Lewiy 10
10
Nadab ma Abihu
1Mangal nanak ribo spuhan sknexan ka Nadab ma Abihu laqi Aharon. Psaun daha ckceka ribo ka puniq ma, gmaxun daha sknexan. Kiya de kmhemuc mege puniq uxe pnugaya rnengo Utux Tmninun meniq berah Utux Tmninun ka dheya. 2Kiya de asi eyah ka puniq pneeyah berah Utux Tmninun de, wada phuqil dheya. Kiya de asi huqil berah Utux Tmninun ka dheya. 3Kiya de, rmengo Aharon ka Moseh: “So nii ka rnengo Utux Tmninun: ‘Yaku we mptuura ku knrtaso ckceka dseediq smdaling yaku. Maha ku mangal knledax berah kana seediq.’” Kiya de ini rengo ka Aharon.
4Moseh ge, mlawa Misael ma Elcapan laqi Udiel, Ujiel we ririh tama Aharon. Rmengo dheya ka Moseh: “Aguh hini, desi nganguc kobu mrtaso ka dadal namu.” 5Kiya de, meyah dmidil mbqerus ma lukus daha desun daha nganguc kobu mrtaso. Nii we pnuyu daha rnengo Moseh. 6Rmengo Aharon ma Elajar ma Itamar laqi Aharon ka Moseh: “Iya rdui ka snuunux namu, iya sgaliq lukus namu uri. So namu uxe mphuqil. So uxe mpkseang kana seediq ka Utux Tmninun. Kiya de, kana tnsapah Israel mtswai namu we mplingis naqah kuxul ka wada peeyah puniq ka Utux Tmninun. 7Iya bale osa nganguc kobu mrtaso ka yamu, so namu uxe mphuqil. Ado gaga heyi namu ka abura Utux Tmninun.” Kiya de muyu kari Moseh moda ka dheya da.
8Rmengo Aharon ka Utux Tmninun: 9“Isu ma lqlaqi su, iya bale imah sino ini kbeyax ma sino mbeyax ka mremux namu kobu mrtaso ciida. So namu uxe mphuqil. Pnugaya yamu betaq ani knuwan knxalan ka nii. 10Kiya ka maha namu psaanak maanu ka mrtaso ma uxe mrtaso, bhege ma niqan rutiq. 11Mpgkela namu kana gaya tmgesa dseediq Israel ka tnugesa Utux Tmninun rnengo na Moseh.”
12Moseh we rmengo Aharon ma Elajar ma Itamar lqlaqi mnsngari Aharon: “Knrngiyan namu snapuh pnhgalang bnege namu snpuhan psqama Utux Tmninun we, asi ka uqun namu meniq ssiyo spuhan ma iya thiqi tgeda mekan. Ado mrtaso ka nii. 13Ekan nniqan mrtaso hiya ka nii. Ado ckceka bnege namu snpuhan psqmaan Utux Tmninun we, nisu ma nlaqi su ka nii. So nii ka kari tnugesa ku na. 14Heyi berah snapuh slgelu ma, papak snapuh pheyu we, asi ka uqun namu nniqan mrtaso. Isu ma lqlaqi su we pspui mekan kana. Ado bnege na yamu peeyah snpuhan ptbale dseediq Israel ka nii. Nnisu ma nlaqi su ka nii. 15Papak snapuh pnheyu su, heyi berah pnheyu su we, pspui kadi snapuh puniq desi ngalun su snapuh slgelu. Slgelu su mege berah Utux Tmninun. Nnisu ma nlaqi su betaq ani knuwan ka nii. Pnuyu rnengo Utux Tmninun kana ka nii.”
16Mteeyux bale migin balas dapa ngalun snapuh psruwan qnnaqah noda ka Moseh. Tena daha wada sqmaun ka kiya di. Kiya de mseang quri Elajar ma Itamar laqi Aharon ka Moseh. Rmengo: 17“Mrtaso riyung ka snapuh psruwa qnnaqah noda nii. Bege na yamu ka Utux Tmninun, kiya ka maha namu mheal qnquwan noda dseediq ma, mpririh psruwa qnquwan daha meniq berah Utux Tmninun. So kiya de, ma namu ini uqi nniqan mrtaso hiya ka nii ho? 18Tai! Ini namu desi nniqan mrtaso hiya ka dara snapuh nii uri. Asi namu ka muyu tnugesa mu, uqun namu ckceka nniqan mrtaso hiya ka heyi snapuh nii.” 19Rmengo Moseh ka Aharon: “Qtai! Saya we bnege snapuh psruwa qnquwan noda ma snapuh psqmaan ka dheya, kiya uri ma smterung ku so nii qnnaqah dungal. Nasi mekan snapuh psruwa qnquwan noda nii saya de, maha ngalan malu Utux Tmninun ka nii na peni?” 20Mbahang kari so nii ka Moseh de malu kuxul na da.
Currently Selected:
Lewiy 10: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020