Lebitik 20
20
Tagkɨgang kɨ dang dang
1Bɨraɓe el Moij an: 2El Israelag an: Dekɨɗen ku Israelagt ke ku mbahg'tn hɔn londɨ kɨ Israelag na la ngonɨn ad yo Molok a ne, a tɔlɨna kɔ. Deg kɨ dɔningt'n non a tɨlana kɨ mbal tɔlɨna. 3M'a m'tur takum'm m'ndoorɨn de'n non, na m'a m'ɔrra kɔ ku degt lom kɨtɔ adɨn ngonɨn yo Molok, yerr kɨ lo lom kɨjaɓat, na kid tɔm kɨ kunjɗang. 4Ĩla deg kɨ dɔningt'n non utɨn kumd dɔ kɨlaɗa det'n non, in la ngonɨn ad yo Molok na tɔlɨna al a ne, 5mĩ m'a m'tur takum'm m'ndoorɨn de'n non kɨ ngékɨɓe loa, m'a m'ɔrrd kɔ ku degt lod, de'n non kɨ deg tube'n ndulon goa, na ɗan kaya kɨ yo Molok.
6Ĩla de mad tel ron go ngéndõtegt ke mboolig kad ɗa sed kaya a ne, m'a m'tur takum'm m'ndoorɨn de'n non m'a m'ɔrra kɔ ku degt loa. 7Kɨtɔ 'nten i jan rosɨ ɓat kad ĩn kɨkunjɗang kɨtɔm. Mĩ Bɨraɓe Luwah losɨ.
Mberkɨnda kɨ ɔj dɔ sah ngaw, kɨ ɗa dekɨdẽ
8A i ngomɨn go mberkɨndag lom, a i hɔn ɗagoot. Mĩ Bɨraɓe Luwah m'kɔtsɨ, m'ndasɨ kɔtkokɨɗa. 9Dekɨɗen'n ndɔl bɔwɨn ke kõn a ne, kari na kad tɔlɨna kɔ kɨta ndɔl bɔwɨn kɨ kõn. Ta mosa i dɔat.
10De'n ɗa nẽ madɓen a ne, dekɨdɨngã kɨ dekɨdẽ'n ɗan majal kɨna ye, a tɔlɨnd kɔ. 11De'n ɓi kɨ nẽ bɔwɨn a ne, ɔrr kub girr bɔwɨnt. Dekɨdɨngã kɨ dekɨdẽ'n non a tɔlɨnd kɔ.
Ta mosɨd i dɔdt
12Ĩla de mad ɓi kɨ ne ngonɨn a ne, ĩn tujoo a tɔlɨnd kɔ. Ɗan nya kɨ rosɔl, ta mosɨd i dɔdt, 13Ĩla dekɨdɨngã ɓi kɨ dekɨdɨngã tit'n a ɓin kɨ dekɨdẽ a ne, ĩn tujoo ɗan nya kɨyerr. A tɔlɨnd kɔ, ta mosɨd i dɔdt. 14Ĩla dekɨdɨngã mad taa dekɨdẽ, na taa kõa tɔ a ne, i majal kɨngãi. A land horr, ĩ ho, ĩn ho, kɨtakad nyaɗa kɨ titbe goto kusɨt. 15Ĩla de mad bii kɨ dã a ne, a tɔlɨna kɔ, a tɔlɨn dã'n non ho. 16Ĩla dekɨdẽ mad aw ro dãt kad to sia a ne, a i tɔl dekɨdẽ'n non nat kɨ dã tu: A tɔlɨnd kɔ, ta mosɨd i dɔdt.
17Ĩla dekɨdɨngã mad taa kõnanɨn, ad i ngon bɔwa kɨdẽ, ke ngonkõa kɨdẽ, ad dekɨdɨngã oo ro dekɨdẽ kɨ kari, na dekɨdẽ oo roa kɨ kari a ne, i nya kɨ rosɔl. A tɔlɨnd kɔ takum ngan degt lod. Ɔrr nya girr kõnanɨnt. A ĩ kɨ ta dɔnt. 18Ĩla dekɨdɨngã ɓi kɨ dekɨdẽ lon mosɨ ndɨ ãi roat, na ɔrr nya girrat a ne, dekɨdɨngã ɔrr nya girr mosat, dekɨdẽ tɔ ɔrr nya girr mosɨnt, ĩn tujoo a tɔlɨnd kɔ ku degt lod. 19A i ɔrr nya girr kõit kɨdu al, ke bẽni. Lon i ɗa titbe a ne, i tit ɔrr nyaroit be. A ton ɗagootal lod. 20Ĩla de mad ɓi kɨ nẽ ngonkõ bɔwɨn ke kõn a ne, ɔrr nya girr ngonkõ bɔwɨnt ke kõn, A ton ɗagootal lod, a oin kɨkanj kooj ngon. 21Ĩla de mad taa nẽ ngonkõn a ne, i nya kɨyerr. Ɔrr nya girr ngonkõnt, a oojɨn ngon al.
22A i ngomɨn go mberkɨndag lom kɨ tagkɨgang lom tube, na i hɔn ɗagoot kɨtɔkad dɔning'n m'ndɨ m'aw sesɨ kamt kad i ndɨnt tomsɨ kɔ al. 23Ot ndulon go nyabelɓeg lo girrdeg'n m'tuɓad kɔ nõsɨt kɨta nyag 'nten tube deg'n non ɗan ad ĩn ne nya kɨyerr takum'mt ye. 24M'elsɨ m'an: Ĩla a i taan dɔning lod nyakagɓet losɨ, i dɔning in mbà kɨ tej nũnt, Mĩ Bɨraɓe Luwah losɨ kɨ ngekɔtsɨ ndasɨ tadang kɨ girrdeg'n non. 25Kɨtɔ 'nten i ɔrrɨn ɗobnin dã kɨkar kɨ dã kɨ kar al kɨ yel kɨkar kɨ yel kɨ kar al nat, na ɓeta i telɨn kɨyerr kɨta dãg kɨ yelg kɨ nyag kɨkɔrkɔdber ĩgɨn m'elsɨ m'tɔ wakɨsɨ kad ɔrrɨn nind, na oond tit nyag kɨyerr. 26A ĩn kɨjaɓat kɨtatɔm kɨta mĩ kɨ kunjɗang. Mĩ Bɨraɓe na m'ɔrrsɨ m'ndasɨ tadang kɨ girrdeg kɨtakad ĩn lom.
27Dekɨdɨngã ke dekɨdẽ kɨɗen kusɨt'n ko kɨdɔ ngendɔnteegt ke mboolig a ne, a tɔlɨna kɔ. A tɨland kɨ mbal tɔlɨnd. Ta mosɨd i dɔdt.
Currently Selected:
Lebitik 20: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.