Smnlean 43
43
Madis Binyamin Mosa Micrayim ka Qbsuran Yosehu
1Dxeral hiya we krinah mrana krayan. 2Uqun nadis daha pneeyah Micrayim we wada qhdeun mekan di. Rmengo dheya ka tama daha: “Yamu we osa maruy uqun dungal.” 3Rmengo tama na ka Yehudah: “Seediq kiya we smiicu rmengo menan: ‘Nasi namu ini desi theyaq yamu madis ka mtswai de, iya eyah mita dqeras mu.’ 4Nasi su smkagul mtswai nami mtheyaq yami mosa de, mosa nami maruy uqun isu da. 5Ado rmnengo yami ka seediq kiya: ‘Netun ini theyaq yamu meyah ka mtswai namu de, iya eyah mita dqeras mu.’” 6Rmengo ka Israel: “Ma namu so nii pqraqil kenan, tgsaun namu ka seediq kiya, niqan ka mtswai namu nana?” 7Rmengo ka dheya: “Seediq kiya ge, smiling bale yami ma seediq tnsapah ta. Rmnengo: ‘Gaga muudus ka tama namu na ho? Niqan namu mtswai na ho?’ Kiya de ida miyan snegul kari na cmiyuk heya. Ima nanak mkela mprengo: ‘Adis hini ka tgswai namu’ da peni?” 8Yehudah we rmengo Israel tama na dungal: “Skguli ptheyaq yami ka laqi nii, kiya de mosa nami da. So maha muudus ma uxe mphuqil kana ka ita ma isu ma, kana lqlaqi ta. 9Mpsdehu ku heya, tduwa su mangal seediq peeyah baga mu. Nasi mu ini pbrinah mege berah su ka heya de, yaku ka maangal qnquwan noda nii betaq ani knuwan. 10Nasi miyan ini tggila we naka miyan tena mn2 mtbberih da.”
11Rmengo dheya ka Israel tama daha: “Nasi asi so kiya de, so nii ka ooda namu: Ngali pntikuh ka malu ba geluq tqilung, beyuq walu, geluq sknexan, geluq mngihur, mhqeni ma aring mtumun hmneru peeyah dxeral hini. Psai lubuy namu, adis ma sai mege heya. 12Prruli madis pila ka baga namu. Pnbrinah na peeniq ckceka lubuy namu ka pila we desi uri. Nhuwa wada mqnuuqu ka kiya. 13Desi ka mtswai namu, osa mita seediq kiya. 14Tai so Utux Baro Kana Beyax we mbege huwe yamu meniq berah na ma, pbrnahun na peeyah ka 1 mtswai namu ma Binyamin. Netun wada mgedang ka laqi mu de, uqu naq mgeedang da!” 15Kiya de madis bbege daha ka dheya. Baga daha we madis pila pnsrrulan ma desun daha ka Binyamin uri. Kiya de dehuk Micrayim, mheyu berah Yosehu.
16Qmita Binyamin msuupu dheya meyah ka Yosehu de, asi rengo mpqlahang sapah: “Dseediq nii we adis sapah truma. Paqi tnbugan ma psramal uqun. Ado mpsuupu mekan yaku ceka naali ka dheya.” 17Seediq kiya de muyu kari Yosehu mosa meepah. Desun na sapah Yosehu ka dheya. 18Ado desun daha sapah Yosehu ka dheya de, miicu ka dheya da, rmengo: “Ida ba yaa pila pnbrinah meniq ckceka lubuy ta ka desun tana hini. Kmphuqil ita ma, qrapun ta na mptqliyan ta hini ma, mpgeeluk dapa roba ta.” 19Kiya de smdaling mpqlahang sapah Yosehu ka dheya, meniq rhengun sapah rmengo heya. 20Rmengo: “Tnpusu sapah mu! Braho su bale, meyah nami hndure we bale ba meyah nami maruy uqun. 21Bobo na de dehuk miyan tnqiyan nami de, tai, pila txtaxa nami we ida gaga meniq lubuy nami nina. Pila we ini eelih ani biciq. Saya, gisu nami brnahun madis ka pila kiya. 22Gisu nami madis pila bbaruy nami uqun dungal. Ini nami klai ima ka pnosa pila lubuy nami nii.” 23Rmengo ka dheya: “Malu namu ho! Iya kiicu! Utux Baro namu ma Utux tama namu ka pnosa pila lubuy namu. Pila namu we wada mu ngalun da.” Kiya de psaun daha nganguc ka Simeon ma sbege daha dheya. 24Seediq kiya we desun na sapah Yosehu ka dseediq nii. Biqan na qsiya trima papak daha. Kiya uri we biqan na uqun ka dapa roba daha uri. 25Mhedu psramal bbege daha ka dheya, tmara Yosehu meyah ceka naali. Ado mnbahang ka dheya we, meyah mekan uqun hini ka heya.
26Dehuk sapah ka Yosehu, kiya de desun daha sapah truma, sbege daha heya ka qnaras bbege daha de, tgtemaq dxeral thmuku heya. 27Smiling dheya ka Yosehu ma, rmengo dungal: “Tama namu we, kiya ka rudan rnengo namu we yaa gaga malu ho?” 28Rmengo ka dheya: “Tnqliyan su, tama nami we gaga malu, ida gaga hiya na.” Kiya de tunux daha we thmuku heya. 29Qmita Binyamin mtswai na mntena bubu ba ka Yosehu de rmengo: “Mtswai ba rnengo namu kenan we kiya ka nii da ho?” Rmengo dungal: “Laqi mu! Tai so mege huwe sunan ka Utux Baro.” 30Asi tutui lnglungan gnaalu na mtswai ka Yosehu de, mremux tnqiyan na mosa lmingis hiya. 31Mhedu trima dqeras na ka heya de meyah nganguc, pretun na ka lnglungan na. Rmengo: “Ekan ta hnpure da!” 32Tleung nanak 1 uqan ka Yosehu ma, tleung nanak 1 uqan ka mtswai na. Tnuumal mekan Yosehu ka dseediq Micrayim we 1 nanak tluungun kiya. Ado seediq Micrayim we ini theyaq mekan hnpure seediq Hiburu. Nii we pgyaun daha bale. 33Dmtswai nii ge, speeyah na tgqbsuran betaq mtswai spuyu na knkawas daha psbeku ptleung theyaq Yosehu ka dheya. Kiya de mklui bale ka dheya. 34Yosehu we sbege na dheya ka uqun na. Prbangun na mege msn5 bbege ka Binyamin. Kiya de mimah sino ka dheya ma, msuupu Yosehu mqaras mimah ka dheya.
Currently Selected:
Smnlean 43: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
