Spegan 24
24
Mn3 Rmengo Kari Pgeela ka Bilam
1Mkela Utux Tmninun smkuxul smbleyaq Israel ka Bilam de, ini oda pstuutux mntena mk2 tgberah ka heya ma, mquri tadus brenux ka heya. 2Tlleus qmita ka Bilam, taan na gisu pnkobu knkingal pnswayan rudan daha ka seediq Israel. Meyah ckceka heyi Bilam ka Bgihur Utux Baro. 3Kiya de muuyas rmengo ka heya:
“Rmengo ka Bilam laqi Beor,
seediq mqemi doriq we rmengo,
4Mbahang kari Utux Baro,
qmita tuutux pneeyah Mdoi Kana Beyax.
Rmengo ka seediq gisu tgtemaq dxeral ma leexan qnita ka doriq daha:
5Yakobu! Teyal knmalu ka kobu su!
Israel! Teyal knmalu ka niqan su!
6Mntena ayu mslutuc,
mntena phepah pnhuma ssiyo yayung,
mntena qhuni skenux pnhuma Utux Tmninun,
mntena qulic bale pnhuma ssiyo qsiya.
7Mqluli peeyah phelan qsiya daha ka qsiya,
mprehak kneegu qsiya ka rehak daha.
Hmrinas Agag knparu ka qbsuran paru daha,
prnaun smparu ka qlhangan qbsuran paru na.
8Mdudul heya mlatac Micrayim ka Utux Baro,
mntena so urung dapa bbuyu ka heya.
Rqenun mekan pais qnlhangan ka heya.
Ptnemu buuc daha,
mdoi budi cmebu dheya.
9Mstkemu ka heya we mntena balas rkelic rudu,
msbaang we mntena gipu rkelic rudu.
Ima ka dehuk tmraki heya peni?
Kana snbleyaq sunan we, tai so mangal snbleqan.
Kana smniyus sunan we, tai so mangal snyusan.”
Mn4 Rmengo Kari Pgeela ka Bilam
10Mseang riyung Bilam ka Balaq ma, ptbeyax kmemux baga na. Rmengo Bilam ka Balaq: “Mlawa ku sunan meyah cmiyus pais mu. Tai! Wada su mn3 smbleyaq dheya ka isu da. 11Asi osa sapah su da! Satang ku mbege paru knledax sunan, tai! Gisu hmetur sunan maangal paru knledax ka Utux Tmninun.” 12Rmengo Balaq ka Bilam: “Uxe ku wada rmengo snkgulan su, mesa ku: 13‘Ani na sbege yaku kana ka king ma ging sapah na ka Balaq ge, uxe ku tbrinah tnugesa Utux Tmninun ma, muyu ku lnglungan mu meepah malu ma naqah. Maanu ka rnengo Utux Tmninun de, maanu ka rrengo mu uri.’ 14Saya tai! Mpbrinah ku mosa dseediq mu hiya da. Aguh, tgsae misu mphuwa mesa smterung dseediq su ka seediq nii.” 15Kiya de muuyas rmengo ka heya:
“Rmengo ka Bilam laqi Beor,
seediq mqemi doriq we rmengo,
16Mbahang kari Utux Baro,
mkela gnkela Utux Tgpusu Baro,
mita tuutux pneeyah Mdoi Kana Beyax.
Rmengo ka seediq gisu tgtemaq dxeral ma leexan mita ka doriq daha:
17Qtaan mu ka heya we, uxe saya.
Sleesan mu qmita ka heya we, uxe nii daling.
Mpeeyah Yakobu ka pngerah,
mtutuy peeyah Israel ka hukuc.
Mptnemu kduruk Moab,
mpstemaq kana seediq Set.
18Mptmpusu dnoi daha ka Edom,
mptmpusu dnoi pais na ka Seir.
Kiya de maha mbeyax mccebu ka Israel.
19Mpeeyah Yakobu ka gisu dmoi paru beyax,
mphuqil kana seediq ptngari hiya ka heya.”
20Qmita seediq Amaleq ka Bilam de, muyas rmengo ka heya:
“Amaleq we pusu kana qlhangan,
kiya ka kiya mpqhedu ani betaq knuwan.”
21Qmita seediq so utux quri seediq Qeyniy ka Bilam de, muyas rmengo ka heya:
“Mgdehu riyung ka nniqan su,
gaga su pniqun ckceka beling lhengo ka rudu su.
22Kiya de mpkuuka ka seediq Qayin,
betaq qrapun madis Asur ka isu.”
23Muyas rmengo dungal ka Bilam:
“Pluwe bale! Nasi moda so nii ka Utux Baro,
ima ka mpdehuk muudus na?
24Mpeyah ayus Kityim meyah ka asu,
meyah mepux Asur,
meyah mepux Eber.
Mpkuuka ani betaq knuwan ka heya nanak uri.”
25Kiya de mtutuy ka Bilam ma, wada sapah na nanak. Balaq we wada knluelu na nanak ka heya uri da.
Currently Selected:
Spegan 24: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020