ಮತ್ತಾಯೆ 27

ಪಿಲಾತನ ಎದುರುಡು ಯೇಸು

(ಮಾರ್ಕೆ 15:1; ಲೂಕೆ 23:1,2; ಯೋಹಾನೆ 18:28-32)

1ಬೊಲ್ಪಾನಗ ಮಾತ ಪ್ರಧಾನಯಾಜಕೆರ್‌ಲಾ ಸಭೆತ ಹಿರಿಯಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಲೋಚನೆ ಮಲ್ತೆರ್. 2ಆಯನ್ ಕೈಕಟ್ಟ್‌ದ್ ಲೆತ್ತೊಂದು ಪೋದು ದೇಶಾಧಿಪತಿ ಆದುಪ್ಪು ಪಿಲಾತಗ್ ಒಚ್ಚಿದ್ ಕೊರಿಯೆರ್.

ಯೂದನ ಮರಣ

(ಅಪೊ.ಕ್ರಿ 1:18,19)

3ಅಪಗ ಆಯನ್ ಪತ್ತ್‌ದ್ ಕೊರಿನ ಯೂದೆ, ಯೇಸುಗು ಮರಣ ದಂಡನೆದ ತೀರ್ಪಾಂಡ್ ಪಂಡ್ದ್ ಗೊತ್ತಾಯಿನಪಗ, ಪಶ್ಚಾತಾಪ ಪಡೆದ್ ಆ ಮುಪ್ಪ ಬೊಳ್ಳಿದ ನಾಣ್ಯೊನು ಪ್ರಧಾನಯಾಜಕೆರೆಗ್ಲಾ ಸಭೆತ ಹಿರಿಯೆರೆಗ್ಲಾ ಪಿರ ಕೊರಿಯೆರೆ ಕನತೆ. 4“ತಪ್ಪುದಾಂತಿ ನೆತ್ತೆರ್‌ನ್ ಮರಣೊಗು ಒಚ್ಚಿದ್ ಕೊರ್ದು ಪಾಪ ಮಲ್ತೆ,” ಪಂಡೆ. ಐಕ್ ಅಕುಲು, “ಐಟ್ಟ್ ಎಂಕ್ಲೆಗ್ ದಾನೆ, ಅವೆನ್ ಈಯೇ ತೂವೊನ್ಲ,” ಪಂಡೆರ್. 5ಅಪಗ ಯೂದೆ ಆ ದುಡ್ಡುನು ದೇವಾಲಯದ ಉಲಯಿ ದಕ್ಕ್‌ದ್ ಪೋದು ಕಂಟೆಲ್‌ಗ್ ಉರ್ಲು ಪಾಡೊಂದು ಸೈತೆ. 6ಪ್ರಧಾನಯಾಜಕೆರ್ ಆ ದುಡ್ಡುನು ದೆತ್ತೊಂದು, “ಅವು ನೆತ್ತೆರ್‌ದ ಕಾಸ್ ಆದಿತ್ತಿನೆಡ್ದ್ ಅವೆನ್ ಕಾಣಿಕೆದ ಡಬ್ಬಿಡ್ ಪಾಡಿಯೆರೆ ಬಲ್ಲಿ.” ಪಂಡೆರ್. 7ಬೊಕ್ಕ ಆಲೋಚನೆ ಮಲ್ತ್‌ದ್, ಪರದೇಸಿಲೆನ್ ಕೌಂಪೆರೆ ಬೋಡಾದ್ ಐಡ್ದ್ ಓಡಾರಿನ ಕಂಡ ಪನ್ಪಿ ಭೂಮಿನ್ ದೆತ್ತೊಂಡೆರ್. 8ಈ ಕಾರಣೊಡ್ದು ಇದ ಮುಟ್ಟಲಾ ಆ ಕಂಡೊಗು ನೆತ್ತೆರ್‌ದ ಕಂಡ ಅಂದ್‌ದ್ ಪುದರ್ ಉಂಡು. 9-10ಇಂಚ ಪ್ರವಾದಿ ಆದುಪ್ಪು ಯೆರೆಮೀಯೆ ಪಂತಿನ ಪಾತೆರ ನಡತ್ಂಡ್. ಅವು ದಾನೆಂದ್ಂಡ,

