Lntadan 29
29
Gaya Ddaun Msapuh
(Lew 8:1-36)
1Ddaun su nii we kiya ka mooda ptgaya mrtaso dheya ma ooda daha meepah spuhan kenan ka nii. Ngali 1 wawa dapa balas. 2 baus miric rudu mttuku hnyegan, 2pang ini psai tgeda, pang ini psai tgeda gnmaxan abura ma, pang epux ini psai tgeda. Kana pang nii we smlaani tgmalu bale nemu mugi. 3Psai 1 rawa ka pang nii. Desi ka rawa nii ma 1 dapa ma, 2 miric rudu. 4Adis rhengun kobu mrtaso, trmai qsiya ka Aharon ma lqlaqi na. 5Desi ka lukus daha. Plkusi lukus rila pstrmaun ma ipudi lukus rila ma ipudi ka Aharon. Kiya uri ma psai ka torih ma phbeki habik ipudi. 6Psai tunux na ka bunuh ptgaya, kiya ma psai bobo bunuh kiya ka taku pnskraya. 7Hrigi abura mrtaso ka tunux na pheyu heya. 8Desi ka lqlaqi na, plkusi na lukus rila pstrmaun. 9Hbiki habik ma mekuy tunux. Kiya de maangal qpahan msapuh pnugaya betaq ani knuwan ka dheya. Phyegi mege qpahun mrtaso ka Aharon ma lqlaqi na.
10Adis berah kobu mrtaso ka dapa balas, posa baga tunux dapa nii ka Aharon ma lqlaqi na. 11Eniq berah Utux Tmninun, rhengun kobu mrtaso ka phuqil dapa balas nii. 12Aangal duma ka dara dapa, rbgaani tluding baga su rcuhi dara ka 4 urung gaga muxi spuhan. Kiya de mnsngari na dara de asi hrigi muxi pusu spuhan. 13Kana daruk biciq ma kadi rumul. 2 rmume ma kadi rmume, psqmaun bobo spuhan kana. 14Kiya de, heyi, qraqil ma, iraq dapa balas we sai psqama nganguc kobu kana. Ado dapa nii we muduh bukuy kobu. Nii we kiya ka snapuh psruwa qnquwan noda.
15Desi 1 baus miric rudu, Aharon ma lqlaqi na posa baga bobo tunux miric. 16Phuqil isu ka miric nii, hrgaani na mtqiri spuhan ka dara. 17Teetu ka heyi miric, snagi ka rkebul ma papak. Kiya de peeniq psuupu tunux ma kana heyi. 18Psqmai bobo spuhan hiya ka kana miric. Spuhan psqama nii we bege Utux Tmninun kiya. Kiya ka spuhan malu kenux bbege Utux Tmninun kiya.
19Desi ka tg2 baus miric rudu, mdoi tunux dapa nii ka Aharon ma lqlaqi na. 20Phuqil isu ka miric nii. Ngali duma ka dara na, rchaani waso narac birac Aharon ma lqlaqi na. Kiya ma rchaani tama narac baga ma bbaki narac papak daha. Kiya de msngari na de hrgaani mtqiri spuhan kiya. 21Ngali duma abura mrtaso ma dara gaga bobo spuhan, srehak Aharon ma lukus na, rchaani ka lqlaqi Aharon ma lklukus daha uri. So kiya de mprtaso ka Aharon ma lukus na. Mprtaso ka lqlaqi na ma lukus daha uri da.
22Aangal ka siyang, siyang ngungu, kana kadi rkebul, kadi rumul, 2 rmume, kadi rmume ma, papak tgnarac. Nii we kiya ka bbege ta spuhan baus miric rudu. 23Kiya de ngali 1 pang ini psai tgeda, 1 pang pnugmaxan abura ma, 1 pang mepux gaga meniq rawa tqriyan paang ini psai tgeda peeyah berah Utux Tmninun. 24Psai bobo baga Aharon ma lqlaqi na ka kana nii. Slgelu na berah Utux Tmninun, kiya ka snapuh mlgelu ka nii. 25Bobo na nii de, ngali peeyah baga daha, psai bobo spuhan hiya. Psuupu psqama bobo spuhan hiya. Kiya ka malu sknexan berah Utux Tmninun. Kiya ka spuhan psqama bege Utux Tmninun ka nii.
