Lewiy 13
13
Gaya Mnarux Qraqil Heyi
1Rmengo Moseh ma Aharon ka Utux Tmninun: 2“Nasi mluqah, mgheguh ma, mbeeba ka qraqil heyi seediq, betaq so mnarux sburo heyi ka heya de, asi ka desun berah Aharon msapuh, uxe uri we berah dmsapuh lqlaqi laqi Aharon. 3Msapuh we asi ka kruyun na ba qmita ka qraqil heyi na. Nasi wada mbhege ka ubal luqah na, betaq wada truma heyi ka knrnexan na de, kiya ka mnarux msburo heyi ka nii. Asi ka pxalun na ba qmita ka msapuh ma, mangal niqan rutiq ka heya. 4Nasi bhege ka qraqil heyi knbeeba na, ini dehuk truma heyi ma, ini kbhege ka ubal qraqil na we, msapuh ge asi ka psnakun na meluk mk7 ali ka seediq mnarux nii. 5Tg7 ali de, msapuh we asi ka pxalun na qmita dungal ka heya. Nasi wada malu, ini krana qraqil heyi na de, asi ka psnakun na meluk mk7 ali dungal ka heya. 6Tg7 ali de, msapuh we pxalun na qmita dungal ka heya. Nasi wada malu ma ini krana meniq qraqil heyi, msapuh we asi ka ngalun na bgurah seediq ka heya. Nii we mgheguh nanak kiya. Seediq kiya de asi ka mahu lukus, kiya de bgurah ka heya da. 7Bobo pnqtaan na msapuh knbgurah ka heya. Nasi wada mrana dungal ka gheguh na we, asi ka yahun na pqita msapuh dungal ka heyi na. 8Msapuh we asi na ka pxalun sleesun qmita dungal ka heya. Nasi wada krinah mrana de, asi ka ngalun na niqan rutiq ma kiya ka knnarux msburo heyi ka heya.
9Nasi mnarux msburo heyi ka seediq we, asi ka desun berah msapuh. 10Mpqita heya ka msapuh. Nasi hmeru luqah bhege, betaq bhege ka ubal ma, ckceka luqah bhege we niqan mtanah msnalaq de, 11nii we mgeegul msburo heyi kiya da. Msapuh we ngalun na niqan mrutiq ka heya. Ani na ini gmuki, ado niqan rutiq ka heya da. 12Nasi mkgarang kana qraqil heyi ka rnrexan msburo, betaq kana qraqil heyi na. Taan msapuh peeyah tunux betaq papak bale niqan kana. 13Asi ka qtaun msapuh. Nasi mkgarang kana heyi ka mnarux msburo nii de, asi ka ngalun na bgurah ka seediq mnarux nii. Nasi wada bhege ka heyi na we bgurah ka heya. 14Nasi mrana ka heyi bgurah de, gaga mnarux kiya. 15Qmita mtanah beeba heyi na ka msapuh de, asi ka ngalun na niqan rutiq ka heya. Ado mtanah beeba heyi we kiya ka gaga mnarux sburo heyi kiya. 16Nasi wada malu ka mtanah beeba heyi na, betaq wada bhege de, asi ka yahun na pqita msapuh. 17Msapuh we asi ka ndwaun na ba qmita. Nasi wada mbhege ka knnarux na, ngalun na bgurah ka heya. Kiya de bgurah ka heya di.
18Nasi niqan baso ka heyi seediq, betaq wada malu di. 19Bobo na nniqan baso hiya we meyah luqah bhege, uxe uri we mbeeba ckceka heyi hiya we niqan mtanah de, asi ka saun na pqita msapuh. 20Msapuh we mqita heya. Nasi osa truma heyi ma, wada mbhege ka ubal heyi na. Kiya de asi ka ngalun niqan rutiq ka heya. Nii we gisu mnarux msburo heyi ka ckceka baso na. 21Nasi qmita ka msapuh, ini kbhege ka ubal heyi na ma, ini osa truma heyi na. Kiya de mqalux hari de, asi ka psnakun na meluk mk7 ali ka heya. 22Nasi mkgarang kana heyi na ka luqah de, ngalun na niqan rutiq ka heya. Gisu mnarux ka kiya. 23Nasi wano nanak mbeeba, ini krana de, kiya ka kesun mbeeba nanak kiya. Kiya de msapuh we ngalun na bgurah ka heya.