“ಅಕುಲು ಮುಪ್ಪ ರುಪಾಯಿ ದೆತ್ತೊಂದು

ಕರ್ತವ ಅಪ್ಪಣೆ ಆಯಿ ಲೆಕ್ಕ

ಅವೆನ್ ಕುಂಬಾರನ ಕಂಡೊಗು ಕೊರಿಯೆರ್.” ಉಂದೇ ಅಕುಲು ಕ್ರಯ ಕಟ್ಟಿನ ಬಿಲೆ.

ಉಂದೇ ಇಸ್ರಾಯೇಲ್ಯೆರೆಡ್ ಕ್ರಯ ಕಟ್ಟ್‌ದಿನಾಯನ ಬಿಲೆ ಪನ್ಪಿನವೇ.

ಪಿಲಾತೆ ಯೇಸುಡ ಪ್ರಶ್ನೆ ಮಲ್ತಿನವು

(ಮಾರ್ಕೆ 15:2-5; ಲೂಕೆ 23:3-5; ಯೋಹಾನೆ 18:33-38)

11ಯೇಸು ದೇಶಾಧಿಪತಿ ದುಂಬು ಉಂತುದುಪ್ಪುನಪಗ ದೇಶಾಧಿಪತಿ, “ಈ ಯೆಹೂದ್ಯೆರೆನ ಅರಸು ಅಂದಾ?” ಅಂದ್‌ದ್ ಕೇಂಡೆ. ಯೇಸು ಆಯಡ, “ಅಂದ್, ಈ ಪಂಡಿನಂಚೆನೇ.” 12ಬೊಕ್ಕ ಪ್ರಧಾನಯಾಜಕೆರ್‌ಲಾ, ಹಿರಿಯೆರ್‌ಲಾ ಆಯನ ಮಿತ್ತ್ ದೂರು ಪನೊಂದುಪ್ಪುನಪಗ ಆಯೆ ದಾಲಾ ಉತ್ತರ ಕೊರ್ಜೆ. 13ಅಪಗ ಪಿಲಾತೆ ಆಯಡ, “ಮೊಕುಲು ನಿನ ಮಿತ್ತ್ ಈತ್ ದೂರು ಪನ್ನಗ ನಿಕ್ಕ್ ಕೇನುಜಾ?” ಅಂದ್‌ದ್ ಕೇಂಡೆ. 14ಯೇಸು ಆಯಗ್ ಒಂಜಿ ಪಾತೆರೊಗ್ಲಾ ಉತ್ತರ ಕೊರ್ಜೆ ಅವೆನ್ ತೂದು ದೇಶಾಧಿಪತಿಗ್ ಮಸ್ತ್ ಅಚ್ಚಿರ ಆಂಡ್.

ಯೇಸುನು ಮರಣೊಗು ಒಪ್ಪಿಸಾಯಿನವು

(ಮಾರ್ಕೆ 15:6-15; ಲೂಕೆ 23:13-25; ಯೋಹಾನೆ 18:39—19:16)

