Lebitik 16
16
Ndɔ la kadkari kutdɔ majal
1Bɨraɓe elta kɨ Moij go koi ngan Aarõt kɨjoo'n ɗen nderbe ro Bɨraɓet na oin. 2Bɨraɓe el Moij an: El ngonkõi Aarõ kɨtakad and kam lo kɨjaɓat gid kubganglot kɨndɔgndɔg nõ nyakutdɔ sundt al, na ɓeta oi kɨta m'a m'tee hɔi kam kilndiit dɔn dɔ nyakutdɔt.
3Ɗob kɨ titbe la Aarõ a andɨn kam lot kɨjaɓat't ye. A hɔ ngon bɔw mang kadkari kutdɔ majal kɨ bal bat kadkarit kɨ lahort. 4A la kubji kɨ ngal kɨjaɓat kɨ kɨ sɔl lom lom, a la kalesõ lẽ kɨ sɔl lom lom ront, a dɔ ɓon kɨ kub dɔɓo kɨ sɔl lom lom, a ut dɔn kɨ jɔg lẽ kɨsɔllomlom. Ĩgɨn non ĩn kubg kɨjaɓat'n a la ront got'n ndogɨn man. 5A taa bal bĩã joo ji ngékawnat lo Israel kadkari kutdɔ majal kɨ bal bat kɨɗa kadkari kɨlahorrt. 6Aarõ a la bɔw mang kadkari kutdɔ majal lon kɨ majal lo ngékɨɓe lon 7kamla a hɔ bal bĩãg kɨjoo ndad nõ Bɨraɓet tabit kujkub ndɔdnat. 8Aarõ a ya yuk dɔ bal bĩãgt kɨjoo nõ, kɨkɨɗa kɨta Bɨraɓe na kɨkɨɗa kɨta Ajajel. 9Aarõ a un bal bĩã kɨ kɨɗa'n yuk so dɔat kɨta Bɨraɓe, na a tɔla, laa kadkari kutdɔ majal. 10Bal bĩã'n yuk so dɔat kɨta Ajajel, a laa kumkajir nõ Bɨraɓet kɨtakad tuɓana kɔ kam dɨlalot kɨta Ajajel. 11Aarõ a la bɔw mang kadkari kutdɔ majal lon kɨ majal lo ngékɨɓe lon. A jakɔ bɔw mang kadkari kutdɔ majal lon. 12A un gajo kɨ ɗoosɨ kɨ yalhorr kɨ dɔ dɨngɨrt nõ Bɨraɓet, a ɔi nduj nõkag kɨ kootmbĩ kɨtoletlet ɗoosɨ jin joo, ɗen gid kubganglot, 13a ũ nduj nõkag dɔ horrt nõ Bɨraɓet kɨtakad sahorr nõkag kɨkootmbĩ ut dɔ nyakutdɔ sund najkɨmat kɨtakad oi al. 14Goot gog a ɔd mosɨ bɔw mang kɨ ngon jin tud nõ nyakutdɔt ko loɓakàdt nja tanãimɨta, a tud nõ nyakutdɔt nja tanãimɨta kɨ ngon jin. 15Kamla a jakɔ bal bĩã kadkari kutdɔ majal lo deg, na a aw kɨ mosɨ gid kubganglot, a ɗa kɨ mosɨ bal bĩã 'nten tit'n ɗan kɨ mosɨ bɔw mang, a tud dɔ nyakutdɔt kɨ kɨnõat nyakutdɔt tu.
16A ɗa titbe kɨta kutɨn dɔ lo kɨjaɓat kɨta yerr lo Israelag kɨ tɔidɔtag lod kɨ majal kɨ ɗa lod tube. A ɗa titbe tɔ, kɨta kujkub ndɔdna'n i ku ngéɗakɨlat kɨyerrt. 17Kɨ de mad and kam kujkub ndɔdnat al lon Aarõ a and kɨta la kadkari kutdɔ lo kɨjaɓat mbã kad tee tɨga kamtã, a ut dɔ majal lon kɨ kɨlo ngékɨɓe lon kɨ kɨlo ngékawna lo Israel tube.
