Lntadan 25
25
Quri Mege Malu Nniqan
(Lnt 35:4-9)
1Rmengo Moseh ka Utux Tmninun: 2“Rngagi ka seediq Israel quri bbege daha kenan. Kana mqaras bale mege bnege daha kenan we, qrasi heya maangal kana. 3Ngngalun namu bnege daha we so nii, king, ging ma limuk. 4Selung mtlawa, mgtdiyuc, mtanah ma malu ware keguy, ubal miric, 5qraqil baus miric rncuhan mtanah, malu ba qraqil camac, tgebil, 6abura camo, abura ssmalu malu sknexan, lmlamu ricuh malu sknexan, 7btunux rako ma btunux qrari pniqun bobo ipudi ma torih. 8Mpsmalu mrtaso nniqan mu ka dheya, eeniq mu ckceka dheya. 9Puyu mooda tnugesa mu. Kana qyqeya ckceka kobu hiya we, puyu so nii mooda kana.”
Kulu Pnsdhegan
(Lnt 37:1-9)
10Ngali tgebil ma smlei sapah kulu, Qndisan na we 2 sese, knuglahang na we 1 sese dmeka ma, tnugkadan na we 1 sese dmeka. 11Truma ma nganguc na we pqpahi bale ba king ma, ssiyo mtqiri na we pdpingi posa king. 12Smlei 4 ngadux king, psai 4 papak sapah kulu. 2 cuqi ka hini ma, 2 cuqi ka hiya. 13Smlei 2 phelan tgebil ma pqpahi king. 14Kiya de lhgaani ngadux king gaga baang ma baang. 15Phelan nii we lhugi cuqi hiya klaali ma iya hgluqi. 16Qrtinuh btunux bnege mu yamu we posa ckceka sapah kulu hiya. 17Smlei 1 gemuk sapah kulu bale ba king. Qndisan baang na we 2 sese dmeka ma knuglahang na we 1 sese dmeka. 18Aangal ka king gaga ssiyo gemuk smalu 2 kirubing ka heya. 19Peeniq ssiyo bale hini ma ssiyo bale hiya ka 2 kirubing. 2 ssiyo bale gemuk smlei 2 kirubing. 20Palic 2 kirubing nii we pqrii baro rmaguh. Bungi palic ka gemuk kulu, pbbege berah ka dqeras daha. Pquri gemuk kulu ka dqeras kirubing. 21Psai bobo sapah kulu nii ka gemuk na. Kiya uri ma psai ckceka hiya ka qrtinuh btunux bnege mu isu. 22Mpsterung ku isu hiya. Mprengo ku isu ani maanu ooda ttgesa mu dseediq Israel, mpeeyah ku bobo gemuk sapah kulu, cenga 2 kirubing hiya.
Pniqan Spuhan
(Lnt 37:10-16)
23Smlaani tgebil smalu 1 psaan spuhan. Qndisan na we 2 sese, knuglahang na we 1 sese ma, tnugkadan na we 1 sese dmeka. 24Pqpahi bale ba king ma, ssiyo mtqiri na we pdpingi posa king. 25Mtqiri ssiyo psaan spuhan we mali na psqapah qango baga knuglahang qrtinuh ma pdpingan na posa king ka ssiyo na. 26Smlei 4 ngadux king ddooyun mheal ka heya ma psdali na 4 mxmuxi psaan spuhan. 27Peeniq ssiyo ba baang mndungus ssiyo baro papak so maha msleexan tlbuan phelan. 28Phelan psaan spuhan nii we smalu na tgebil ma pqpahan na king. 29Smlaani bale ba king ka sara, guhi, rusuq ma mahan ddooyun smapuh sino. 30Peeniq bobo psaan spuhan ka pang, pniqi peeniq berah mu klaali ka nii.
Pcmagan
(Lnt 37:17-24)
31Smlaani bale ba king ka pcmagan. Pllutuc pcmagan nii kana ka ttmaan, qmuru, birac, pungo ma phepah na. 322 baang pcmagan nii we pcriyu 6 ciida. 3 hini ma 3 ka hiya. 33Knkingal cida we niqan 3 psaan ma, pntnaani so phepah aring mtumun psai birac, pungo ma, phepah. Pntnaani smalu kana ka 6 cida pneyah pcmagan. 34Pcmagan nii we pniqi 4 ppsaan, pntnaani so phepah aring mtumun pniqi birac pungo ma phepah. 35Pungo na we peeniq pnstreengan 2 mbbais cida ka 1 truma na. Truma na hiya, pniqi 1 pungo ka pnstreengan 2 cida dungal we, kesi hiya ka 3 cida toma na uri. Kiya de gaga sqapah pungo psaan pcmagan nii kana ka 6 cida. 36Pungo ma cida ma cuqi we ida asi ka msqapah pcmagan kana. Asi ka ttingi smalu peeyah 1 qpuruh bale ba king. 37Smlei 7 sara pcmagan, psqmai ka pcmagan ma pqquri berah pledax kana. 38Dahur qango ma sara psaan camo we smlaani bale ba king. 39Ngali 1 tarantu ka king smlei pcmagan ma kana qyqeya. 40Qlahang bale, puyu smalu so tnugesa mu isu meniq dgiyaq.
Currently Selected:
Lntadan 25: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