15ಆಂಡ ಆ ಪರ್ಬೊಡು ಜನೊಕುಲು ಬಯಕಿನ ಒರಿ ಸೆರೆಟ್ಟಿತ್ತಿನಾಯನ್ ಅಕ್ಲೆಗ್ ಬುಡ್ದು ಕೊರ್ಪಿನವು ದೇಶಾಧಿಪತಿನ ಕ್ರಮ ಇತ್ತ್ಂಡ್. 16-18ಆ ಸಮಯೊಡು ಬರಬ್ಬೆ ಪನ್ಪಿ ಪುದರ್ ಪೋಯಿ ಒರಿ ಸೆರೆಟ್ಟಿತ್ತೆ. ಇಂಚ ಅಕುಲು ಸೇರ್ದ್ ಬತ್ತ್‌ತ್ತಿ ಸಮಯೊಡು ಪಿಲಾತೆ ಕಿಚ್ಚಿಮಚ್ಚರೊಡು ಆಯನ್ ಒಚ್ಚಿದ್ ಕೊರ್ತೆರ್ ಅಂದ್‌ದ್ ತೆರಿದ್, “ನಿಕ್ಲೆಗ್ ಏರೆನ್ ಬುಡ್ದು ಕೊರೊಡು? ಬರಬ್ಬನಾ? ಕ್ರಿಸ್ತೆ ಪನ್ಪಿ ಯೇಸುನಾ?” ಅಂದ್‌ದ್ ಅಕ್ಲೆಡ ಕೇಂಡೆ. 19ಪಿಲಾತೆ ನ್ಯಾಯಾಸನೊಡು ಕುಲ್ಲೊಂದುಪ್ಪುನಗ ಆಯನ ಬೊಡೆದಿ ಈ, “ಆ ನೀತಿವಂತನ ತಂಟೆಗ್ ಪೋವಡ. ಆಯಾಡ್ದಾದ್ ಇನಿ ಯಾನ್ ಕನೊಟು ದಿಂಜ ಕಷ್ಟ ಪಡೆಯೆ,” ಪಂಡ್ದ್ ಆಯಗ್ ಪಂಡ್ದ್ ಕಡಪುಡಿಯಲ್, 20ಅಂಚಿಡ್ದ್ ಪ್ರಧಾನಯಾಜಕೆರ್‌ಲಾ ಹಿರಿಯೆರ್‌ಲಾ ಕೂಡ್ದಿನ ಜನೊಕುಲೆನ್ ಪಿಲಾತಡ ಬರಬ್ಬನ್ ಬುಡ್ದು ಕೊರಿಯೆರೆ ಬೊಕ್ಕ ಯೇಸುಗು ಮರಣ ದಂಡನೆ ಕೊರೊಡು ಪಂಡ್ದ್ ಜನೊಕುಲೆನ್ ಪುಸ್‌ಲಾಯಿಸೆರ್. 21ಐಕ್ ದೇಶಾಧಿಪತಿ ಜನೊಕುಲೆಡ, “ಇರ್ವೆರೆಡ್ ನಿಕ್ಲೆಗ್ ಏರೆನ್ ಬುಡ್ದು ಕೊರೊಡು ಅಂದ್‌ದ್,” ಕೇಂಡಿನೆಕ್ಕ್, ಅಕುಲು “ಬರಬ್ಬನೇ” ಪಂಡೆರ್. 