Lewiy 20
20
Gaya Pkdira Seediq
1Rmengo Moseh ka Utux Tmninun: 2“Rngagi kana ka seediq Israel: Kana seediq Israel, uxe uri we dseediq icil gaga tnooda ckceka dseediq Israel we, nasi daha spuhan mege Molek ka lqlaqi daha we, asi ka phqilun ka heya. Dseediq ita hini we asi ka scebu btunux phuqil heya. 3Mpkseang ku heya ka yaku uri. Pkungalun mu peeyah seediq ka heya. Ado snpuhan mege Molek ka lqlaqi na ma, wada smrutiq ngayan mrtaso mu ka heya. 4Wada smapuh mege lqlaqi daha Molek ka dheya ge, thkeso ini qita ka dseediq hini ma, ini daha phqili ka heya. 5Yaku we mpsquri ku seediq nii mseang. Pkungalun mu peeyah dseediq mu ka heya ma, kana smnegul heya kmmhemuc msuupu Molek.
6Mquri utux ma pstuutux ma, muyu dheya moda kmmhemuc msuupu we, mpkseang ku seediq kiya ka yaku. Pkungalun mu peeyah dseediq mu ka heya. 7So kiya de, psbgurah ma prtaso ka yamu nanak. Ado yaku we Utux Tmninun, Utux Baro namu. 8Asi namu ka muyu bale gaya mu. Yaku we Utux Tmninun prtaso yamu. 9Kana cmiyus tama ma bubu we, maha heyi na nanak ka qnquwan noda na.
10Nasi mmhemuc msuupu mtaqi mqedil ssiyo we, ani rseno ma mqedil ge asi ka phqilun. 11Mmhemuc msuupu mtaqi ririh na bubu we, gisu pqsiqa tama na ka nii. Kiya de 2 heyi nii we asi ka phqilun. Qnquwan noda nii we maha heyi daha nanak. 12Mmhemuc msuupu mtaqi ina na we, asi ka phqilun ka 2 heyi nii. Mnoda oda psaniq ka dheya. Kiya de qnquwan noda we maha heyi daha. 13Nasi mmhemuc msuupu mtaqi rseno, mntena so msuupu mtaqi mqedil we, wada moda psaniq ka 2 seediq nii, asi ka phqilun ka dheya. Qnquwan noda nii we maha heyi daha. 14Nasi mnangal mqedil ma, ngalan na mqedil ka bubu na qedil na we, paru bale qnquwan noda ka nii. Asi ka psqmaun puniq ka 3 heyi nii. So uxe maha niqan paru qnquwan noda ka ckceka namu. 15Nasi mmhemuc msuupu mtaqi camac we, asi ka phqilun ka heya. Camac kiya uri we, asi ka phqilun uri. 16Nasi smdaling camac ma msuupu mtaqi camac ka mqedil we, asi ka phqilun ka mqedil ma camac kiya. Qnquwan noda we maha heyi daha.
17Nasi ngalun na mqedil ka mtswai mqedil na we, ani ini pntena ka bubu ma mntena ka tama, ani ini pntena ka tama ma mntena ka bubu, wada mhemuc msuupu mtaqi ka dheya de, paru ba qnsiqa ka nii. Dheya we asi ka pkungalun meniq berah seediq mu ka dheya. Wada mhemuc msuupu mtaqi mtswai mqedil na ka heya we, maha heya nanak ka maapa qnquwan noda nii. 18Nasi msuupu mqedil pkelu yahan ma, mmhemuc msuupu mtaqi heya we, gisu smeeliq dara hrigan na. Mqedil nii uri we, gisu smeeliq dara hrigan na nanak uri. Asi ka pkungalun peeyah seediq ka dheya. 19Iya kmmhemuc msuupu mtaqi ririh bubu mqedil mtswai bubu su. 2 heyi nii we mpheal qnquwan noda daha nanak. 20Nasi mmhemuc msuupu mtaqi mqedil mtswai tama su we, gisu su pqsiqa mtswai tama su ka nii. 2 heyi nii we asi ka mpheal qnquwan noda daha nanak. Maha betaq mhuqil mpuuka ka lqlaqi daha. 21Nasi ngalan na mqedil ka mqedil mtswai na we, mrutiq ka so nii. Gisu tmsiiyax mtswai na ka kiya. 2 heyi nii we maha uka lqlaqi daha.
22Maanu so kiya de, puyu bale kari pndakar ma gaya bneku mu ka yamu. So namu uxe plixun peeyah dxeral nadis mu yamu hiya ka yamu. 23Dseediq pnlaxan mu peeyah berah namu we, iya bale puyu gaya daha. Ado mnoda nii ka dheya, kiya ka wada mu trqilun ka dheya. 24Kiya de, wada ku rmengo yamu, mplutuc namu mangal dxeral daha ka yamu. Kiya ka dxeral bbege mu yamu ma dxeral psbyeqan nunuh ma walu. Yaku we Utux Tmninun, Utux Baro namu, kiya ka pnsaanak yamu peeyah kana klegan seediq. 25So kiya de, asi ka psnakun namu ka camac bgurah ma niqan rutiq. Ado cmcamac niqan rutiq ma kana klegan mnuudus bobo dxeral we, iya bale psrtiqi nii ka yamu. 26Mrtaso nnaku ka yamu. Ado yamu, Utux Tmninun we mrtaso. Kiya ma psaanak yamu peeyah kana klegan seediq ma, dseediq mu ka yamu.
27Ani rseno ma mqedil, nasi smapuh utux ma stuutux we, asi ka phqilun ka dheya. Asi ka sdoi btunux cmebu phuqil ka dheya. Qnquwan noda we maha heyi daha.”
Currently Selected:
Lewiy 20: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020