Lntadan 9
9
Pnqraqil Tg5: Mnarux Punu
1Rmengo Moseh ka Utux Tmninun: “Osa Paroh hiya ka isu. Rngagi ka heya: ‘So nii kari rnengo na ka Utux Tmninun, Utux Baro dseediq Hiburu, posa ka seediq mu ma pthmkui kenan ka dheya. 2Netun su ini sruwa ppaha dheya ma, eyux su bale peeniq hini dheya de, 3tai, baga Utux Tmninun we maha pkdira peeyah punu tnbugan su gaga ckceka qnpahan. Kiya ka bobo na de heyi dmay, dapa roba, dapa bukung, dapa ma miric. 4Utux Tmninun we psnakun na ka tnbugan nuIsrael ma nMicrayim. Kana nuIsrael we uxe mphuqil ani 1 kiya.’” 5Mhedu pdungus ali ka Utux Tmninun de, rmengo: “Utux Tmninun we mpooda oda nii kusun ka Utux Tmninun.” 6So kusun de, moda oda nii ka Utux Tmninun. Mhuqil kana ka tnbugan dseediq Micrayim. Wano tnbugan dseediq Israel we ini ba huqil ka kiya. 7Smkagul seediq ka Paroh. Tai, ani 1 ini huqil ka tnbugan dseediq Israel. Kiya de, mkere ka lhebun Paroh, ini sruwa mposa seediq nana.
Pnqraqil Tg6: Baso Luqah
8Rmengo Moseh ma Aharon ka Utux Tmninun: “Kstenge mangal qbulic peeyah rqeda ka baga namu, rsani karac meniq berah Paroh ka qbulic. 9Qbulic nii we mpeeniq baso luqah kana heyi seediq ma tnbugan dxeral Micrayim.”
10Kiya de mosa mangal qbulic ka Moseh ma Aharon ma, mosa mheyu berah Paroh. Srehak karac Moseh ka qbulic de mluqah baso kana ka seediq ma tnbugan. 11Ado luqah nii, ini dehuk mheyu berah Moseh ka dmhuni. Heyi dmhuni ma kana dseediq Micrayim we mluqah kana ka heyi daha. 12Kiya de pskrayun na ka lnglungan Paroh, ini qbahang Moseh ma Aharon. Mntena so rnengo Utux Tmninun.
Pnqraqil Tg7: Quyux Huda
13Rmengo Moseh ka Utux Tmninun: “Ttui mgrebu ka isu, osa mheyu berah Paroh. Rngagi ka heya: ‘So nii kari na ka Utux Tmninun, Utux Baro dseediq Hiburu: Posa ka dseediq mu, so maha thmuku kenan. 14Ado texal nii we, maha isu, dmdayo su ma, dseediq su ka kana pnqraqil nii. So su maha klaun uka mntena yaku ka kana bobo dxeral. 15Saya, nasi ku pooda mnarux punu pkdira sunan ma dseediq su ge, maha su mpkuuka bobo dxeral nii da. 16Kiya de, pkdusun misu, so su maha qmita paru beyax mu. Kiya de ngayan mu de mpgarang kana bobo dxeral. 17Ani si isu we kiya su nak psparu bale na, ini su posa seediq mu. 18Tai, patis hido so nii kusun, pyahun mu peeyah baro ka kneegu quyux huda. Kndalax namu pnheyu qnlhangan Micrayim ma, betaq saya we uxe namu ndaan ka so nii. 19Saya, skguli ka seediq, so maha mgleing kana ka tnbugan su ma, kana gaga meniq qnpahan. Kana gaga meniq qnpahan, ini osa mgleing ckceka sapah ge, ani seediq ma ani tnbugan we maha mtuting heyi daha ka quyux huda ma mphuqil ka dheya.’” 20Duma dmdayo Paroh we miicu bale kari Utux Tmninun nii. Kiya de lwaqan na premux sapah truma ka tnqliyan na ma tnbugan na. 21Kiya ka duma ini peeniq kari Utux Tmninun lhebun daha we, ga daha nak psaun qnpahan ka tnqliyan ma tnbugan daha.
22Rmengo Moseh ka Utux Tmninun: “Psquri karac baro pheyu ka baga su, so mptuting bobo seediq ma tnbugan, kana pnhgalang ckceka qnpahan dxeral Micrayim ka quyux huda.” 23Moseh ge, hkragun na quri karac baro ka hukuc na. Kiya de Utux Tmninun we mpbruwa ma pyahun na ka quyux huda. Niqan ka puniq mtuting dxeral uri. Utux Tmninun we peeyah quyux huda bobo dxeral Micrayim. 24Ciida, niqan quyux huda, niqan puniq tqwilaq ckceka huda, ani kana kneegu. Peeyah pnheyu qnlhangan Micrayim betaq saya, uka bale ka so nii ka bobo dxeral nii nana. 25Quyux huda nii we wada smeeliq Micrayim, kana seediq ma tnbugan ma, kana pnhgalang meniq qnpahan. Kiya ma sliqan na pstemaq ka kana qqhuni uri. 26Wano Gosen dxeral nniqan dseediq Israel ka uka quyux huda.
27Smkagul seediq mosa mlawa Moseh ma Aharon ka Paroh. Rmengo dheya: “Texal nii we bale ba niqan ku qnquwan noda di. Msderux noda na ka Utux Tmninun. Yaku ma dseediq mu we mqnuuqu kana. 28Braho namu, druni ka Utux Tmninun. Ado wada mttuku ka hrenang bruwa ma quyux huda nuUtux Baro da. Mposa ku yamu, yamu we iya eniq hini da.” 29Rmengo heya ka Moseh: “Nasi ku mlatac alang nii de asi ku pheyu baga dmurun Utux Tmninun. Maha asi sange ka bruwa, mpuuka ka quyux huda. So namu maha klaun nuUtux Tmninun ka dxeral. 30Quri so isu ma dmdayo isu we, klaun mu ini namu kiicu Utux Baro Tmninun nana.” 31Ciida, sgliqan ka keguy ma mugi. Ado pkelu criyu ka drami mugi. Mkmumul ka phepah keguy uri. 32Wano mugi biciq ma mugi qalux ka ini sgliqi, ado ini kdakil bale ka dheya na. 33Mlatac Paroh ma mosa nganguc alang ka Moseh. Mquri Utux Tmninun pheyu baga na. Kiya de mlmelux ka bruwa ma quyux huda, quyux we ini tuting dxeral uri da. 34Paroh we taan na wada uka ka quyux, quyux huda, ma bruwa de, moda qnquwan noda dungal. 35Mkere lhebun na ka Paroh, ini sruwa pposa seediq Israel, mntena so rnengo Utux Tmninun pnooda na Moseh.
Currently Selected:
Lntadan 9: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