22ಐಕ್ ಪಿಲಾತೆ, “ಅಂಚಾಂಡ ಕ್ರಿಸ್ತೆ ಪನ್ಪಿನಾಯೆ ಯೇಸುನು ಯಾನ್ ದಾನೆ ಮಲ್ಪೊಡು?” ಅಂದ್‌ದ್ ಕೇನ್ನಗ ಮಾತೆರ್ಲಾ, “ಆಯನ್ ಕ್ರುಸ್ಸುಗು ಪಾಡ್ಪಾಲ,” ಪಂಡೆರ್. 23ಐಕ್ ಆಯೆ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್‌ದೆ?” ಪಂಡೆ. ಆಂಡ ಅಕುಲು, “ಆಯನ್ ಕ್ರುಸ್ಸುಗು ಪಾಡ್ಪಾಲ,” ಪಂಡ್ದ್ ಬೊಕ್ಕಲಾತ್ ಬೊಬ್ಬೆ ಪಾಡಿಯೆರ್. 24ಅಪಗ ಪಿಲಾತೆ ತನ ಪ್ರಯತ್ನ ನಡಪುಜಿ, ಗಲಾಟೆ ಮಾತ್ರ ಹೆಚ್ಚಾಪುಂಡು ಅಂದ್‌ದ್ ತೆರಿದ್ ನೀರ್ ದೆತ್ತೊಂದು ಜನೊಕುಲೆ ಎದುರು ಕೈ ದೆಕ್ಕೊಂದು, “ಈ ನೀತಿವಂತನ ನೆತ್ತೆರ್‌ಡ್ ಯಾನ್ ಸೇರ್ದಿನಾಯೆ ಅತ್ತ್, ನಿಕುಲೇ ತೂವೊನ್ಲೆ,” ಪಂಡ್ದ್ ಪನ್ನಗ 25ಜನೊಕುಲು ಮಾತೆರ್ಲಾ, “ಆಯನ ನೆತ್ತೆರ್ ಎಂಕ್ಲೆ ಮಿತ್ತ್‌ಲಾ ಎಂಕ್ಲೆ ಜೋಕುಲೆ ಮಿತ್ತ್‌ಲಾ ಉಪ್ಪಡ್,” ಪಂಡೆರ್. 26ಅಪಗ ಬರಬ್ಬನ್ ಅಕ್ಲೆಗ್ ಬುಡ್ದು ಕೊರ್ದು ಯೇಸುನು ಚಾಟಿಡ್ ಹಾಕಾದ್ ಕ್ರುಸ್ಸುಗು ಪಾಡಿಯೆರೆ ಒಚ್ಚಿದ್ ಕೊರಿಯೆ.