18Lon tee tɨga aw kad dɨngɨrt'n i nõ Bɨraɓet kɨta la kadkari kutdɔa a ɔd mosɨ bɔw mang tẽ kɨ mosɨ bal bĩã ɔsɨn gaj dɨngɨr gug dɔ. 19A tud mosɨ dɔ dɨngɨrt kɨ ngon jin nja tanãimɨta a ɗan kad tela kɨjaɓat dɔ yerrt lo Israelag.
Bal bĩã ngekun ɗagootal
20Lon la kadkarit dɔ lo kɨjaɓat kɨ kujkub ndɔdna kɨ dɨngɨr woi ye, ad ɗen kɨ bal bĩã kɨ kumkajir'n non ho. 21Aarõ a nda jin tujoo dɔ bal bĩã kɨ kumkajir, na a tɔ tan dɔ ɗagootalt lo Israel tube kɨ tɔidɔtag lod tube kɨ majalg lod tube, ndah dɔ bal bĩãt'n non. Goot gog a laa ji de madt'n ndana kɨta kɨla'n non kad aw sia nyàa kɔ kam dɨlalot. 22Titbe bal bĩã kɨ ngekun ɗagootal lod tube nõ a awɨn kam dɔningt kɨ de gotot, na de'n non a nya bal bĩã ka nõ kam dɨlalot.
23Kamla Aarõ a and kam kujkub ndɔdnat, a ɔrr kub lẽ'n la ront lon andɨn kam lot kɨjaɓat, a la lot'n non gog 24A ndog man kam lot mad kɨjaɓat, a la kub lon ront kamla a tee la kadkari lon kɨlahorrt kɨ kadkari kɨlahorrt lo deg to kɨta kutdɔ majal lon kɨ kɨlo deg. 25A la mbool dã kadkari kutdɔ majal horro dɔ dɨngɨrt.
26De'n aw kɨ bal bĩã kɨta Ajajel nyàa kɔ kam dɨlalot a tugo kub lon, a ndog man, gog got a tel and kam gongt. 27Bɔw mang kɨ bal bĩã'n awɨn kɨ mosɨd kam lot kɨjaɓat kɨta kutdɔ majal ye, a ɔind awɨn ne gid gongt lan ngɨrad kɨ dãd kɨ kĩd horro ad õ kɔ. 28De kɨ ngelad horro nõ a tugo kub lon, a ndog man, na a tel and kam gongt gog.
29'Nten la i mberkɨnda kɨ tokɨnõt kɨtɔsɨ. Nah kɨkõtanãimɨta kɨ ndɔ kɨkɨlah lo nah'n non a i sɔlɨn dɔsɨ, a i ɗan kɨla mad al, ke ngon ngeɓe ke mbah'n hɔlondɨ kusɨt, 30kɨta ndɔt'n non la a lan kadkari kutdɔ majal losɨ kad arsɨn. A ĩn kɨkarnyang dɔ majalgt losɨ nõ Bɨraɓet. 31A i ndɔ taakò kad i taan ne kò, na a i sɔlɨn dɔsɨ. I mberkɨnda kɨ tokɨnõt.
32Ngejanyamosɨ'n i kɨ wur ndahna kɔtkokɨɗa kad ndɨ goot bɔwɨnt kam kɨla janyamosɨt a la kadkari kutdɔ majal kɨ kub lẽ kɨ sɔl lom lom kɨjaɓat ront. 33A la kadkari kutdɔ lo kɨjaɓat, a la kadkari kutdɔ kujkub ndɔdna kɨ dɨngɨr, a la kadkari kutdɔ ngejanyamosɨ kɨ ngékawna tube. 34A i mberkɨnda kɨ tokɨnõt kɨtɔsɨ. A la kadkari kutdɔ majal nja kɨɗa ɓal kɨɗen kɨta majalg lo Israelag tube. Ɗa tit'n Bɨraɓe ndan mbera Moij.
Currently Selected:
Lebitik 16: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.