Lebitik 5
5
Kadkari kɨta ta kɨ dɔ det
1Ĩla de mad nda yo kad'n man naj dɔ nyat mad'n oo ke ger na eltaa al a ne, ta majal loa i dɔat. 2Lon de mad ɔd nya kɨyerr kanj ger go, ad i nin dã kɨyerr, ke i nin dã kɨmut ke kɨɓe, ke nin nyakɔrrkɔd ber, ĩ kɨɓe kɨdɔn a tel kɨyerr, na ta i dɔat. 3Lon ɔd nya mad kɨyerr ko ro det kanj ger go kamla ger a ne, ta i dɔat. 4Lon de mad elta kanangbe, ndan yo kɨmajal ke kɨmaj, na ger al, kamla ger a ne, ta i dɔat.
5Ĩla de mad aw kɨ ta dɔnt kɨta kɨkɨɗa ku nyagt 'nten a ne, a tɔ tan dɔ majalt lon, 6na a ɗe kɨ kadkari kɨtɔ majal lon, ad i kõ dã kam nyakulgt kɨdu, ke bat ke bĩã, kadkari kutdɔ majal, na ngejanyamosɨ a laa kadkarit kɨta kutɨn dɔ majal loa.
Kadkari lo ngéndog
7Ĩla tɔga asɨ ngah bat ke bĩã al a ne, a ɗe kɨ derngɔt joo ke ngan derkul joo kɨtɔ majal lon, kɨkɨɗa a i kadkari kɨtɔ majal, kɨkɨɗa a i kadkari kɨlahorrt. 8A hɔd, ɗe sed ro ngejanyamosɨt, ĩ tɔ a la der kadkari kɨta kutdɔ majal dasa, a hɔ kɔa teet, na a ɔrr dɔa kɔ al. 9A tud mosɨ kadkari kutdɔ majal kad dɨngɨrt, na ndeg mosɨ a mbel girr dɨngɨrt. I kadkari kutdɔ majal. 10A la der kɨmad kadkari kɨ lahort kɨgo mberkɨndat. Titbe la ngejanyamosɨ a ɗan kɨta kutɨn dɔ majal'n de'n non ɗa, na a nyan go majal loa kɔ.
11Ĩla tɔga asɨ ngah derngɔt joo ke ngan derkul joo al a ne, a ɗe kɨ kadkari lon kɨtɔ majal kɨ ɗa, ad i kɨlo nduj mɨta kadkari kutdɔ majal, a ũ yib dɔt al, a ũ nõkag kɨkootmbĩ tit al tɔ kɨta i kadkari kutdɔ majal. 12A ɗen ro ngejanyamosɨt na ngejanyamosɨ a ɔi gaj nyagakamdɔt kɨ jin laa horro dɔ dɨngɨrt dɔ kadkarig kɨlahorrt nõ Bɨraɓet. I kadkari kutdɔ majal. 13Tɨbe la ngejanyamosɨ a ɗan kɨtɔ kutɨn dɔ majal lo de'n ɗa kɨkɨɗa ku nyagt'n non, na a nyan go majal loa kɔ. Ndeg nduj kɨnãi a i lo ngejanyamosɨ tit kadkari nduj.
Kadkari nyàgo kɔ kɨta tɔidɔta
14Bɨraɓe el Moij an: 15Ĩla de mad ɗagootal, ɗa majal kɨ kamndig al, dɔ kɨkɨɗat ku nyagt kɨnda kɔtkokɨɗa kɨta Bɨraɓe a ne, a ɗe kɨ kadkari tɔidɔta ad Bɨraɓe, ad i bal bat kɨkanj nya mad ɗaan una ku ɓut't kɨgo gat nar arjãt ad i nar kɨ kam lot kɨjaɓat. I kadkari tɔidɔta. 16A tel ba nya kɨndah kɔtkokɨɗa'n ɗan gootal, a la gaj kɨɗa ku kɨmit dɔt na a ad ngejanyamosɨ. Ngejanyamosɨ a laa kɨta kutɨn dɔ majal loa nat kɨ bal bat kadkari tɔidɔta na a nyan go majal loa kɔ.
17Ĩla de mad ɗa majal kɨkanj ger go ad tɔi dɔ kɨkɨɗa ku mberkɨndagt lo Bɨraɓe, nya kɨ sumba ɗa al, ta i dɔat na a to ɗagootal lon dɔnt.
18A ad ngejanyamosɨ bal bat kɨkanj nya mad ɗaan una ku ɓut't kɨ oa asɨ ta gat kadkari tɔidɔta. Ngejanyamosɨ a laa kɨta kutɨn dɔ majal loa'n ɗa kɨkanj ger go na a nyan go majal loa kɔ. 19I kadkari tɔidɔta. De'n non kete aw kɨ ta dɔnt nõ Bɨraɓet.
Ta dɔ tel kɨ nya kad gog
20Bɨraɓe el Moij an: 21Ĩla de mad ɗa majal ndoorɨn Bɨraɓe ad el madɓen takɨbal dɔ nyat'n ada kad ngom ke ɓoog nya, ke ta nya mad kɨlo ngetɔgt ji madɓent, 22ke ɓà nya mad kɨnãi na nda yo kɨngom dɔt, ke ɗa nya kɨkɨɗa ku nyagt'n deg ndɨ ɗan. 23Ĩla ɗa majal titbe ad ta i dɔat a ne, a tel kɨ nya'n ɓoog ke nya'n taa kɨlo ngetɔgt, ke nya'n ada kad ngom, ke nya'n nãi na baa, 24ke nya kɨɗen'n nda yo kɨngom dɔt. A tel ad tube na a la gaj kɨɗa ku kɨmi dɔt ad de'n nya'n non i loa ndɔt'n non lon ɗen kɨ kadkari tɔidɔta lon. 25A ɗe kɨ kadkari tɔidɔta lon ad ngejanyamosɨ nõ Bɨraɓet, ad i bal bat kɨkanj nya mad ɗaa ku ɓut't kɨ ooa ad asɨ ta gat kadkari tɔidɔta. 26Ngejanyamosɨ a laa kɨta kutɨn dɔ majal loa nõ Bɨraɓet na a nyan go majal loa kɔ, ke majal kɨ ɗi'n ɗa ad ta ĩn dɔat.
Currently Selected:
Lebitik 5: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.