Spegan 23
23
1Rmengo Balaq ka Bilam: “Smlaani ku 7 spuhan hini ma, psramal 7 dapa balas ma 7 baus miric hini uri.” 2Muyu kari Bilam wada moda ka Balaq. Balaq ma Bilam we mege ssapuh pn1 dapa balas ma baus miric meniq knkingal spuhan. 3Rmengo Balaq ka Bilam: “Heyu ssiyo spuhan psqmaan su hiya ka isu. Maha ku berah ka yaku, nhuwa mptqita kenan ka Utux Tmninun. Maanu ka tnugesa na kenan we, mprengo ku sunan.” Kiya de mosa bungu dgiyaq tadus ka Bilam.
4Mtqita Bilam ka Utux Baro. Rmengo Utux Baro ka Bilam: “Pnsramal ku 7 spuhan ma, knkingal spuhan we wada ku mege ssapuh knkingal dapa balas ma 1 baus miric.” 5Utux Tmninun we biqan na kari ka quwaq Bilam, rmengo: “Osa mbrinah Balaq hiya, keso nii rmengo.” 6Mbrinah Balaq hiya ka Bilam. Tai! Balaq ma dqbsuran mpdudul Moab we gisu mheyu ssiyo spuhan. 7Bilam de muuyas rmengo kari pnsaalu:
“Balaq we dmnudul kenan peeyah Aram,
qbsuran paru Moab we dmnudul kenan peeyah ddgiyaq nklaan hido ma rmengo:
‘Aguh! Yahi ku hiya cmiyus Yakobu.
Aguh! Yahi ku hiya mseang Israel.’
8Ini siyus ka Utux Baro de,
mtduwa ku cmiyus peni?
Ini kseang ka Utux Tmninun de,
mtduwa ku mseang peni?
9Sqita mu peeyah bungu dgiyaq btunux ka heya,
sqita mu peeyah bungu dgiyaq biciq ka heya.
Qtai! Dseediq pnugburux ka nii,
ini spegi ckceka kana qlhangan kiya.
10Ima ka mpdehuk smepu so bengux dxeral ka Yakobu?
Ima ka mptkela smepu so bnaquy ka Israel?
So ku maha so hhuqil seediq msderux noda ka hnqilan mu.
So ku maha so qnhdean seediq msderux noda ka qnhdean mu.”
11Rmengo Bilam ka Balaq: “Ma su mchaya kenan? Madis ku sunan meyah cmiyus pais mu. Tai! Gisu su smbleyaq dheya ka isu.” 12Cmiyuk rmengo ka heya: “Kari pnosa na quwaq mu ka Utux Tmninun we, uxe mu ndwaun rmengo peni?” 13Rmengo heya ka Balaq: “Psuupu kenan maha ta quri icil. Meniq hiya we tduwa ta qmita dheya. Wano duma ka qtaan su ma, uxe su qtaan kana. Braho su bale, pyhani ku hiya cmiyus dheya.”
Mn2 Rmengo Kari Pgeela ka Bilam
14Kiya de Balaq we desun na qnpahan Cuhing bungu dgiyaq Pisgah ka Bilam. Smalu 7 spuhan hiya. Knkingal spuhan we ssapuh na pn1 dapa ma baus miric. 15Rmengo Balaq ka Bilam: “Heyu ssiyo spuhan su psqmaan hiya ka isu. Maha ku qmita thngali.” 16Mtqita Bilam ka Utux Tmninun ma, biqan na kari meniq ckceka quwaq na ka Bilam: “Osa mbrinah Balaq hiya, keso nii rmengo.” 17Mbrinah Balaq hiya ka heya. Tai! Gisu mheyu ssiyo spuhan psqmaan ka Balaq. Dqbsuran mdudul Moab we gisu mtheyaq heya uri. Rmengo heya ka Balaq: “Maanu mesa ka Utux Tmninun?” 18Bilam de muuyas rmengo kari pnsaalu:
“Balaq! Tutui ma qbhangi.
Laqi Cipor! Qbahang kenan ka birac su.
19Uxe seediq ka Utux Baro, ini qberiq,
Uxe seediq ka heya, ini barah lnglungan.
Rmengo ka heya de uxe ta mpuyu moda ho?
Posa kari ka heya de uxe ta daun ho?
20Tai! Psbleyaq ku mesa ka pnosa kari.
Smbleyaq ka Utux Baro de, uka hhridan.
21Qntaan na we uka qnquwan noda ka Yakobu.
Qntaan na we uka qnqihan noda ka Israel.
Utux Tmninun, Utux Baro na we mptheyaq heya.
Mpniqan hrenang mqaras qbsuran paru ka ckceka na.
22Utux Baro we dmnudul dheya peeyah Micrayim,
mntena so urung dapa bbuyu ka Israel.
23Uka mpstuutux ka dehuk smeeliq Yakobu.
Uka mpsbunul ka dehuk phuqil Israel.
Saya, smneeru Yakobu ma Israel ka seediq we mprengo:
‘Teyal bale ndaan na qmeepah ka Utux Baro!’
24Qtai, mntena gipu rkelic rudu mtutuy ka seediq nii,
mheyu ge mntena balas rkelic rudu.
Ini ba ekan camac na,
ini ba imah dara pnhuqil na,
ini ba sbaang mtaqi.”
25Rmengo Bilam ka Balaq: “Iya bale siyus dheya ka isu ma, iya bale psbleyaq dheya ka isu uri!” 26Cmiyuk Balaq ka Bilam: “Uxe ku rmnengo mesa sunan: ‘Kana rnengo Utux Tmninun we asi ku ka muyu’ peni?” 27Rmengo Bilam ka Balaq: “Aguh, desun misu quri icil. Nhuwa smruwa isu mpsiyus dheya meniq hiya.” 28Kiya de Balaq we desun na bungu dgiyaq Bilam ka Peor qqtaan tadus brenux. 29Rmengo Balaq ka Bilam: “Smlaani ku 7 spuhan ma psramal 7 dapa balas ma 7 baus miric rudu hini.” 30Muyu kari rnengo Bilam ka Balaq. Psramal pn1 dapa balas ma baus miric knkingal spuhan ka heya.
Currently Selected:
Spegan 23: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020