ಯೇಸುಗು ಸಿಪಾಯಿಲು ಮಲ್ತಿ ಗೇಲಿ

(ಮಾರ್ಕೆ 15:16-20; ಯೋಹಾನೆ 19:2,3)

27ಐಡ್ದ್ ಬೊಕ್ಕ ದೇಶಾಧಿಪತಿನ ಸಿಪಾಯಿಲು ಯೇಸುನು ಅರಮನೆತ್ತ ಉಲಯಿ ಲೆತ್ತೊಂದು ಪೋದು ಇಡೀ ಸಿಪಾಯಿಲೆನ್ ಲೆತ್ತ್‌ದ್ ಆಯನ ಸುತ್ತ ಸೇರಾವೊಂಡೆರ್. 28ಅಕುಲು ಆಯನ ಕುಂಟುಲೆನ್ ದೆತ್ತ್‌ದ್ ಕೆಂಪು ಒಲ್ಲಿನ್ ಪೊದಿಪಾದ್, 29ಮುಳ್ಳುಬಳ್ಳಿಡ್ದ್ ಕಿರೀಟೊನು ಮುಡೆದ್ ಆಯನ ತರೆತ ಮಿತ್ತ್ ದೀದ್ ಬಲತ್ತ ಕೈಟ್ ಬೆತ್ತ ಕೊರ್ದು, ಆಯ ದುಂಬು ಮೊರಂಪೂರ್ದು, “ಯೆಹೂದ್ಯೆರೆ ಅರಸೋ!” ನಿಕ್ಕ್ ವಂದನೆ ಅಂದ್‌ದ್ ಆಯಗ್ ಗೇಲಿ ಮಲ್ತೆರ್. 30ಆಯನ ಮಿತ್ತ್ ಉಬ್ಬಿದ್ ಆ ಬೆತ್ತೊನು ಒಯಿತ್‌ದ್ ಆಯನ ಮಂಡೆದ ಮಿತ್ತ್ ಹಾಕ್ಯೆರ್. 31ಇಂಚ ಆಯನ್ ಗೇಲಿ ಮಲ್ತಿ ಬೊಕ್ಕ ಆ ಒಲ್ಲಿನ್ ದೆತ್ತ್‌ದ್ ಆಯನ ಕುಂಟುನು ಪಾಡ್ದ್ ಆಯನ್ ಕ್ರುಸ್ಸುಗು ಪಾಡಿಯೆರೆ ಲೆತ್ತೊಂದು ಪೋಯೆರ್.

