Yaɓooda 21
21
Kooj Isaak
1Bɨraɓe ga kamɨn dɔ Sarat tit'n hã ela'n, na ɗa sia tit'n unɨn kɔn ada. 2Sara nden ngon, na ooj kɨdɨngã ad Abraham dɔ bɨgaat tit Luwah ela'n kete. 3Abraham ndah tɔ ngon kɨdɨngã'n Sara ooj ada: Isaak. 4Lon ndɔ ngon asɨ jijoo ye, Abraham jaa gaj, tit'n Luwah ndaan mbera. 5Ɓal Abraham asɨ ɓukɨɗa lon oojɨn ngonɨn Isaak. 6Sara el an: Luwah ad m'go, na deg tube'n a oon hoita 'nten ye, a gomɨn. 7Tel el tɔ an: Kete, nõ el Abraham kad Sara a la mba ta ngangt a? Na m'ooj ngon kɨdɨngã m'ada dɔ bɨgaat.
Sara ad Abraham tuɓa Agar kɨ Ismael
8Ngon tɔg, Sara ɔga mba. Abraham ɗa mburnam kɨbobe ndɔt'n Isaak oron mba.
9Sara oo ngon'n Agar kɨ Ejiptia ooja ad Abraham, ndɨ ɗew kɨ ngonɨn Isaak. 10Kamla el Abraham an: I tuɓa ɓer kɨdẽ'n ndɨn kɨ ngona kɨdɨngã, kɨtɔ ngon ɓer'n ndɨn sumba kõnduba nat kɨ ngonɨm Isaak al 11Ta 'nten ad wong Abraham ngãi, kɨtɔ Ismael i ngona. 12Luwah el Abraham an: Ot ɓa wong kɨtɔ ta kɨ dɔ ngonɨnt ke kɨ dɔ ɓert loi kɨdẽ. Ta ɗi hã Sara el a ne, i tel roi goot kɨtɔ kam Isaakt la a kunɨn kohit ye. 13Na ko ro ngon kooj ɓert kɨdẽ m'a m'ɗa girrdegt ho kɨtɔ i ngon kami ho.
14Abraham ɓai kɨsĩ ritit, un nyasa kɨ gal man ad Agar la ngon dɔ bɔgat ada aw. Tɔi aw, na a gug kɨ njan dõ kam dɨlalot kɨ Beer Seba. 15Lon man kɨ kam galt tɨga ye, Agar la ngon girr ngon kagt mad, 16aw ndɨ ber sãi sĩ asɨ kurlo kurr kɨrã be kɨtɔ el an: Kad m'oo koi ngonɨm kɨ kum al. Kɨtɔ 'nten ndɨ ber sumba ngon sew, na un ndin kɨ dõ nõn. 17Luwah oo dɔ ndi ngon kɨdɨngã, na malaika lo Luwah kun Agar ko dõ dɔrãt, ela an: Agar, ɗi ɗai a? Ot ɓool kɨtɔ Luwah oo dɔ ndi ngon kɨdɨngã lot'n tot nõ. 18I ɓai, un ngon kɨ dõ, i hɔa jiit, kɨtɔ m'a m'tela girrdeg kɨbɨlan ngãi 19Kamla Luwah tee kum Agar ad oo buloman, aw ut man kam galt, na ad ngon kɨdɨngã ãi. 20Luwah i nat kɨ ngon kɨdɨngã, na ngon tɔg asɨ basa. Hɔlondɨ kam dɨlalot, na tel ngekurr kɨrã. 21Hɔlondɨ kam dɨlalot kɨ Parã. Kõa taa dekɨdẽ kɨ dɔning Ejipt't ada.
Abraham kɨ Abimelek unɨn kɔd adɨn na
22Kaglot'n non Abimelek ɗe nat kɨ Pikol, bɨradɔ ngéɗɔɔg loa. Abimelek el Abraham an: Luwah i nat sei kam nyagt tube'n i ɗa. 23Kɨtɔ 'nten nẽbe tajigla i nda yo adɨm kam tɔ Luwaht kad a i goolɨm al, ke nganɨmg, ke ngakaam, na kɨgo kamkẽt'n m'ɔji ye, a i hɔ sem nam titbe tɔ kam dɔningt 'nten kɨ i hɔlondɨ kamt titbe ho. 24Abraham el an: M'nda yo m'adi. 25Na Abraham aw kɨ ta nõ Abimelek kɨtɔ buloman'n ɓerg lo Abimelek taan kɨ lo ngetɔgt. 26Abimelek tur an: M'ger de'n ɗa nya 'nten al, ĩ kaa ɔrrɨm hoia al ho. Na mĩ, ɓone la m'ndɨ m'oo dɔ taa ye. 27Abraham hɔ batg kɨ mangg ad Abimelek, na in tujoo unɨn kɔd adɨn na. 28Abraham ndah mand batg tanãimɨta kam ɓut't kɔtko kɨɗa. 29Na Abimelek ndɨje Abraham an: Mand batg kɨtanãimɨta'n i ndahd kɔtkokɨɗa ye, ɗa ɗan ɗi a? 30Abraham tur an: I taa mand batg kɨtanãimɨta'n ɗan jimt, a in nyamanajg kad i mĩ la m'ur buloman'n ɗan ye. 31Kɨtɔ 'nten la, ndan ne tɔ lon non Beer Seba kɨtɔ ĩn tujoo ndan yo adɨn na loat'n non. 32Unɨn kɔd adɨn na Birr Sebat. Kamla Abimelek ɓai nat kɨ Pikol bɨradɔ ngéɗɔɔg loa, na tel awɨn dɔningt lo Pilistiag gog. 33Abraham hɔ kag m'asɨ Birr Sebat, na nõbe la ko kɨdɔ Bɨraɓet, kunɨn tɔa Luwah Ngéndɨ kɨnõt. 34Abraham hɔlondɨ dɔningt lo Pilistiag ndɔ ngãi.
Currently Selected:
Yaɓooda 21: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
