soart ye, kàd ɓa oi.
24Taa ne, Bɨraɓe ũ horr kɨ õ giling giling kɨ tuson ko ro Bɨraɓet ko dõ dɔrãt kɨdɔ ɓebo Sodomt kɨ kɨdɔ ɓebo Gomort. 25Nuj ɓebog'n non, kɨ dɨlalo kɨtaagbe, kɨ deg tube kɨ kam ɓebogt'n non nat kɨ nyag kɨ ɓan dɔningt. 26Nẽ Lot mbel oo lo ko gont, na tel dɨngɨr bu kat.
27Abraham ɓai kɨsĩ ritit, aw lot'n ɗat kete nõ Bɨraɓet, 28oo lo kɨ Sodom kɨ Gomor kɨ dɨlalo kɨtaagbe, na oo sahorr ɓa dɔningt su luilui kɨ dõ tit kɨ sahorr purr be. 29Lon Luwah nuj ɓeg kɨ go gor lot'n non kɔ ye, Luwah gah dɔ Abrahamt, na ad Lot tee kam nujt'n nujɨn ɓebog'n Lot hɔlondɨt.
Ngan Lot kɨdẽ oojɨn Moab kɨ Amon
30Lot ɓai Soar, aw hɔlondɨ dɔ mbalbot nat kɨ nganɨn kɨdẽ joo, kɨtɔ ɓool ndah ɓe Soart. Na hɔlondɨ kam bulombalt, ĩ kɨ nganɨn kɨdẽ kɨjoo. 31Ngonderra el ngon gon an: Bɔwj tel bɨga, na dekɨdɨngã kɨ dɔningt kad ɗe rojt kɨgo nyaɗat lo deg kɨ dɔningt tube goto. 32I ɗe, ad jad kasɨnduu bɔwj ãi, na ad kɨ to sia kɨtɔkad kɨ ndahn koh bɔwj. 33Adɨn kasɨnduu bɔwd ãi ndɔ nõ. Ngonderra kɨdẽ to kɨ bɔwɨn. Bɔwa ger go ton ngona kɨdẽ to ber kadat al ho, ke go ɓai'n ɓain nõ al ho. 34Loti got ngonderra kɨdẽ el ngonkõn an: Tagbe ndɔ m'to kɨ bɔwɨm. Ad kɨ Jada kasɨnduu ãi ndɔ ne ɓaitɔ, kamla ka i aw i to sia ho kad kɨ ndahn koh Bɔwj. 35Adɨn kasɨnduu bɔwd ãi kondɔt'n non tɔ. Ngongoa ɓai aw to kɨ bɔwɨn. Bɔwa ger go tɔa kɨɓer al ho ke go ɓaia kɨ dõ a ho. 36Ngan Lot kɨdẽ kɨjoo ndanɨn ngang kɨ bɔwd. 37Ngonderr ooj ngon kɨdɨngã, na ndah tɔa Moab. I bɔw Moabiag, ĩn nõ mbã ɓone. 38Ngongoa ooj ngon kɨdɨngã ho, na ndah tɔa Ben Ami. I bɔw Amoniag, ĩn nõ mbã ɓone.
Currently Selected:
Yaɓooda 19: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