ಯೇಸುನು ಕ್ರುಸ್ಸುಗು ಪಾಡುನವು

(ಮಾರ್ಕೆ 15:21-32; ಲೂಕೆ 23:26-43; ಯೋಹಾನೆ 19:17-27)

32ಪಿದಯಿ ಪೋವೊಂದುಪ್ಪುನಗ ಕುರೇನೆ ಪಟ್ಟಣದ ಸೀಮೋನು ಪನ್ಪಿನಾಯನ್ ತೂದು, ಯೇಸುನ ಕ್ರುಸ್ಸುನು ತುಂಬೊಂದು ಕೊನೆಯೆರೆ ಒತ್ತಾಯ ಮಲ್ತೆರ್. 33ಬೊಕ್ಕ ಗೊಲ್ಗೊಥಾ ಪಂಡ ಕಪಾಲ ಪನ್ಪಿ ಜಾಗ್‌ಗ್ ಬತ್ತಿನಪಗ 34ಆಯಗ್ ಕೈಪೆ ಬೆರಕೆ ಮಲ್ತಿ ದ್ರಾಕ್ಷಾರಸೊನು ಪರಿಯೆರೆ ಕೊರಿಯೆರ್. ಆಯೆ ಅವೆನ್ ರುಚಿ ತೂದು ಪರಂದೆ ಇತ್ತೆ. 35ಐಡ್ದ್ ಬೊಕ್ಕ ಅಕುಲು ಆಯನ್ ಕ್ರುಸ್ಸುಗು ಪಾಡ್ದ್ ಆಯನ ಕುಂಟುನು ಚೀಟಿ ಪಾಡ್ದ್ ಪಾಲ್ ಮಲ್ತೊಂಡೆರ್. 36ಬೊಕ್ಕ ಅಲ್ಪ ಕುಲ್ಲೊಂದು ಆಯನ್ ಕಾತೊಂದಿತ್ತೆರ್. 37ಉಂದತ್ತಂದೆ ಆಯನ ಮಿತ್ತ್ ಪಾಡ್ದಿನ ಅಪರಾಧೊಲೆನ್ ಬರೆದ್ ಆಯನ ತರೆತ ಮಿತ್ತ್ ಪತ್ತಾಯೆರ್; ಅವು ದಾನೆ ಪಂಡ, “ಇಂಬೆ ಯೇಸು, ಯೆಹೂದ್ಯೆರೆ ಅರಸು,” ಪನ್ಪಿನವೇ. 38ಅಪಗ ಇರ್ವೆರ್ ಕಲ್ವೆರೆನ್ ಕನತ್‌ದ್ ಒರಿಯನ್ ಬಲತ್ತ್‌ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್‌ಡ್ ಆಯಡೊಪ್ಪ ಕ್ರುಸ್ಸುಗು ಪಾಡಿಯೆರ್. 39-40ಅಲ್ಪ ದಾಂಟ್‌ದ್ ಪೋಪಿನಾಕುಲು ತರೆ ಆಡಾದ್, “ದೇವಾಲಯೊನು ಬೂರ್ಪಾದ್ ಮೂಜಿ ದಿನೊಟು ಕುಡ ಕಟ್ಟುನಾಯಾ, ನಿನನ್ ಬಚವು ಮಲ್ತೊನ್ಲ. ದೇವೆರೆ ಮಗೆ ಆದಿತ್ತಡ ಕ್ರುಸ್ಸುಡ್ದು ಜತ್ತ್‌ದ್ ಬಲ!” ಅಂದ್‌ದ್ ಆಯನ್ ಗೇಲಿ ಮಲ್ತೊಂದಿತ್ತೆರ್. 41ಐತ ಲೆಕ್ಕನೆ ಪ್ರಧಾನಯಾಜಕೆರ್‌ಲಾ, ಶಾಸ್ತ್ರಿಲುಲಾ, ಹಿರಿಯೆರ್‌ಲಾ, ಯೇಸುಗು ಗೇಲಿ ಮಲ್ತೆರ್, 42“ಬೇತೆಕ್ಲೆನ್ ಬಚವು ಮಲ್ತೆ, ತನನ್ ಬಚವು ಮಲ್ತೊನೆರೆ ಆಯಿಜಿ? ಆಯೆ ಇಸ್ರಾಯೇಲ್ಯೆರೆ ಅರಸು ಅತ್ತಾ, ಇತ್ತೆ ಕ್ರುಸ್ಸುಡ್ದು ಜತ್ತ್‌ದ್ ಬರಡ್, ಜತ್ತ್‌ದ್ ಬತ್ತ್ಂಡ ಆಯ ಮಿತ್ತ್ ನಂಬಿಕೆ ದೀವ. 43ದೇವೆರೆಡ ಭರವಸ ದೀತೆ, ದೇವೆರ್ ಆಯಡ ಇಷ್ಟ ಪಡೆಂಡ ಇತ್ತೆ ಆಯನ್ ಬುಡ್ಪಾವಡ್. ತಾನ್ ದೇವೆರೆ ಮಗೆ ಅಂದ್‌ದ್ ಪನ್ಪೆ ಅತ್ತಾ,” ಅಂದ್‌ದ್ ಕೋಂಗಿ ಕಟ್ಟೊಂದು ಪಾತೆರೊಂದಿತ್ತೆರ್. 44ಆಯಡೊಪ್ಪ ಕ್ರುಸ್ಸುಗು ಪಾಡ್ದಿತ್ತಿ ಕಲ್ವೆರ್‌ಲಾ ಅಂಚೆನೇ ಆಯನ್ ನಿಂದನೆ ಮಲ್ತೊಂದಿತ್ತೆರ್.