26Aangal ka heyi berah baus miric rudu snapuh Aharon. Slgelu na berah Utux Tmninun, kiya ka snapuh slgelu. Heyi nii we kiya ka nnisu kiya. 27Heyi berah ma bteriq baus miric rudu sglelu ma pnheyu snpuhan mrtaso bnege nii we, ngali mrtaso pntgaanak. Nii we bbege Aharon ma lqlaqi na ka kiya. 28Kiya ka ngngalun Aharon ma lqlaqi laqi na, pntgaya betaq ani knuwan peeyah seediq Israel ka nii. Ado snapuh pheyu ka nii. Nangal peeyah smapuh ptbale seediq Israel ma snapuh pheyu bbege Utux Tmninun ka nii.
29Pltudi mege lqlaqi laqi na ka lukus mrtaso Aharon. So maha mlukus lukus nii phyegun ma lmutuc maangal qpahan mrtaso ciida ka dheya. 30Lqlaqi laqi na lmutuc maangal qpahun msapuh we, asi ka mlukus lukus nii mk7 ali, mremux meepah kobu mrtaso hiya ciida.
31Ngali baus miric bnege daha snapuh mrtaso hiya ka isu. Hngedi mrtaso nniqan hiya ka heyi kiya. 32Aharon ma lqlaqi na we meekan miric nii ma pang gaga ckceka rawa meniq rhengun kobu mrtaso hiya. 33Meekan uuqun snpuhan kiya ka dheya. Kiya de maha mlutuc meepah neepah mrtaso ma prtaso psaanak dheya uri. Iya uqi dseediq nganguc ka nii, ado snpuhan mrtaso ka nii. 34Heyi ma pang snpuhan mrtaso bnege nii, nasi niqan ka knrngiyan betaq mgrebu de, asi ka psqmaun puniq kana ka knrangi na. Iya uqi da, ado snpuhan mrtaso ka nii.
35Puyu kana rnengo mu sunan mooda ka isu. Mk7 ali dai pheyu maangal mrtaso qpahan ka Aharon ma lqlaqi na. 36Quri so mprtaso qnquwan noda daha we, bege 1 dapa balas klaai, ngali snapuh psruwa qnquwan noda ka nii. Spuhi psruwa qnquwan noda ka spuhan, kiya de maha bgurah ka spuhan. Kiya ma rcuhi abura mrtaso ka spuhan, kiya de maha mrtaso ka spuhan da. 37Mk7 ali ka mooda namu smapuh qnquwan noda nii, mooda namu pkrtaso spuhan de, maha mrtaso ka spuhan. Kiya de tmelung spuhan ka ana ima we maha mrtaso ka heya uri.
Smapuh Mege Klaali
(Spe 28:1-8)
38Nii we kiya ka bbege su bobo spuhan: Kn1 ali iya psteqi mege 2 knkawas wawa miric. 39Biqi mgrebu ka 1 wawa miric. Biqi gbiyan ka 1 wawa miric. 40Mege tgkingal miric ciida we, asi ka sptheyaq na pgmaxi 1 tnugspatan sin abura ka 1 tnugmxalan igipa nemu mugi. Kiya ma mbege 1 tnugspatan sin sino ngalun snapuh sino kiya. 41Gbiyan de bege tg 2 wawa miric. Pntnai so noda mgrebu snapuh bnege pnhgalang ma sino snapuh. Kiya ka malu kenux bbege Utux Tmninun ka kiya. 42Nii we kiya ka smapuh psqama klaali meniq namu berah Utux Tmninun, meniq namu rhengun kobu mrtaso ani betaq knuwan ka nii. Meniq ku hiya ma mppsterung ku yamu ma mpprengo ku yamu. 43Mpsterung ku dseediq Israel hiya ka yaku. Kiya ka kobu mrtaso we ado knledax mu maha mrtaso ka hiya. 44Mprtaso knledax mu ka kobu mrtaso ma spuhan. Pptgaanak mu mrtaso ma qmeepah smapuh kenan ka Aharon ma lqlaqi na. 45Meniq ku ckceka seediq Israel, ma Utux ku baro daha ka yaku. 46Maha mkela yaku we Utux Tmninun, Utux Baro daha ka yaku. Kiya ka dnudul dheya pneyah dxeral Micrayim, kiya ka meniq ku ckceka daha. Yaku we Utux Tmninun, Utux Baro daha.
Currently Selected:
Lntadan 29: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