24Nasi cmebu so snqmaan ka heyi seediq, betaq mbeeba ka luqah. Uxe uri we ckceka bhege hiya we niqan mtanah, uxe uri we asi kbhege kana. 25Msapuh we asi ka qtaan na bale. Nasi wada bhege ka ubal gaga mbeeba hiya ma, betaq wada truma heyi. Nii we gisu meyah ka mnarux msburo heyi. Kiya de asi ka ngalun niqan rutiq ka heya. Nii we gisu mnarux msburo heyi kiya. 26Msapuh we qtai bale, nasi ini kbhege ka ubal bobo mbeeba, ini dehuk truma heyi ma, mqalux hari na we, asi ka psnakun meluk mk7 ali ka heya. 27Betaq tg7 ali de, saun pqita msapuh. Nasi wada mrana mkgarang heyi na ka mbeeba de, ngalun na niqan rutiq ka heya. Nii we gisu mnarux msburo heyi kiya. 28Nasi gaga hiya ini krana ka mknbeeba, kiya nak mqalux nina. Knarux na nii we ngalun na bgurah ka heya na. Gisu niqan mnarux nanak ka kiya na.
29Ani rseno ani mqedil, nasi niqan luqah tunux uxe we bkeluy we, 30asi ka pqtaan msapuh. Nasi wada betaq truma heyi ka luqah, ckceka ubal na hiya we mpbhege de, asi ka ngalun niqan rutiq ka heya. Nii we luqah tunux ka nii, kiya ka kesun mnarux msburo heyi tunux ma ngudus ka nii. 31Qmita mnarux luqah tunux ka msapuh. Nasi ini dehuk truma heyi nina, ckceka na hiya we uka ka ubal mqalux de, asi ka psnakun meluk mk7 ali ka mnarux luqah tunux nii. 32Tg7 ali de, mpqita mnarux nii ka msapuh. Nasi ini krana ka luqah. Ckceka na hiya we ini kbhege ka ubal, ini dehuk truma heyi uri. 33Seediq nii we byuhun ka snuunux na, asi ka ini byuhi ka niqan luqah na. Kiya de msapuh we asi ka lebun na mk7 ali dungal ka mnarux luqah tunux. 34Tg7 ali pxalun na qmita dungal ka luqah. Nasi ini krana heyi na ka luqah ma, ini betaq truma heyi uri de, asi ka ngalun bgurah ka heya. Kiya de mpahu lukus na ka heya, bgurah ka heya di. 35Bobo bgurah ka heya, nasi gaga mrana dungal ka luqah tunux na. 36Asi ka qtaan bale msapuh ka heya. Nasi wada mkgarang ka luqah tunux na. Ani ini gimi ka ubal mpbhege, niqan rutiq ka heya. 37Qtaan msapuh, nasi ini krana ka luqah, ckceka hiya na we gisu hmeru ka ubal mqalux de, wada malu ka luqah tunux na. Kiya de seediq nii we bgurah kiya di. Asi ka ngalun bgurah ka heya.
38Ani rseno ani mqedil, nasi mbeeba ka heyi na, kiya ka mbeeba bhege. 39Kiya de asi ka qtaan msapuh. Nasi bhege ckceka mbeeba heyi hiya niqan mqalux we, gisu niqan khequh bhege ka qraqil heyi na. Seediq nii we bgurah kiya.