ಯೇಸುನ ಮರಣ

(ಮಾರ್ಕೆ 15:33-41; ಲೂಕೆ 23:44-49; ಯೋಹಾನೆ 19:28-30)

45ಮಧ್ಯಾಹ್ನ ಪದ್ರಾಡ್ ಗಂಟೆಡ್ದ್ ಮೂಜಿ ಗಂಟೆ ಮುಟ್ಟ ಆ ದೇಶದ ಮಿತ್ತ್ ಕತ್ತಲೆ ಆಂಡ್. 46ಸುಮಾರ್ ಮೂಜಿ ಗಂಟೆಗ್ ಯೇಸು, “ಎಲೀ, ಎಲೀ, ಲಮಾ ಸಬಕ್ತಾನಿ?” ಪಂಡ, “ಎನ ದೇವೆರೇ, ಎನ ದೇವೆರೇ, ದಾಯೆಗ್ ಎನ ಕೈ ಬುಡ್ತ?” ಅಂದ್‌ದ್ ಮಲ್ಲ ಸ್ವರೊಟ್ಟು ಬುಲ್ತೆ. 47ಅಲ್ಪ ಉಂತುದಿನಾಕುಲೆಡ್ ಕೆಲೆವೆರ್ ಅವೆನ್ ಕೇಂಡ್ದ್, “ಇಂಬೆ ಎಲೀಯನ್ ಲೆಪ್ಪುವೆ,” ಪಂಡೆರ್. 48-49ಕೂಡ್ಲೆ ಅಕ್ಲೆಡ್ ಒರಿ ಪಾರ್‌ಪೋದು ಸ್ಪಂಜಿನ್ ಕನತ್‌ದ್ ಪುಳಿರಸೊಟು ಮುರ್ಕಾದ್ ಕೋಲುಗು ತಿಕ್ಕಾದ್ ಆಯಗ್ ಪರಿಯೆರೆ ಕೊರಿಯೆ. ಬಾಕಿದಾಕುಲು ಬುಡ್ಲೆ, “ಎಲೀಯೆ ಆಯನ್ ಬುಡ್ಪಾವೆರೆ, ಬರ್ಪೆನಾ ತೂಕ,” ಪಂಡೆರ್. 50ಯೇಸು ಕುಡ ಮಲ್ಲ ಸ್ವರೊಟ್ಟು ಬುಲ್ತುದು ಪ್ರಾಣ ಬುಡಿಯೆ. 51ಅಪಗ ದೇವಾಲಯದ ಪರದೆ ಮಿತ್ತ್‌ಡ್ದ್ ತಿರ್ತ್ ಮುಟ್ಟ ಪರಿದ್ ರಡ್ಡ್ ಪಾಲ್ ಆಂಡ್. ಭೂಮಿ ಅದ್‌ರ್ಂಡ್, 52ಪಾದೆ ಭಾಗ ಆಂಡ್, ಸಮಾಧಿಲು ಜತ್ತ್ಂಡ್. ಸೈತ್ ಪೋತಿ ಮಸ್ತ್ ದೇವಜನೊಕುಲೆ ಶರೀರೊಲು ಲಕ್ಕಿಯ. 53ಯೇಸುನ ಪುನರುತ್ಥಾನದ ಬೊಕ್ಕ ಅಕುಲು ಸಮಾಧಿಡ್ದ್ ಲಕ್ಕ್‌ದ್ ಪರಿಶುದ್ಧ ಪಟ್ಟಣದುಲಯಿ ಪೋದು ಮಸ್ತ್ ಜನೊಕುಲೆಗ್ ತೂವೆರೆ ತಿಕ್ಕಿಯೆರ್. 54ಅಪಗ ಶತಾಧಿಪತಿ ಬೊಕ್ಕ ಆಯಡೊಪ್ಪ ಯೇಸುನು ಕಾತೊಂದಿತ್ತಿ ಸಿಪಾಯಿಲು ಭೂಕಂಪಲಾ ನಡೆತಿನ ಸಂಗತಿಲೆನ್ಲಾ ತೂದು ಮಸ್ತ್ ಪೋಡಿದ್ ಪೋಯೆರ್, “ನಿಜಾದ್‌ಲಾ ಉಂಬೆ ದೇವೆರೆ ಮಗೆ ಆದಿತ್ತೆ,” ಪಂಡೆರ್. 55ಉಂದತ್ತಂದೆ ಮಸ್ತ್ ಪೊಂಜೊವುಲು ಅಲ್ಪ ಇತ್ತ್‌ದ್ ದೂರೊಡ್ದು ತೂವೊಂದಿತ್ತೆರ್. ಮೊಕುಲು ಯೇಸುನ ಸೇವೆ ಮಲ್ತೊಂದು ಗಲಿಲಾಯೊಡ್ದು ಆಯನ ಪಿರವುಡು ಬೈದಿತ್ತೆರ್. 56ಉಂದೆಟ್ಟ್ ಮಗ್ದಲದ ಮರಿಯಲಾ, ಯಾಕೋಬು ಯೋಸೆನ ಅಪ್ಪೆ ಆಯಿ ಮರಿಯಲಾ, ಜೆಬೆದಾಯನ ಜೋಕುಲೆ ಅಪ್ಪೆಲಾ ಇತ್ತೆರ್.

ಯೇಸುನ ಸಮಾಧಿ

(ಮಾರ್ಕೆ 15:42-47; ಲೂಕೆ 23:50-56; ಯೋಹಾನೆ 19:38-42)

