Lebitik 11
11
Dãg kɨ kar kɨ kɨkar al
1Bɨraɓe el Moij kɨ Aarõ an: 2Elɨn Israelag anan: Oon dãg kɨ sumba kad i sand ku dãgt tube kɨ dɔningt laten: 3A i san dã kɨɗen'n kɨngotinjaa tɔ joo, na a sanya na tel ɔsɨ sa gog.
4Na ĩgɨn san nya na tel ɔsɨ san gog koon ke kɨngotinjad tɔ joojoo koon, a i sand al. Titbe a i san lukum al kɨta sanya na tel ɔsɨ sa gog, na kɨngotinjaa tɔ joo al. A i oona tit nya kɨyerr. 5A i san brangg al, kɨta a sanya tel ɔsɨ sa gog na kɨngotinjaa tɔ joo al, a oona tit nya kɨyerr. 6A i san dɔgdɔgum al, kɨta sanya tel ɔsɨ sa gog, na kɨngotinjaa tɔ joo al, a i oona tit nya kɨyerr. 7A i san boor al kɨta kɨngotinjaa tɔ joo, njaa gaj joo na sa nya na tel ɔsɨ sa gog al, a oona tit nya kɨyerr. 8A i san dãd al, a ɔdɨn nind al tɔ, a oond tit nya kɨyerr.
9Nyag kɨ kam mant'n a i sand laten: A i san nya kɨɗen'n aw kɨ mbɨr gidɨn kɨ ngɔn, ke kam mant ke kam bahbot ke baht kɨdu. 10Nya kɨɗen kɨ kam bahbot ke baht kɨdu'n ninga mbɨr gida ke ngɔa goto, ad i nyag'n awɨn kam mant ke ndɨn kam mant, a i oond tit nya kɨyerr. 11Nyag'n non a ĩn nya kɨyerr rosɨt, a i san dãd al, a i oond tit nya kɨyerr. 12Nyag tube kɨ kam mant'n mbɨrd, kɨ ngɔd goto, a i oond tit nya kɨyerr.
13Oon, yelg'n ĩn kɨyerr rosɨt, na a i sand al, laten: Kurro, girra kɨ korko, 14kɨsoli kɨ wara kɨ dang dang 15kagã kɨ dang dang kɨɗen, 16bulum, kɨ lew kɨderbah, ndulogidɓe kɨ dang dang, 17koibaɗor, yelman kɨ kɔibo, 18lubo kɨ ngadĩ kɨ malg 19gõ kɨ mana kɨ gonkadndɔg kɨ dang dang lawdari kɨ dow.
20Nya kɨ kɔrkɔdber kɨɗen kɨ ɓai kɨ bɔgɨn'n aw kɨ njan kɨsɔɔ a i kɨyerr rosɨt, 21na ku nyagt ngékɔrkɔdber tube'n ɓain kɨ bɔgd, ndian kɨ njad kɨsɔɔ, a i san ĩgɨn awɨn kɨ kurnjad kad talɨn ne dɔningt. 22Oon, ĩgɨn a i sand laten: Kɨbet kɨ dang dang kɨɗen, kɨdaa kɨ kɨɗen, kɨndir kɨɗen kɨ taw kɨɗen. 23Ndeg nyag ngékɔrkɔdber tube'n awɨn kɨ bɔgd kɨ njad kɨsɔɔ a oond tit nya kɨyerr.
Kɔd nya kɨ a tel de kɨyerrt
24Kɨtɔ nyag'n non la a i telɨn ne kɨyerr ye dekɨɗen'n ɔd nind a ne, a i kɨyerr mbã lokɨsɔle. 25Dekɨɗen'n un nin nyag'n non a ne, a tugo kub lon na a i kɨyerr mbã lokɨsɔle.