40Nasi mtuting ka snuunux seediq we, quluh tunux nanak ka kiya, bgurah kiya na. 41Nasi mtuting ka snuunux na berah, quluh tunux berah ka kiya, bgurah kiya na. 42Quluh tunux, uxe uri we quluh ba ckceka tunux we, nasi niqan madis mtanah ckceka bhege ka qraqil tunux de, gaga mnarux msburo gaga quluh tunux ma ckceka ba tunux heyi ka kiya. 43Msapuh we asi ka qtaun na. Nasi ckceka bhege niqan mtanah ka quluh tunux ma ckceka quluh tunux na we, maha mntena so mnarux msburo heyi ka kiya. 44Seediq kiya we gaga mnarux msburo heyi, ngali niqan rutiq. Kiya ma msapuh we asi ka ngalun na niqan rutiq ka heya. Mnarux na we gaga tunux na.
45Gaga mnarux msburo heyi we, asi ka sgliqun ka lukus na, tmrudu ka snuunux na ma, qmeerung quwaq na mdiras mlawa: ‘Mrutiq da! Mrutiq da!’ 46Ali gaga niqan mnarux ka heyi na ciida we, gaga niqan mnarux ka heya. Niqan mrutiq ka heya de, asi ka mosa mburux meniq nganguc kobu.
Gaya Srpungan Lukus
47Lukus wada luun mnarux sburo heyi we, ani lukus ubal miric, lukus snmalu nuqah, 48ani ware dnugese, ware pnaawe, qraqil ma qyqeya snmalu qraqil ka ani maanu. 49Uxe uri we gaga lukus, qraqil, ware dnugese ma pnaawe, uxe uri ma lmlamu snmalu qraqil. Knnarux nii we nasi mgsama, uxe uri we mtanah de gaga mnarux msburo heyi kiya di. Asi ka mosa pqita msapuh. 50Msapuh we asi ka qtaan na ka mnarux nii. Qyqeya nruwan mnnarux we, asi ka psnakun na mk7 ali. 51Mk7 ali, asi ka qtaan daha ka mnarux na. Mnarux nii uxe uri we wada mkgarang meniq lukus, ware dnugese, pnaawe, qraqil. Ani srpungan ani maanu ka qraqil nii we, gaga mnarux msburo heyi ka nii de, niqan rutiq kiya di. 52Lukus kiya ka wada ruwan mnarux, uxe uri we ware dnugese, pnaawe, ubal miric ma, nuqah, uxe uri we kana snmalu qraqil we, asi ka sqmaun kana. Ado mnarux sburo heyi ka nii, asi ka psqmaun ckceka puniq kiya.
53Msapuh we asi ka qtaan na. Nasi gaga meniq bobo lukus, ware dnugese, pnaawe, uxe uri we kana snmalu qraqil ma ini kgarang na we, 54asi ka tmgesa bale dheya ka msapuh. Kana qyqeya wada ruun mnarux nii we, asi ka pheun daha. Kiya ma psnakun na meluk mk7 ali uri. 55Bobo pnhean de, asi ka qtaan msapuh dungal. Nasi ini kmpriyux taan ka rapung ma, ini garang ka knarux de, niqan rutiq ka qyqeya kiya. Kiya de asi ka psqmaun ckceka puniq kana. 56Bobo pnhean de, asi ka qtaan msapuh dungal. Nasi wada mqalux hari ka knarux kiya. Kiya de asi na ka ngalun kana ka qyqeya lukus, qraqil, ware dnugese ma pnaawe. 57Nasi gaga truura bobo lukus, ware dnugese, pnaawe, lmlamu snmalu qraqil we, kiya ka gisu mrana ka mnarux nii. Kiya de asi ka sqmaun kana qyqeya mnarux kiya. 58Lukus pnahu, ware dnugese, pnaawe, uxe uri qyqeya snmalu qraqil, nasi wada mlatac ka knarux kiya de, bgurah ka kiya di.”
59Gaya quri mnarux sburo heyi ka nii. Ani gaga meniq lukus ubal miric, lukus tninun nuqah, ware dnugese, ware pnaawe ma, lmlamu qyqeya snmalu qraqil we, asi ka ngalun ya bgurah ma ya niqan rutiq.
Currently Selected:
Lewiy 13: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020