Smnlean 50
50
1Asi tqtemaq dqeras tama na ka Yosehu, lmingis bobo dqeras tama na ma, tmunguh heya uri: 2Dmurun ising mpqlahang heya ka Yosehu, rmicuh malu skenux heyi tama na. Kiya de duising de mricuh malu skenux heyi Israel ka dheya. 3Mttuku ka 40 ali de, kiya ka mttuku ali rncuhan malu skenux de, tsdamac lmingis heya 70 ali ka dseediq Micrayim. 4Mnhedu ka ali mbasi de, rmengo dseediq tnsapah Paroh ka Yosehu: “Netun ku mangal huwe berah namu, braho namu rngagi ka Paroh: 5‘Tama mu we pnsdehu ku na ma rmengo ku, tai! Daling hnqilan mu da. Sai ku smeku dxeral Kenaan. Kiya ka habung knari mu pnsrmalan mu yaku nanak.’ Saya de, braho su bale, srwai ku hiya posa baro maha ku smeku tama mu. Kiya de maha ku mbrinah dungal.” 6Rmengo ka Paroh: “Tduwa su mosa baro ka isu, puyu so pnsdehu rnengo su. Sai smeku ka heya.” 7Kiya de mosa baro smeku tama na ka Yosehu. Mtheyaq heya we niqan dmpdayo Paroh ma dtnqliyan na, ddrudan tnsapah Paroh ma, kana ddrudan dxeral Micrayim. 8Kiya uri we kana tnsapah Yosehu ma dmtswai na ma, dlutuc tama na. Wano lqlaqi daha ma miric ma dapa we pniqun daha Gosen hiya kiya. 9Kiya uri we niqan ka rulu ma dsupi paapa dapa dmay mtheyaq dheya mosa. Hbaro ma bbaro bale ka ddheya. 10Dehuk Atad sbetan mugi quri yayung Yarden nklaan hido ka dheya de, paru bale lnungisan daha meniq hiya. Yosehu we lmingis 7 ali tama na ka heya. 11Qmita so nii, tnsdmatan daha lmingis ka dseediq Kenaan gaga Atad hiya ka seediq Kenaan de, rmengo: “Paru bale lingis dseediq Micrayim ka nii.” Kiya de Abel Micrayim kesun na tmngayan ka dxeral hiya, kiya ka ga meniq nklaan hido yayung Yarden. 12Dlqlaqi Yakobu we muyu ba so dnurun tama daha moda. 13Desun daha dxeral Kenaan ka heya ma, skuun daha ckceka lhengo qnpahan Makpelah gaga sipo Mamre. Qnpahan kiya we kiya ka Abraham bnaruy na peeyah Epron seediq Xet, ssmalu na skuwan bqerus. 14Bobo mhedu smeku tama na ka Yosehu de, mtheyaq dmtswai na ma, kana dseediq mntheyaq heya mosa smeku tama na de, mbrinah mosa Micrayim kana da.
Smbeyax Dmtswai na ka Yosehu
15Dmtswai Yosehu we, taan daha wada mhuqil ka tama daha de, rmengo: “Hhuwa trqilun ta na ka Yosehu. Maha so ndaan ta qnnaqah noda cuuxal mpciyuk ita ka heya.” 16Kiya de dmurun kari mosa rmengo Yosehu ka dheya: “Berah ini huqil ciida ka tama su we, dmnurun rmengo: 17‘Yamu we sai rmengo so nii ka Yosehu, Cuuxal we wada qnnaqah sunan ka dmtswai su, isu we srwai bale ka qnquwan noda daha ma qnnaqah daha.’ Saya, braho su bale srwai bale ka qnquwan noda tnqliyan Utux Baro tama su.” Rmengo kari so nii Yosehu ka dheya. Kiya de lmingis ka Yosehu da. 18Meyah tgtemaq berah na ka dmtswai na, rmengo: “Tai, yami we tnqliyan su ka yami.” 19Rmengo dheya ka Yosehu: “Iya kiicu, maku so mpririh Utux Baro ka yaku da peni? 20Lnglungan namu cuuxal we kmphuqil namu yaku. Kiya de, lnglungan Utux Baro so nii we ida malu kiya. So maha tduwa muudus kana ka hbaro seediq, kiya ka betaq ta so nii saya. 21Saya, iya kiicu ka yamu. Ida mu dngaun ka yamu ma lqlaqi namu.” Kiya de smbeyax dheya ka Yosehu ma rmengo kari smbleyaq dheya ka heya.
Mhuqil ka Yosehu
22Yosehu ma tnsapah tama na we meniq Micrayim kana. Muudus betaq 1'10 knkawas na ka Yosehu. 23Qmnita lqlaqi laqi Eprayim ka Yosehu. Laqi Lqlaqi Menaseh, laqi Makir. Mntuting ka heya we psaun daha papak Yosehu. 24Rmengo dmtswai na ka Yosehu: “Uxe ku beyo mhuqil ka yaku da. Kiya de Utux Baro we ida maha qmlahang dyamu. Mdudul yamu peeyah hini mosa baro, mquri dxeral sntangan bbege na Abraham, Yijxaq ma Yakobu.” 25Mlawa lqlaqi Israel ka Yosehu, psdehu dheya: “Mpqlahang yamu ka Utux Baro. Yamu we maadis buuc mu peeyah hini mosa baro ka yamu.”
26Mhuqil ka Yosehu da. Ciida we 1'10 knkawas na ka heya. Seediq we rcuhan daha malu kenux ka heya de, psaun daha kulu ka bqerus na ma, pniqun daha Micrayim.
Currently Selected:
Smnlean 50: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