26Dã kɨɗen'n aw kɨ kɨngotinjan nõ tɔ joo al, sanya na tel ɔsɨ sa gog al tɔ a ne, a i oona tit nya kɨyerr. Dekɨɗen'n ɔd'd a ne, a i kɨyerr. 27Dãg tube'n awɨn kɨ kɨmunr njad, na ndian kɨ danjad a i oond tit nya kɨyerr. Dekɨɗen'n ɔd nind a ne, a i kɨyerr mbã lokɨsɔle, 28na de'n un nind a ne, a tugo kub lon, a i kɨyerr mbã lokɨsɔle. A i oond tit nya kɨyerr. 29Dãg ngékag dɔningt'n a ĩn kɨyerr rosɨt laten: Yegg kɨ dang dang yeg tɔr kɨ burrg kɨ dang dang, 30kɨbɔ, mar, burmong, ngarwãi kɨ kɨlãi. 31Ĩgɨn non la a ĩn kɨyerr rosɨt ku dãgt kɨ ngekɔrrkɔd'd ber tube. Dekɨɗen'n ɔd nind a ne, a i kɨyerr mbã lokɨsɔle. 32Nya kɨɗen'n nind so dɔt a ne, a tel kɨyerr. Kag kɨɗen kɨ tɔsɨ nyaɗakɨlat kɨ kub, ngɨra, ɓool, nya kɨɗen kɨ ɗan ne kɨla a ũn kam mant na a i kɨyerr mbã lokɨsɔle, kamla a tel kɨkar ye. 33Jo ning kɨɗen'n nind so kamt a ne, nyag kɨ kamt tube a ĩn kɨyerr ho, a i ton jo'n non kɔ. 34Nyasa kɨɗen'n man tugo nya kɨyerr so dɔt a ne, a i kɨyerr, nyakãi kɨɗen kɨ kam jomant kɨ titbe a i kɨyerr. 35Nya kɨɗen'n nind so dɔt a ne, a i kɨyerr, pur ke mbahil a tond kɔsɨ kɔsɨ. In kɨyerr na a i oond tit nya kɨyerr. 36Lo ɓa man ke man kɨnu a i kɨjanjoi, na nya'n ɔd nind a ne, a i kɨyerr. 37Ĩla nind so dɔ kum nyat kɨta dub a ne, kum nya'n non a i kɨkar, 38na ĩla ũn man dɔ kum nyat mad kamla nind so dɔt a ne, kum nya'n non a i kɨyerr.
39Ĩla dã mad'n i dã sasɨ oi a ne, de'n ɔd nina a i kɨyerr mbã lokɨsɔle. 40De'n sa dã kɨkoi'n non a tugo kub lon, a i kɨyerr mbã lokɨsɔle, na de'n un nin dã'n non a tugo kub lon, a i kɨyerr mbã lokɨsɔle. 41Dã kɨɗen ngekɔrkɔd ber kɨdɔningt a ne, i kɨyerr rosɨt, a i san al. 42Nya kɨɗen kɨ ag dɔningt ke ngekɔrkɔd ber ĩgɨn ndian kɨ njad kɨsɔɔ ke njad koosɨ, a i sand al kɨta ĩn nya kɨyerr rosɨt. 43Ot telɨn rosɨ kɨyerrt kɨtakul nya mad kɨ ɔrr kɔdɨn ber ke ag dɔningt, ot yerrɨn rosɨ sed, na ɓeta i telɨn kɨyerr kɨtatɔd. 44Mĩ Bɨraɓe Luwah losɨ, kɨta 'nten i jan rosɨ ɓat kad ĩn ne kɨ kunjɗang kɨta mĩ kɨ kunjɗang. Ot yerrɨn kɨ rosɨ kɨ dã kɨɗen ngekɔrkɔd ber kɨ ngekag dɔningt.
45Kɨtɔ mĩ Bɨraɓe'n m'tee sesɨ kam dɔning Ejipt't kɨtɨga kad mĩ Luwah losɨ. Kɨ ĩn kɨ kunjɗang kɨta mĩ kɨ kunjɗang. 46'Nten la i mberkɨnda'n ɔj dɔ dãg kɨ yelg kɨ nyakumkajɨr kɨɗen'n ndɨ ɔdɨn rod kam mant kɨ nya kɨ kumkajir kɨɗen ĩgɨn agɨn dɔningt 47kɨtakad ɔrrɨn ne nin nyag kɨyerr kɨ nyag kɨkar nat, dã kɨ sumba sa kɨ dã kɨ sumba sa al.
Currently Selected:
Lebitik 11: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.