57ಪೂರ್ತು ಕಂತ್‌ನಗ ಅರಿಮಥಾಯದ ಯೋಸೇಫೆ ಪನ್ಪಿ ಐಶ್ವರ್ಯವಂತೆ ಅಡೆಗ್ ಬತ್ತೆ. ಆಯೆ ಯೇಸುನ ಶಿಷ್ಯೆ ಆದಿತ್ತೆ. 58ಆಯೆ ಪಿಲಾತನ ಕೈತಲ್‌ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್‌ದ್ ನಟ್ಟೊಂಡೆ. ಅಪಗ ಪಿಲಾತೆ ಅವೆನ್ ಕೊರಿಯೆರೆ ಅಪ್ಪಣೆ ಕೊರಿಯೆ. 59ಯೋಸೇಫು ಯೇಸುನ ಶರೀರೊನು ದೆತ್ತೊಂದು ಅವೆನ್ ಶುದ್ಧ ನಾರ್‌ಮಡಿತ ಕುಂಟುಡು ಸುತ್ತುದು, 60ಪಾದೆಡ್ ತನ್ಕ್ ತೋಡಾದಿ ಪೊಸ ಸಮಾಧಿಡ್ ದೀದ್ ಸಮಾಧಿದ ಬಾಕಿಲ್‌ಗ್ ಒಂಜಿ ಮಲ್ಲ ಕಲ್ಲ್‌ನ್ ಪೊರೆಲ್ಪಾದ್ ಪೋಯೆ. 61ಮಗ್ದಲದ ಮರಿಯಲಾ ಆ ಬೊಕ್ಕೊಂಜಿ ಮರಿಯಲಾ ಅವುಲು ಸಮಾಧಿದ ಎದುರು ಕುಲ್ಲೊಂದಿತ್ತೆರ್.

ಸಮಾಧಿಗ್ ಕಾವಲ್‌

62ಮನದಾನಿ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಪಿಲಾತ ಕೈತಲ್‌ ಕೂಡ್ದು ಬತ್ತ್‌ದ್, 63“ದೊರೇ, ಆ ಮೋಸದಾಯೆ ಜೀವೊಡು ಉಪ್ಪುನಗ ಪನೊಂದಿತ್ತೆ, ‘ಮೂಜಿ ದಿನೊಡ್ದು ಬೊಕ್ಕ ಲಕ್ಕುವೆ,’ ಪಂಡಿನ ಎಂಕ್ಲೆ ನೆನೆಪುಗು ಬತ್ತ್ಂಡ್. 64ಅಂಚಾಯಿನೆಡ್ದ್ ಮೂಜನೇ ದಿನ ಮುಟ್ಟ ಸಮಾಧಿನ್ ಭದ್ರ ಮಲ್ತ್‌ದ್ ಕಾಪೆರೆ ಅಪ್ಪಣೆ ಕೊರೊಡು. ಇಜ್ಜಾಂಡ ಆಯನ ಶಿಷ್ಯೆರ್ ಬತ್ತ್‌ದ್ ಆಯನ್ ಕಂಡೊಂದು ಪೋದು ಸೈತಿನಾಯೆ ಲಕ್ಕ್‌ದ್ ಬೈದೆ ಅಂದ್‌ದ್ ಪನಿಯೆರೆ ಯಾವು; ಅಪಗ ಸುರುತ್ತ ಮೋಸೊಡ್ದು ಕಡೆತ ಮೋಸ ಭಯಂಕರ ಆವು,” ಅಂದ್‌ದ್ ಪಂಡೆರ್. 65ಅಪಗ ಪಿಲಾತೆ, “ಕಾವಲ್ದಾಕುಲೆನ್ ಲೆತ್ತೊಂದು ಪೋದು ನಿಕ್ಲೆಗ್ ತೆರಿಲೆಕ್ಕ ಭದ್ರ ಮಲ್ತ್‌ದ್ ಕಾಪುಲೆ,” ಅಂದ್‌ದ್ ಪಂಡೆ. 66ಅಕುಲು ಪೋದು ಕಾವಲ್ದಾಕುಲೆನ ಒಟ್ಟುಗು ಆ ಕಲ್ಲ್‌ಗ್ ಮುದ್ರೆ ಪಾಡ್ದ್ ಆ ಸಮಾಧಿನ್ ಭದ್ರ ಮಲ್ತೆರ್.

Currently Selected:

ಮತ್ತಾಯೆ 27: ತುಳು

Highlight

Copy