Lebitik 7
7
Ɗob la kadkari tɔidɔta
1'Nten i mberkɨnda dɔ kadkari tɔidɔtat. I nyan kɨjaɓat kɨtɔitɔi. 2A jan kɔ kadkari tɔidɔta kam lot'n a jan kɔ dã kadkari kɨlahorr tit. A tudɨn mosa dɔ dɨngɨrt gugɨn ne dɔ tube. 3A lan mboola tube kɨ ɓonga kɨ mboola kɨ ut dɔ tia, 4kɨ munjo duna kɨjoo kɨ mboola kɨ dɔt kɨ kɨkadat kɨ wura kɨbo'n ɔrr nat kɨ munjo duna. 5Ngejanyamosɨ a la nyag'n non horro dɔ dɨngɨrt, i kadkari kɨlahorr nõ Bɨraɓet. I kadkari tɔidɔta. 6Dekɨdɨngã kɨɗen ku ngejanyamosɨgt a sa. A sa kam lot mad kɨjaɓat, i nya kɨjaɓat kɨtɔitɔi. 7Kadkari tɔidɔta i tit kɨ kadkari kutdɔ majal, mberkɨnda i kɨɗabe kɨta kadkarig kɨjoo'n non. Dãã a i lo ngejanyamosɨ'n a laa kɨta kutdɔ majal nõ.
Gaj lo ngejanyamosɨ kadkari
8Ngira dã kɨ la kadkari kɨlahorrt a i lo ngejanyamosɨ'n la kadkari kɨ to de'n non.
9Kadkari nduj kɨɗen kɨ tɨnga kam purrt, ke kɨ la gajot, ke kɨ tɨnga dɔ horrt a i lo ngejanyamosɨ in la kadkari'n non. 10Kadkari nduj kɨɗen kɨ lɔi kɨ yib ke kɨkanj yib a i lo ngan Aarõ tube, ĩn tube a ngahn asɨna.
Ɗob la kadkari kɨ kad kamsɔllom
11'Nten la i mberkɨnda dɔ kadkarigt kɨ kad kamsɔllom'n de a la ad Bɨraɓe. 12Ĩla kadkari loa 'nten i kadkari ɗa mersi a ne, a ad kadkari nat kɨ kadkari oiyo, ad i oina kɨ lɔi kɨ yib kɨkanj berrkasɨ, ke bɨna kɨkanj berrkasɨ kɨ ɗa yib dɔt, ke nduj kɨtoletlet kɨ lɔi kɨ yib la dɔ horrt. 13Nat kɨ kadkarig kɨ kad kamsɔllom lon'n ad tit kadkari ɗa mersi, a ad bɨna kɨ ɗa kɨ berrkasɨ. 14Kam kadkarit kɨɗen a un bɨna kɨɗa kadkari kɨ la kad Bɨraɓe. A i lo ngejanyamosɨ'n tud mosɨ kadkarig kɨ kad kamsɔllom. 15Dã kadkari ɗa oiyo ĩn i kadkari kɨ kad kamsɔllom, a san ndɔt'n lan ne kadkari'n non. A nyan mbã loti dɔt al.
16Ĩla kadkari lo de i kadkari tɔlkon kunkɔ ke kadkari kamndig a ne, a sa ndɔt'n non na ndega kɨnãi a sa loti. 17Ndeg dã kadkari kɨnãi mbã ndɔ kɨkõmɨta, a lan horro. 18Ĩla de mad sa dã kadkari lon kɨ kad kamsɔllom ndɔt kɨkõmɨta a ne, Bɨraɓe a taa kadkari loa al, a tɨda maj loa dɔat al. I nya kɨyerr, de'n sa a ne, a to ɗagootal lon dɔnt.
19Dã'n ɔd nya mad kɨyerr a ne, a san al. A lan horro. Dekɨɗen kɨkar nyang asɨ sa dã, 20na de kɨyerr'n sa dã kadkari kɨ kad kamsɔllom lo Bɨraɓe a ne, a nujɨn de'n non kɔ ku degt loa. 21Ĩla de mad ɔd nya mad kɨyerr, ke nya kɨyerr kɨ ro det, ke dã kɨyerr, ke nya kɨyerr kɨ ɗi, na sa dã kadkari kɨ kad kamsɔllom lo Bɨraɓe a ne, de'n non a nujɨna kɔ ku degt loa.
Mberkɨndag kɨta ngan Israelg
22Bɨraɓe el Moij an: 23El Israelag an: A i san mbool dã mad al, ke mang, ke bat, ke bĩã. 24A i san mbool dã mad kɨkoi ke ĩn dã kɨ mut hɔa al. A i ɗan ne kɨla kɨɗen na a i san al bat. 25Kɨtɔ dekɨɗen'n sa mbool dã kadkari kɨlahorrt kad Bɨraɓe a ne, a nujɨna kɔ ku degt loa. 26Lokɨɗen'n a i ndɨnt a ne, a i san mosɨ al, ke i mosɨ yel ke dã. 27Dekɨɗen'n sa mosɨ ke i mosɨ dã kɨ ɗi a ne, a nujɨn de'n non kɔ ku degt loa.
28Bɨraɓe el Moij an:
29El Israelag an: De'n ɗe kɨ kadkari kɨ kad kamsɔllom ad Bɨraɓe a ne, a ad gaj kadkari kɨ kad kamsɔllom lon, 30a ɗen kɨ jin ad Bɨraɓe. I kadkari kɨ lahort. A ɗe kɨ mbool dã kɨ gua, i kadkari kɨ bii nõ Bɨraɓet. 31Ngejanyamosɨ a la mboola horro dɔ dɨngɨrt, na gua a i lo Aarõ kɨ ngana. 32A adɨn ngejanyamosɨ bing dã kɨ kokõt kam kadkarigt losɨ kɨ kad kamsɔllom. 33Ku ngan Aarõt de'n la kadkari mosɨ dã kɨ mboola kadkari kɨ kad kamsɔllom a ne, ĩ la a ngah bing dã kɨkokõt gajt lon ye. 34Kɨtɔ m'taa gu dã kɨ bɨnga ji Israelagt ko kam kadkarigt lod kɨ kad kam sɔlom mad Aarõ ngejanyamosɨ kɨ ngana. I gaj lod ko ro Israelagt mbãkɨnõt. 35Ĩn non i gaj lo Aarõ kɨ ngana ko kam kadkarigt kɨlahorr nõ Bɨraɓet'n adɨnd ndɔt'n ndahnd ne kad ɗan kɨlaɓer janyamosɨ kɨta Bɨraɓe. 36Bɨraɓe ndamber Israelag kad kɨ adɨnd ndɔt'n wurɨnd ne yib. I mberkɨnda kɨ tokɨnõ kɨ ngakat kɨ ngaka. 37'Nten la i mber kɨ ndah dɔ kadkari kɨlahorrt, kɨ kadkari nduj, kɨ kadkari kutdɔ majal, kɨ kadkari tɔidɔta kɨ kadkari ndah de kɔtkokɨɗa kɨ kadkari kɨ kad kamsɔllom. 38Bɨraɓe ndamber Moij dɔ mbalbo Sinait lon nda'n mber Israelag kad ɗen kɨ kadkarig lod adɨn Bɨraɓe kam dɨlalot kɨ Sinai.
Currently Selected:
Lebitik 7: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.